លោក ចាន់ វណ្ណូ ប្រធានសហគមន៍តាំងយូ ក្នុងខេត្តព្រះវិហារ បានប្រាប់សារព័ត៌មានថ្មីៗ២៥ថា បច្ចុប្បន្នផ្ទះបាយសហគមន៍ សម្រាប់បម្រើសេវាម្ហូបអាហារ ដល់ភ្ញៀវដោយផ្ទាល់ត្រូវបានសាងសង់រួចរាល់ហើយ។ បើតាមលោក វណ្ណូ ចាប់ពីបង្កើតសហគមន៍នៅឆ្នាំ២០១៥ ទីតាំងនេះ មិនដែលមានផ្ទះបាយនៅក្នុងសហគមន៍នោះទេ ខណៈការបម្រើសេវាម្ហូបអាហារឱ្យភ្ញៀវកន្លងមក គឺសហគមន៍ ធ្វើនៅតាមគ្រួសារប៉ុណ្ណោះ។  «រោងនោះជាផ្ទះបាយដំបូងបង្អស់ នៅក្នុងសហគមន៍តាំងយូយើង ទើបនឹងធ្វើរួមថ្មីៗ។ នៅក្នុងអំឡុងខែមីនា ឆ្នាំ២០២២ សហគមន៍បានរៀបចំផ្ទះបាយ និងបានបង្កើតសេវាផ្គត់ផ្គង់អាហារសម្រាប់ភ្ញៀវ ដែលបានមកកម្សាន្ដតាមតម្រូវការ»។ នេះជាការលើកឡើងរបស់ លោក វណ្ណូ។

ទន្ទឹមនេះ ប្រធានសហគមន៍បានលើកឡើងថា សមាជិកក្នុងសហគមន៍ បានរៀបចំ និងទទួលភ្ញៀវជារៀងរាល់ថ្ងៃ ទោះបីជាផ្ទះបាយនេះ ទើបនឹងធ្វើរួចរាល់ និងមិនទាន់មានសម្ភារគ្រប់គ្រាន់ក្តី។ លោកលើកឡើងថា៖ «យើងទើបធ្វើហើយពីរបីថ្ងៃមុននេះ  មានសម្ភារខ្លះ មិនទាន់បានទិញចូលគ្រប់នៅឡើយ។ តែទោះជាបែបនេះក្តី ពេលភ្ញៀវមកកម្សាន្តហើយត្រូវការម្ហូប ពួកយើងអាចទទួលបានធម្មតា។ ជាកស្ដែងថ្ងៃនេះ មានភ្ញៀវជនជាតិ២នាក់មក នឹងត្រូវការសេវាអាហារភ្លាមៗ យើងអាចបំពេញតម្រូវការបាន។ ខ្ញុំឃើញបែបនេះ ពិតជារីករាយណាស់»។ លោក វណ្ណូ អង្គុយលើកៅអីឈើ ក្នុងសហគមន៍ ជជែកទាំងទឹកមុនញញឹម។ 
 

ជាមួយគ្នានោះ លោកបានបញ្ជាក់បន្ថែមថា ដំណើរការនៃសេវាកម្មម្ហូបអាហារ នៅក្នុងសហគន៍ លោក និងសមាជិកទាំងអស់ បានដាក់បញ្ចូលម្ហូបប្រចាំតំបន់មួយចំនួន ដែលកើតចេញពីជីវភាពពលរដ្ឋរស់នៅទីនេះ ក្នុងនោះមានបុកគ្រឿងខ្មៅ និងបុកល្ងខ្មៅ គឺជាម្ហូបដែលត្រូវបានជ្រើសរើស និងគិតបញ្ចូលមុនគេ។