អន្តរជាតិ
លោក ពូទីន ប្រាប់រដ្ឋជិតខាងរុស្ស៊ីកុំឱ្យបារម្ភ ឯអ៊ុយក្រែនជាករណីផ្សេង ព្រោះមានអ្នកនៅពីក្រោយ ប្រធានាធិបតីរុស្ស៊ី វ៉ា្លឌីមៀ ពូទីន ។ រូបថត AFP
× ប្រធានាធិបតីរុស្ស៊ី វ្ល៉ាឌីមៀ ពូទីន នៅថ្ងៃទី២២ ខែកុម្ភៈ បានផ្ដល់ការធានាដល់អតីតរដ្ឋសហភាពសូវៀតទាំងអស់កុំឱ្យបារម្ភអ្វី ស្របពេលដែលរុស្ស៊ីប្រឈមមុខជាមួយអ៊ុយក្រែន ហើយបានទទួលស្គាល់តំបន់ផ្ដាច់ខ្លួនពីរនោះ។ លោកបញ្ជាក់ថា មិនមានគម្រោងការកសាងចក្រភពរុស្ស៊ីដូចការលើកឡើងខ្លះឡើយ ហើយលោកនៅតែគោរពឯករាជ្យប្រទេសអតីតសហភាពសូវៀត ឯរឿងជាមួយអ៊ុយក្រែនជាករណីផ្សេង។
វិបត្តិអ៊ុយក្រែនហាក់មិនថមថយនោះឡើយ ខណៈដែលលោក វ៉្លាឌីមៀ ពូទីន បានប្រកាសទទួលស្គាល់តំបន់ផ្ដាច់ខ្លួនអ៊ុយក្រែន Donetsk និង Luhansk ហើយព្រមទាំងបានបញ្ជាឱ្យដាក់ពង្រាយទ័ពទៅតាមតំបន់ផ្ដាច់ខ្លួនភាគខាងកើតអ៊ុយក្រែននោះផងដែរ។ យ៉ាងណាមិញ លោក ពូទីន បែរជាបញ្ជាក់ពីជំហររបស់ខ្លួនថា លោកមិនចង់ក្ដោបយកប្រទេសអតីត សហភាពសូវៀតហើយបង្កើតជាចក្រភពរុស្ស៊ីឡើងវិញនោះឡើយ។
«ការព្យាការណ៍ថា រុស្ស៊ីមានគម្រោងការស្ដារអាណាចក្ររបស់ខ្លួនឡើងវិញតាមព្រំដែន មិនស្របនឹងការពិតនោះឡើយ»។ លោក ពូទីន បានសង្កត់ធ្ងន់បែបនេះអំឡុងជំនួបថ្ងៃទី២២ ខែកុម្ភៈជាមួយប្រធានាធិបតីអាស៊ែបៃហ្សង់ អ៊ីលហាម អាលីយេវ នៅវិមានក្រឹមឡាំង។
ទន្ទឹមនេះ ប្រធានាធិបតីរុស្ស៊ីរូបនេះបានលើកឡើងថា ទីក្រុងមូស្គូទទួលស្គាល់ការពិតនៃ ភូមិសាស្ត្រនយោបាយថ្មីបន្ទាប់ពីការដួលរលំនៃសហភាពសូវៀត និងការធ្វើការជាមួយ ប្រទេសឯករាជ្យទាំងអស់ផងដែរ។ ក៏ប៉ុន្តែប្រមុខរដ្ឋបញ្ជាក់ថា អ៊ុយក្រែនជាករណីលើកលែងដោយសារប្រទេសមួយនេះត្រូវបានប្រទេសទីបីប្រើប្រាស់ដើម្បីបង្កើតការគំរាមចំពោះរុស្ស៊ី។ ត្រង់នេះ ទោះមិនបញ្ចេញឈ្មោះ លោក ពូទីន ចង់សំដៅលើអាម៉េរិក និងលោកខាងលិចតែម្ដង។
ដោយសំដៅបដិវត្តន៍ដែលនាំឱ្យអ៊ុយក្រែនងាកទៅលោកខាងលិចឆ្នាំ២០១៤ លោក ពូទីន ក៏បានបន្តថា បន្ទាប់ពីមានរដ្ឋប្រហារនៅអ៊ុយក្រែនមក ទីក្រុងមូស្គូ និងទីក្រុង ក្រៀវមិនមានទំនាក់ទំនងល្អនឹងគ្នានេះឡើយ។
លើការទទួលស្គាល់តំបន់ផ្ដាច់ខ្លួនលោក ពូទីន បានប្រកាសការសម្រេចចិត្តនេះដោយយោងតាមឯកសារប្រវត្តិសាស្ត្រ។ នៅក្នុងនោះលោកអះអាងថា អ៊ុយក្រែនត្រូវបានបង្កើតឡើងដោយរុស្ស៊ីទាំងស្រុង ហើយលោកក៏បានចោទសួរអំពីអធិបតេយ្យភាពរបស់អ៊ុយក្រែន៕
© រក្សាសិទ្ធិដោយ thmeythmey.com