ក្រុមប្រឹក្សាសហព័ន្ធស៊្វីសដែលមានសមាជិកចំនួន ៧នាក់ បានជួបពិភាក្សាគ្នានៅថ្ងៃទី២៨ ខែកុម្ភៈ ដើម្បីសម្រេចដាក់ទណ្ឌកម្ម និងបង្កកទ្រព្យសម្បត្តិលើរុស្ស៊ី។ បន្ទាប់ពីជំនួបនោះ លោក Ignazio Cassis ប្រធានាធិបតីស្វ៊ីស និងជារដ្ឋមន្រ្តីការបរទេសផងនោះ បានអះអាងថា រដ្ឋាភិបាលក្រុងប៊ែន នឹងធានាថា អ្នកដែលរងទណ្ឌកម្មទាំងនោះ នឹងមិនអាចគេចផុត តាមរយៈស្វ៊ីសឡើយ។ 

 

«នេះ គឺជាជំហានដ៏សំខាន់សម្រាប់ស្វ៊ីស»។ លោកប្រធានាធិបតី បានសង្កត់ធ្ងន់បែបនេះ នៅក្នុងសន្និសីទសារព័ត៌មានក្នុងថ្ងៃទី២៨ ខែកុម្ភៈ ដោយបន្ថែមថា គោលនយោបាយអព្យាក្រឹតរបស់ស្វ៊ីសនៅតែអនុវត្តដដែល ប៉ុន្តែរដ្ឋាភិបាលគ្រាន់តែការពារតម្លៃបស្ចឹមប្រទេស។​ 

 

ស្របគ្នានេះ រដ្ឋាភិបាលស៊្វីស បានចេញសេចក្តីថ្លែងការណ៍មួយ ដោយបញ្ជាក់ថា ស្វ៊ីស នឹងអនុវត្តទណ្ឌកម្មដូចគ្នានឹងសហភាពអឺរ៉ុប។ ចំណាត់ការទាំងនោះ គឺជាទណ្ឌកម្មហិរញ្ញវត្ថុ និងវត្ថុសំខាន់ៗ។ ស៊្វីស ក៏បង្កកទ្រព្យសម្បត្តិលើបុគ្គល និងក្រុមហ៊ុនរបស់រុស្ស៊ីផងដែរ។ រដ្ឋាភិបាល បានសម្រេចដាក់ទណ្ឌកម្មហិរញ្ញវត្ថុលើលោកប្រធានាធិបតីរុស្ស៊ី វ្ល៉ាឌីមៀ ពូទីន, នាយករដ្ឋមន្រ្តី Mikhail Mishustin និង រដ្ឋមន្រ្តីការបរទេសរុស្ស៊ី Sergei Lavrov ដែលត្រូវចូលជាធរមានភ្លាមៗ។ លើសពីនេះ ស្វ៊ីស បានសម្រេចដាក់អ្នកមានចំនួន ៥នាក់ ដែលស្និទ្ធជាមួយលោកពូទីន ក្នុងបញ្ជីខ្មៅដោយហាមមិនឱ្យចូលក្នុងប្រទេសខ្លួន។ 

 

តាមសេចក្តីថ្លែងការណ៍រដ្ឋាភិបាលស្វ៊ីស ចំណាត់ខាងលើនេះ គឺជាការឆ្លើយតបនឹងការបំពានច្បាប់អន្តរជាតិ សម្រាប់បុគ្គលដែលត្រូវទទួលខុសត្រូវ លើការវាយប្រហារនៅអ៊ុយក្រែន។ 

 

ក្នុងថ្ងៃដដែលនោះ រដ្ឋាភិបាលទីក្រុងប៊ែន បានប្រកាសថា ខ្លួននឹងបិទដែនអាកាសស្វ៊ីសសម្រាប់ជើងហោះហើរទាំងអស់របស់រុស្ស៊ី លើកលែងតែការហោះហើរក្រោមជំនួយមនុស្សធម៌ វេជ្ជសាស្រ្ត និងការទូត។ 

 

ទណ្ឌកម្មខាងលើ ត្រូវបានប្រមុខការទូតអឺរ៉ុប លោក Josep Borrell សាទរយ៉ាងខ្លាំង និងចាត់ទុកជាដំណឹងល្អ ព្រោះក្រុមអ្នកមាននៅរុស្ស៊ី នឹងមិនអាចផ្ទេរលុយទៅស្វ៊ីសបានបន្តទៀត៕