ភ្នំពេញ៖ សហភាពអឺរ៉ុប(EU) ផ្តល់ជំនួយ៧,៤លានអឺរ៉ុប (ប្រមាណ៨,៤លានដុល្លារអាម៉េរិក) ដល់អង្គការ អង្គការOxfam, យូនីសេហ្វ(UNICEF) និងអង្គការពលកម្មអន្តរជាតិ(ILO) ដើម្បីចូលរួមពង្រឹងប្រព័ន្ធគាំពារសង្គមនៅកម្ពុជាក្នុងវិបត្តិកូវីដ-១៩។ ស្ថាប័នអន្តរជាតិទាំង៤នេះ នឹងអនុវត្តគម្រោងលើកកម្ពស់ប្រព័ន្ធគាំពារសង្គមបែបបរិយាបន្ន និងឆ្លើយតបចំពោះគ្រោះអាសន្ននៅកម្ពុជា និងគម្រោងកម្ពស់សេវាគំាពារសង្គមនៅកម្ពុជា។ គម្រោងពួកគេរហូតដល់ឆ្នាំ២០២៤។ នេះបើយោងសេចក្តីប្រកាសព័ត៌មានរបស់អង្គការOxfam។
ការគាំទ្ររបស់សហភាពអឺរ៉ុប ចំពោះកម្មវិធីកែទម្រង់ប្រព័ន្ធគាំពារសង្គម គឺមានគោលបំណងរួមចំណែកដល់ការឆ្លើយតបភ្លាមៗ ចំពោះជំងឺកូវីដ-១៩នៅកម្ពុជា។ គម្រោងទាំងនេះ នឹងគាំទ្រដល់ការអនុវត្តក្របខ័ណ្ឌគោលនយោបាយជាតិគាំពារសង្គមរបស់កម្ពុជា ខណៈក្រុមប្រឹក្សាជាតិគាំពារសង្គម បានបំពេញតួនាទីយ៉ាងសំខាន់ក្នុងកម្មវិធីនេះ ជាមួយដៃគូពាក់ព័ន្ធនានា នៅថ្នាក់ជាតិនិងថ្នាក់ក្រោមជាតិ រួមទាំងក្រសួងសង្គមកិច្ច អតីតយុទ្ធជន និងយុវនីតិសម្បទា បេឡាជាតិសន្តិសុខសង្គម សង្គមស៊ីវិល និងវិស័យឯកជនផងដែរ។
លោក Bryan Fornari ប្រធានកិច្ចសហប្រតិបត្តិការនៃប្រតិភូសហភាពអឺរ៉ុបប្រចាំប្រទេសកម្ពុជា មានប្រសាសន៍ថា សហភាពអឺរ៉ុបបានសហការជាមួយអង្គការ ILO យូនីសេហ្វ និង Oxfam ដើម្បីគាំទ្រដល់កម្ពុជាឱ្យសម្រេចគោលដៅរយៈពេលវែងរបស់ខ្លួន ក្នុងការពង្រីកបរិយាបន្ននៃប្រព័ន្ធគាំពារសង្គម ដោយរួមបញ្ចូលទាំងកម្មករ/និយោជិត ដែលមិនទាន់ទទួលបានការការពារនៅឡើយ។
សេចក្តីប្រកាសព័ត៌មានរបស់Oxfam កាលពីថ្ងៃទី២១កុម្ភៈ ឆ្នាំ២០២២ បានបន្ថែមថា ជាជំហានបន្ទាប់ សហភាពអឺរ៉ុប នឹងគាំទ្រដល់តំណភ្ជាប់រវាងសេវាគាំពារសង្គម ការងារសមរម្យ និងកំណើនបៃតងប្រកបដោយចីរភាពនៅកម្ពុជា។
កម្មករចេញពីធ្វើការរោងចក្រ
