អ៊ុយក្រែន បានបន្ទោសរុស្ស៊ី ជុំវិញការវាយប្រហារស្ថានីយរថភ្លើងនៅក្នុងក្រុង Kramatorsk ដែលស្ថិតនៅតំបន់ដូណេត្យ និងបានបង្កឱ្យមានមនុស្សស្លាប់យ៉ាងហោចណាស់ ៥២នាក់ នៅថ្ងៃទី៨ ខែមេសា។ តាមការប៉ាន់ប្រមាណរបស់អភិបាលក្រុង Kramatorsk ប្រជាជនស៊ីវិលប្រមាណ ៤ពាន់នាក់ បានមានវត្តមាននៅទីនោះ ស្របពេលមានការវាយប្រហារ។ 

 

ទាក់ទិននឹងបញ្ហានេះ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បានជំរុញឱ្យពិភពលោកថ្កោសទោសឧក្រិដ្ឋកម្មសង្រ្គាមមួយនេះ និងជំរុញឱ្យផ្តល់អាវុធបន្ថែមមកក្រុងកៀវ។ 

 

«រាល់ការពន្យារពេលផ្តល់...អាវុធមកអ៊ុយក្រែន រាល់ការបដិសេធផ្តល់អាវុធឱ្យអ៊ុយក្រែន អាចមានន័យ ជួយរុស្ស៊ីជាងអ៊ុយក្រែន»។ ប្រមុខរដ្ឋអ៊ុយក្រែន បានសង្កត់ធ្ងន់បែបនេះ មុនអំពាវនាវឱ្យសហគមន៍អន្តរជាតិដាក់ទណ្ឌកម្មលើថាមពលរុស្ស៊ី រួមទាំងកាត់ផ្តាច់ប្រព័ន្ធធនាគាររុស្ស៊ីចេញពីប្រព័ន្ធសកល។ 

 

ការវាយប្រហារខាងលើ ត្រូវបានអធិការបតីអាល្លឺម៉ង់ លោក អូឡាហ្វ ស្ហុលស៍ និងនាយករដ្ឋមន្រ្តីអង់គ្លេស លោក បូរីស ចនសុន ថ្កោលទោសយ៉ាងខ្លាំង នៅក្នុងសន្និសីទសារព័ត៌មានរួមគ្នាមួយ នៅថ្ងៃទី៨ ខែមេសា នាទីក្រុងឡុងដ៍ ហើយថែមទាំងចាត់ទុកការវាយប្រហារនោះ ជាអំពើឃោរឃៅ និងមិនសមស្រប។ ក្នុងសន្និសីទដដែលនោះ មេដឹកនាំអង់គ្លេស បានប្តេជ្ញាផ្តល់ជំនួយអាវុធបន្ថែមទៀតដល់អ៊ុយក្រែន ដើម្បីទប់ការវាយប្រហាររុស្ស៊ី។ 

 

តាមការបញ្ជាក់របស់លោក Pavlo Kyrylenko អភិបាលតំបន់ដូណេត្យ ស្ថានីយរថភ្លើងត្រូវបានវាយប្រហារដោយមីស៊ីលបាលីស្ទិកចម្ងាយខ្លី Tochka U ដែលមានផ្ទុកគ្រាប់ជាចង្រ្កោម និងអាចបំផ្លាញក្នុងទំហំធំ។ អាវុធផ្ទុកគ្រាប់ជាចង្រ្កោមនេះ ត្រូវបានហាមឃាត់ដោយអនុសញ្ញាស្តីពីគ្រាប់បែបចង្ក្រោមឆ្នាំ២០០៨ ប៉ុន្តែរុស្ស៊ីមិនបានចុះហត្ថលេខាលើអនុសញ្ញានេះឡើយ៕