ជាតិ
សេដ្ឋកិច្ច
កម្ពុជាលែងតម្រូវឱ្យមានលិខិតបញ្ជាក់គ្មានកូវីដ-១៩លើការនាំសាច់ និងទំនិញបង្កក លោកគុណ ញឹម អគ្គនាយកនៃអគ្គនាយកដ្ឋានគយនិងរដ្ឋាករកម្ពុជា
× ភ្នំពេញ៖ ចំពោះសាច់ និងទំនិញបង្កក ដែលត្រូវនាំចូលសម្រាប់ចរាចរនៅលើទីផ្សារកម្ពុជា គឺត្រូវលែងឱ្យធ្វើវិញ្ញាបនបត្រ ឬលិខិតបញ្ជាក់ ថា គ្មានវីរុសកូវីដ-១៩។ នេះយោងតាមសេចក្តីប្រកាសព័ត៌មាន របស់លោកគុណ ញឹម អគ្គនាយកនៃអគ្គនាយកដ្ឋានគយនិងរដ្ឋាករកម្ពុជា។
លោកគុណ ញឹម សម្រេចលើកលែងការតម្រូវឱ្យមានវិញ្ញាបនបត្រឬលិខិតបញ្ជាក់ថា គ្មានវីរុសកូវីដ-១៩ លើសាច់និងទំនិញបង្កក ដែលត្រូវនាំចូលកម្ពុជាទៀតឡើយ។ ការសម្រេចនេះ ត្រូវបានអគ្គនាយកដ្ឋានគយអះអាងថា ធ្វើឡើងបន្ទាប់ពីការឆ្លងរាលដាលជំងឺកូវីដ-១៩ ជាពិសេសវីវុសបំប្លែងថ្មី ប្រភេទដែលតា( Delta)នៅតាមបណ្តាប្រទេសប្រភពនាំចូលសាច់បង្កកនិងទំនិញបង្កកផ្សេងទៀតចូលមកកម្ពុជា គឺមានភាពធូរស្រាល ហើយលទ្ធផលនៃការធ្វើតេស្តលើសាច់បង្កកនាពេលកន្លងមក ក៏ពុំឃើញមានវត្តមានវីរុសកូវីដ-១៩ទៀតដែរ។
ទោះបីជាយ៉ាងណាក៏ដោយ អគ្គនាយកពន្ធរូបនេះ បានបញ្ជាក់នៅក្នុងសេចក្តីប្រកាសព័ត៌មានរបស់ខ្លួន នាថ្ងៃទី២៤កុម្ភៈ ថាចំពោះមុខទំនិញត្រជាក់ និងទំនិញបង្កក ដែលនាំចូលពីប្រទេសជិតខាង មន្ត្រីគយនិងរដ្ឋាករមានសមត្ថកិច្ច ត្រូវបន្តអនុវត្តវិធានការអនាម័យ និងវិធានការសុខាភិបាលឱ្យបានហ្មត់ចត់ ដោយបាញ់ថ្នាំសម្លាប់មេរោគលើសំបកវេចខ្ចប់ និងមធ្យោបាយដឹកជញ្ជូនទំនិញ។
សូមជម្រាបថា កាលថ្ងៃទី១៩កក្កដា ក្រសួងសុខាភិបាល បានប្រកាសពីការរកឃើញវីរុសកូវីដ-១៩នៅក្នុងសាច់ក្របីបង្កកចំនួន៣កុងតឺន័រក្នុងចំណោម៥កុងតឺន័រដែលនាំចូលមកពីប្រទេសឥណ្ឌា។ បន្ទាប់ពីរកឃើញដូច្នេះ អាជ្ញាធរកម្ពុជាបានសម្រេចបើកបិទការនាំចូលសាច់បង្កកពីបឥណ្ឌាមួយរយៈ។ រហូតដល់ទី២២មិថុនា ឆ្នាំ២០២១ កម្ពុជា បានបើកឱ្យមានការនាំចូលផលិតផលទាំងនោះវិញ។ ប៉ុន្តែ បើទោះជាបើកឡើងវិញក៏ដោយ គឺរាល់ទំនិញ និងសាច់បង្កកដែលមកពីប្រទេសឥណ្ឌាចាំបាច់ត្រូវមានការត្រួតពិនិត្យ និងធ្វើតេស្តរកវីរុសកូវីដ-១៩ជាមុនសិន ទើបអនុញ្ញាតឱ្យមានការនាំចូល៕
Tag:
គយ
កូវីដ-១៩
លោក គុណ ញឹម
© រក្សាសិទ្ធិដោយ thmeythmey.com