ជាមួយគ្នានេះ លោក ចន ណារិទ្ធ អគ្គលេខាធិការនៃក្រុមប្រឹក្សាជាតិគាំពារសង្គម បានលើកឡើងថា កម្ពុជា ទទួលស្គាល់ពីតួនាទីដ៏សំខាន់ នៃសេវាគាំពារសង្គមប្រកបដោយបរិយាបន្ន រួមចំណែកដល់ការកាត់បន្ថយភាពក្រីក្រ និងវិសមភាព ជាពិសេសការលើកកម្ពស់ការអភិវឌ្ឍធនធានមនុស្ស ព្រមទាំងជំរុញស្ថិរភាពហិរញ្ញវត្ថុ និងកំណើនសេដ្ឋកិច្ច។ ការបង្កើតប្រព័ន្ធគាំពារសង្គមនៅកម្ពុជា ធ្វើឡើងក្រោមការដឹកនាំ និងការសម្របសម្រួលដោយក្រុមប្រឹក្សាជាតិគាំពារសង្គម ដែលមានតួនាទីវាយតម្លៃ និងតាមដានពីវឌ្ឍនភាព និងការអនុវត្ត ដោយមានគណនេយ្យភាព និងតម្លាភាព។
លោក បាននិយាយដូច្នេះ៖ « យើងខ្ញុំសូមថ្លែងអំណរគុណដល់ការគាំទ្រ និងការជឿទុកចិត្ដ ផ្តល់ដោយដៃគូអភិវឌ្ឍន៍របស់យើង ដែលបានរួមចំណែកដល់ការរីកចម្រើននៃប្រព័ន្ធគំាពារសង្គមនៃប្រទេសយើង»។
កម្មវិធីគាំទ្រដល់កំណែទម្រង់ប្រព័ន្ធគាំពារសង្គមរបស់សហភាពអឺរ៉ុប គឺមាន២គម្រោងដែលបំពេញបន្ថែមឱ្យគ្នាទៅវិញទៅមក។ ក្នុងនោះមាន គម្រោងទីមួយ៖ ការលើកកម្ពស់ប្រព័ន្ធគាំពារសង្គមបែបបរិយាបន្ន និងឆ្លើយតបចំពោះគ្រោះអាសន្ននៅកម្ពុជា (ហៅកាត់ថា FIRST) ដឹកនាំអនុវត្តដោយអង្គការ Oxfam កំពុងធ្វើការងារជាមួយនឹងដៃគូចំនួន១១ ដែលក្នុងនោះរួមមាន អង្គការសង្គមស៊ីវិល សហជីព និងសមាគមក្នុងស្រុក។
គម្រោង FIRST បង្កើតឡើងក្នុងគោលបំណងបង្កើនការយល់ដឹង និងកាប្រើប្រាស់របបគាំពារសង្គម លើកកម្ពស់ការចូលរួមក្នុងកិច្ចសន្ទនាសង្គម និងធ្វើឱ្យកាន់តែប្រសើរនូវយន្តការគណនេយ្យភាពសង្គម។ សេចក្តីប្រកាសព័ត៌មានដដែល បានបញ្ជាក់ថា Oxfam ទទួលបានជំនួយឥតសំណងចំនួន១,៨លានអឺរ៉ូ(ប្រមាណ២លានដុល្លារ) ពីសហភាពអឺរ៉ុប សម្រាប់អនុវត្តគម្រោងនេះ ដល់ឆ្នាំ២០២៣។
បើតាមនាយិកាអង្គការOxfam លោកស្រី ភាណ សោភ័ណ ការរាតត្បាតជាសកលនៃជំងឺកូវីដ-១៩ បានជួយឱ្យពលរដ្ឋកម្ពុជា កាន់តែដឹងពីភាពងាយរងគ្រោះរបស់ខ្លួន និងបានផ្តល់ឱកាសដ៏ល្អបំផុត ដើម្បីលើកកម្ពស់កិច្ចសហការគ្នា ក្នុងចំណោមដៃគូពាក់ព័ន្ធនានា ដែលកំពុងផ្តល់ការគាំទ្រដល់រដ្ឋាភិបាលកម្ពុជា ក្នុងគោលដៅកសាងប្រព័ន្ធគាំពារសង្គមមួយ ដែលកាន់តែមានលក្ខណៈបែបរិយាបន្ន និងឆ្លើយតបចំពោះវិបត្តិ។
