ជាតិ
សេដ្ឋកិច្ច
កម្ពុជា បាននាំចេញអង្ករជាង១០ម៉ឺនតោន កើនជាង៣៥ភាគរយ រូបតំណាង៖ កម្មករ២នាក់ កំពុងលីសែងអង្ករ។ រូបថត៖ហ្វេសប៊ុក លោក វេង សាខុន រដ្ឋមន្ត្រីកសិកម្ម
× ភ្នំពេញ៖ ២ខែមកនេះ កម្ពុជា នាំចេញអង្ករទៅកាន់ទីផ្សារពិភពលោក បានជាង១០ម៉ឺនតោន។ បរិមាណនៃការនាំចេញនេះ គឺបានកើនរហូតដល់៣៥,២១ភាគរយបើធៀបនឹងរយៈពេលដូចគ្នា កាលឆ្នាំ២០២១។
ក្នុងចំណោមអង្ករសរុប ១០៣ ០៥៨តោន ដែលកម្ពុជាបាននាំចេញនារយៈពេល២ខែនៃដើម ឆ្នាំ២០២២នេះ គឺមាន២៦ ៥០៧តោន បាននាំទៅទីផ្សារសហភាពអឺរ៉ុប។ ចំនួននៃការនាំចេញនេះ បានកើនជិត៤០ភាគរយ បើធៀបនឹងរយៈពេលដូចគ្នាឆ្នាំ២០២១។ នេះបើយោងតាមរបាយការណ៍របស់លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ។
ពេលជាមួយគ្នានេះ កម្ពុជាក៏នាំអង្ករទៅទីផ្សារប្រទេសចិនបានក្នុងចំនួន ៥៦ ៣៨៥តោន ដោយកើនបានជិត៥០ភាគរយ និងនាំទៅប្រទេសសមាជិកអាស៊ានបានចំនួន ៩ ៣៧០តោន ដោយកើនបាន៥០,៤៣ភាគរយ ផងដែរ។ ក្រៅពីនេះ កម្ពុជាក៏បាននាំអង្ករទៅទិសដៅប្រទេសចំនួន១៦ប្រទេសទៀត បានក្នុងចំនួន ១០ ៧៩៦តោន ប៉ុន្តែការនាំចេញនេះ គឺបានធ្លាក់ចុះ១៩,២៣ភាគរយ។
បើតាមលោក វេង សាខុន ក្រៅពីការនាំចេញអង្ករនេះ កម្ពុជាក៏សម្រេចនូវការនាំចេញស្រូវទៅប្រទេសវៀតណាម បាន ៦៥១ ១០១តោន ផងដែរ។ បរិមាណនៃស្រូវដែលបាននាំចេញនេះ គឺបានកើន១៦,៤៧ភាគរយ ធៀបនឹងរយៈពេលដូចគ្នានៅឆ្នាំ២០២១៕
© រក្សាសិទ្ធិដោយ thmeythmey.com