លោក Roman Abramovich ម្ចាស់ក្លិប Chelsea ស្ថិតក្នុងចំណោមសេដ្ឋីរុស្ស៊ី៧រូប ដែលត្រូវបាននាយករដ្ឋមន្ត្រីអង់គ្លេស លោក បូរីស ចនសុន ដាក់ទណ្ឌកម្ម ដើម្បីបង្ហាញការគាំទ្រចំពោះពលរដ្ឋអ៊ុយក្រែន និងប្រឆាំងការឈ្លានពានទឹកដីពីសំណាក់រុស្ស៊ី។
 

ការដាក់ទណ្ឌកម្មនេះ មានន័យថាសេដ្ឋីទាំង៧ ដែលរួមមានលោក Abramovich ដែលត្រូវបានគេជឿជាក់ថាមានទំនាក់ទំនងជិតស្និទ្ធជាមួយលោកប្រធានាធិបតីរុស្ស៊ី វ៉្លាឌីមៀ ពូទីន នោះត្រូវបង្កកទ្រព្យសម្បត្តិ និងបិទចរន្តប្រភពហិរញ្ញវត្ថុទាំងអស់ ដែលមាននៅទឹកដីអង់គ្លេស។
 

ការបង្កកទ្រព្យសម្បត្តិ ក៏មានន័យថា មហាសេដ្ឋីប្រេងវ័យ៥៥ឆ្នាំ លែងទទួលបានចំណូលអ្វីពីក្លិបតោខៀវ ចាប់ពីពេលនេះ ដែលរួមមានទាំងការលក់សំបុត្រ ផ្សព្វផ្សាយ និងការឧបត្ថម្ភផ្សេងៗ។ មិនតែប៉ុណ្ណោះក្លិបម្ចាស់ការពារតំណែងជើងឯក UEFA Champions League ដែលលោក Abramovich ប្រកាសដាក់លក់កន្លងមក ក៏មិនអាចធ្វើទៅបានដែរ។
 

យ៉ាងណាក៏ដោយ រដ្ឋាភិបាលអង់គ្លេស​បាន​ចេញ​អាជ្ញាប័ណ្ណ​ពិសេស​មួយ ​ដែល​នឹង​អនុញ្ញាត​ឱ្យ​ការ​ប្រកួត​របស់ Chelsea ដំណើរការធម្មតា ហើយបុគ្គលិក​ក្លិបទទួល​បាន​ប្រាក់​ខែដដែល និងអ្នកមានសំបុត្រ​​ស្រាប់​អាចចូលរួមទស្សនា​ការ​ប្រកួតបាន។
 

Chelsea តាមរយៈវេបសាយផ្លូវការរបស់ខ្លួនសរសេថា ពួកគេនឹងស្នើសុំចូលរួមពិភាក្សាជាមួយរដ្ឋាភិបាលអង់គ្លេស ដើម្បីស្វែងរកការកែប្រែអាជ្ញាប័ណ្ណពិសេសថ្មីមួយ ដើម្បីអនុញ្ញាតឱ្យក្លិបដំណើរការប្រសើរជាងនេះ តាមដែលអាចធ្វើទៅបាន៕