លោកស្រី បាននិយាយដូច្នេះ៖ « Oxfam មានក្ដីសោមន្សរីករាយ ក្នុងការធ្វើការងារជាមួយនឹងសង្គមស៊ីវិល ស្ថាប័នរដ្ឋាភិបាល និងដៃគូអភិវឌ្ឍនានា ដើម្បីពាំនាំសំឡេងពលរដ្ឋ ដែលងាយរងគ្រោះ ជាពិសេសសំឡេងរបស់ស្ត្រីឱ្យតួអង្គពាក់ព័ន្ធនានាបានដឹងឮ និងរួមចំណែកដល់ការកសាងប្រព័ន្ធគាំពារសង្គមមួយ ដែលកាន់តែមានលក្ខណៈបរិយាបន្ន គណនេយ្យភាព និងតម្លាភាព»។
ដោយឡែក គម្រោងទីពីរ៖ គឺការលើកកម្ពស់សេវាគំាពារសង្គមនៅកម្ពុជា ដែលដឹកនាំដោយក្រុមប្រឹក្សាជាតិគាំពារសង្គម និងអនុវត្តដោយអង្គការ ILO និង យូនីសេហ្វ ក្រោមជំនួយជិត៥,៦លានអឺរ៉ូ( ប្រមាណ៦,៣លានដុល្លារ)។ គម្រោងនេះអនុវត្តរហូតដល់ឆ្នាំ២០២៤ ក្នុងគោលដៅជាក់សំខាន់ៗចំនួន៣ ដែលត្រូវសម្រេចឱ្យបាន។ ក្នុងនោះ ការលើកកម្ពស់ការផ្តល់សេវានិងការសម្របសម្រួលនៃប្រព័ន្ធសន្តិសុខសង្គម និងប្រព័ន្ធជំនួយសង្គម តាមរយៈប្រព័ន្ធដែលធ្វើទំនើបកម្ម, ការពង្រីកវិសាលភាពនៃប្រព័ន្ធសនិ្តសុខសង្គមដល់កម្មករនិយោជិត ឱ្យបានកាន់តែច្រើន និងការបង្កើនគុណភាព, និងភាពស៊ីជម្រៅនៃសេវាជំនួយសង្គមដល់ពលរដ្ឋ ដែលរស់នៅក្នុងស្ថានភាពក្រីក្រ-ភាពងាយរងគ្រោះ។ ទន្ទឹមគ្នានេះ ការបង្កើនសមត្ថភាពនៃកម្មវិធីគាំពារសង្គម គឺសំដៅពង្រឹងមុខរបរចិញ្ចឹមជីវិត និងការចូលរួមក្នុងទីផ្សារការងាររបស់ពួកគេ។
លោក Graeme Buckley នាយកការិយាល័យ ILO ប្រចាំប្រទេសថៃ កម្ពុជា និងឡាវ បានលើកឡើងថា សេវាគាំពារសង្គម គឺមានគោលដៅកាត់បន្ថយ និងបង្ការភាពងាយរងគ្រោះផ្នែកសេដ្ឋកិច្ច និងសង្គម រួមទាំងភាពក្រីក្រ។ វិបត្តិកូវីដ-១៩ បានរំលេចឱ្យឃើញពីសារៈសំខាន់នៃសេវាគាំពារសង្គមក្នុងការលើកកម្ពស់ភាពធន់ និងគាំទ្រដល់ការស្តារសេដ្ឋកិច្ចឡើងវិញ។
