នៅក្នុងកម្មវិធីទូរទស្សន៍ហូឡង់ Humberto អតីតអ្នកចាត់ការ Manchester United និង Barcelona វ័យ៧០ឆ្នាំរូបនេះ បានបង្ហាញពីរោគវិនិច្ឆ័យរបស់ខ្លួន ជុំវិញបញ្ហាជំងឺមហារីក ទៅកាន់អ្នកទស្សនារាប់លាននាក់។ ទោះស្ថិតក្នុងស្ថានភាពជំងឺ ប៉ុន្តែលោក Van Gaal ប្រកាសថា នឹងនៅតែបន្តតួនាទីជាគ្រូក្រុមជម្រើសជាតិហូឡង់ដដែល។ នេះបើតាមការផ្សាយរបស់ទីភ្នាក់ងារព័ត៌មាន Reuters។
 

 «អំឡុងពេលខ្ញុំធ្វើជាគ្រូក្រុមជម្រើសជាតិ ខ្ញុំត្រូវចាកចេញទាំងយប់ក្រោយការប្រកួត ដើម្បីទៅមន្ទីរពេទ្យ ហើយកីឡាករមិនដែលរកខ្ញុំឃើញទេ ខណៈពួកគេគិតថាខ្ញុំមានសុខភាពល្អ»។ នេះការជាការអះអាងរបស់លោក Van Gaal មុនបន្ថែមថា លោក​មិន​ចង់​ប្រាប់​រឿងនេះ​ដល់​កីឡាករទេ ដ្បិតនឹងជះ​​ឥទ្ធិពល​មិនល្អលើ​ទម្រង់លេង​របស់​ពួក​គេ។
 

ក្នុងបទសម្ភាសនោះអ្នកចាត់ការហូឡង់រៀបរាប់ទៀតថា ជំងឺមហារីកក្រពេញប្រូស្តាតមិនអាចធ្វើឱ្យខ្លួនស្លាប់ទេ បើទោះធ្លាប់ចូលពេទ្យព្យាបាលច្រើនលើកក្តី។ Van Gaal មានទម្រង់ជំងឺធ្ងន់ធ្ងរ ព្រមទាំងទទួលការព្យាបាល២៥ដងរួចមកហើយ។ 
 

Van Gaal ដែលដឹកនាំ Man Utd ២រដូវកាល មុនក្លាយជាគ្រូហូឡង់ឆ្នាំ២០២១ បន្តថា៖ «ខ្ញុំទទួលការព្យាបាលពិសេសនៅក្នុងមន្ទីរពេទ្យ។ ដើម្បីលាក់បាំង ខ្ញុំត្រូវបានអនុញ្ញាតឱ្យចូលតាមទ្វារក្រោយ នៅពេលខ្ញុំណាត់ជួបគ្រូពេទ្យ។ ខ្ញុំទទួលបានការព្យាបាលដ៏អស្ចារ្យពីគ្រូពេទ្យ»។
 

Van Gaal ដែលធ្លាប់មានប្រវត្តិដឹកនាំក្រុមឱ្យលើកពានលីគជាមួយ Barcelona, ​​Ajax Amsterdam, Bayern Munich និង AZ Alkmaar បានជួយជម្រើសជាតិហូឡង់ឈ្នះកៅអីទៅកាន់ FIFA World Cup ឆ្នាំ២០២២ នៅប្រទេសកាតា ដោយស្ថិតក្នុងពូល A ជាមួយម្ចាស់ផ្ទះ អេក្វាទ័រ និងសេណេហ្គាល់៕