លោកបាននិយាយថា៖ «គម្រោងនេះនឹងរួមចំណែកដល់ការពង្រីកសេវាគំាពារសង្គម ដល់ស្ត្រី បុរស និងក្រុមគ្រួសាររបស់គេឱ្យបានកាន់តែច្រើនបន្ថែមទៀត។ ក៏ដូចជាបង្កើនការគ្របដណ្តប់នៃរបបសន្តិសុខសង្គមដល់កម្មករនិយោជិត ដែលមិនទាន់ទទួលបាន ដើម្បីឈានទៅកសាងប្រព័ន្ធគាំពារសង្គម ឆ្លើយតបចំពោះយេនឌ័រ ដែលកាន់តែមានប្រសិទ្ធភាព ប្រសិទ្ធផល គណនេយ្យភាព និងចីរភាព គ្របដណ្ដប់តម្រូវការរបស់ប្រជាពលរដ្ឋក្នុងវដ្តជីវិតទាំងមូល ក៏ដូចជារួមចំណែកដល់ការសម្រេចបានការងារសមរម្យ ព្រមទាំងកំណើនសេដ្ឋកិច្ចប្រកបដោយ បរិយាបន្ន និងប្រសិទ្ធភាព»។
សម្រាប់លោកស្រី ហ្វ័រូហ្គ ហ្វយូហ្សិថ នាយិកាយូនីសេហ្វប្រចាំប្រទេសកម្ពុជា មានប្រសាសន៍ថា៖ «ប្រព័ន្ធគាំពារសង្គម គឺជាឧបករណ៍មួយ ក្នុងចំណោមឧបករណ៍សំខាន់ជាងគេដែលយើងមាន ដើម្បីដោះស្រាយភាពក្រីក្រដែលចាក់ឫសគល់យ៉ាងជ្រៅ ហើយដែលបន្តកើនឡើង ដោយសារផលប៉ះពាល់ផ្នែកសេដ្ឋកិច្ចសង្គម ពីជំងឺកូវីដ-១៩ មកលើពលរដ្ឋដែលងាយរងគ្រោះជាងគេនៅកម្ពុជា»។
លោកស្រី បានបន្ថែមថា ការវិនិយោគរបស់រដ្ឋាភិបាលកម្ពុជាលើសេវាគាំពារសង្គមនៅពេលមុន និងក្នុងអំឡុងពេលនៃការរាតត្បាតជាសកល បានជួយគាំទ្រដល់សុខមាលភាពរបស់ពលរដ្ឋ ដោយរួមចំណែកដល់ការធានាបាននៅស្ថេរភាពសេដ្ឋកិច្ច និងជួយរក្សាលទ្ធផលនៃការអភិវឌ្ឍសម្រាប់កុមារ ដោយរួមបញ្ចូលទាំងតាមរយៈការទទួលបានសេវាអប់រំ និងសេវាថែទាំសុខភាពជាដើម។
ស្របពេលដែលកម្ពុជាផ្លាស់ទៅរកការស្តារឡើងវិញពីការរាតត្បាតជាសកលនៃជំងឺកូវីដ-១៩ ការកាត់បន្ថយភាពក្រីក្រ និងការកសាងភាពធន់រឹតតែមានសារៈសំខាន់ទៅទៀត។ «ការគាំទ្ររបស់សហភាពអឺរ៉ុបមានសារៈសំខាន់ណាស់ ដើម្បីជួយយើងទាំងអស់គ្នា ក្នុងការពង្រឹងវិស័យគាំពារសង្គម ដើម្បីឱ្យវិស័យនេះមិនត្រឹមតែជួយគាំទ្រឱ្យស្ត្រី និងកុមារនៅកម្ពុជាអាចស្តារឡើងវិញពីការរាតត្បាតជាសកលប៉ុណ្ណោះទេ ថែមទាំងបន្តរីកចម្រើនក្រោយវិបត្តិនេះទៀតផង»។ លោកស្រី ហ្វ័រូហ្គ ហ្វយូហ្សិថ បានបន្ថែមដូច្នេះនៅក្នុងសេចក្តីនប្រកាសព័ត៌មានដដែលរបស់Oxfam៕