ជាតិ
នយោបាយជាតិ
សម្តេច ហ៊ុន សែន នឹងមានជំនួបជាមួយពលរដ្ឋខ្មែរនាអំឡុងបេសសកម្មនៅអាម៉េរិក និងស្វីស
×![]()
ដោយ: រួបរួម
នៅខែឧសភា ខាងមុខនេះ សម្តេចនាយករដ្ឋមន្ត្រី ហ៊ុន សែន នឹងទៅបំពេញបេសកកម្មជាបន្តបន្ទាប់នៅសហរដ្ឋអាម៉េរិក និងស្វីស។ នាអំឡុងពេលនោះ ប្រមុខរដ្ឋាភិបាល នឹងមានជំនួបសំណេះសំណាលជាមួយពលរដ្ឋខ្មែរផងដែរ។
តាមការអញ្ជើញរបស់លោកប្រធានាធិបតីអាម៉េរិក ចូ បៃឌិន សម្តេច ហ៊ុន សែន នឹងទៅចូលរួមកិច្ចប្រជុំពិសេសអាស៊ាន-អាម៉េរិក នៅរដ្ឋធានីវ៉ាស៊ីនតោន ថ្ងៃទី១២-១៣ ឧសភា។ ចេញដំណើរនៅថ្ងៃទី១០ ខែឧសភា សម្តេចនឹងមានជំនួបជាមួយពលរដ្ឋខ្មែរមួយចំនួននៅអាម៉េរិកនាពេលល្ងាចថ្ងៃដដែល។
ជំនួបទ្រង់ទ្រាយធំរវាងសម្តេច ហ៊ុន សែន និងពលរដ្ឋខ្មែរនៅអាម៉េរិក ប្រព្រឹត្តទៅថ្ងៃទី១១ ខែឧសភា។ បើតាមសម្តេច អ្នកចូលរួមនឹងមានប្រមាណតែ១០០០នាក់ប៉ុណ្ណោះ ដោយសារតែពិបាករកកន្លែងសម្រាប់ការជួបជុំ ហើយទីតាំងនៃជំនួបដាក់បានតែចំនួនប៉ុណ្ណឹង។
ក្រោយកិច្ចប្រជុំពីរថ្ងៃពេញ (ថ្ងៃទី១២-១៣ ឧសភា) សម្តេច ហ៊ុន សែន ត្រូវវិលត្រឡប់មកប្រទេសវិញ ហើយមកដល់កម្ពុជានាថ្ងៃទី១៥ ខែឧសភា។ នេះបើតាមការអះអាងរបស់សម្តេចដោយផ្ទាល់នាជំនួបសំណេះសំណាលជាមួយអត្តពលិក និងប្រតិភូកីឡាស៊ីហ្គេមលើកទី៣១ នៅកោះពេជ្រ កាលពីព្រឹកថ្ងៃទី២៨ ខែមេសា។
ឈានដល់យប់ថ្ងៃទី២០ ខែឧសភា សម្តេចនាយករដ្ឋមន្ត្រី ត្រូវចេញទៅបំពេញបេសកកម្មមួយទៀតនៅអឺរ៉ុប គឺវេទិកាសេដ្ឋកិច្ចពិភពលោកនៅទីក្រុង Davos ប្រទេសស្វីស។ នៅទីនោះ សម្តេចក៏ត្រៀមជួបប្រជាជនខ្មែរនៅអឺរ៉ុបផងដែរ។
សម្តេចបានបញ្ជាក់ថា ជំនួបនឹងប្រព្រឹត្តទៅនៅថ្ងៃទី២១ ខែឧសភា នៅក្រុងហ្សួរិច ដោយមានការផ្សាយផ្ទាល់តាមហ្វេសប៊ុកផងដែរ។ ថ្វីត្បិតតែជំនួបចំថ្ងៃនៃយុទ្ធនាការឃោសនាបោះឆ្នោតឃុំ-សង្កាត់ក៏ដោយ ប៉ុន្តែសម្តេចនឹងមិនឃោសនាអ្វីឡើយ។
«គ្រាន់តែជួបជាមួយប្រជាពលរដ្ឋប៉ុណ្ណោះ ព្រោះខានជួបពីរបីឆ្នាំហើយ។ ខ្ញុំតែងតែជួបពួកគាត់ ដូចជានៅព្រុចសែល ហ្សឺណែវ ជាដើម ហើយខានជួប ដោយសារតែកូវីដ-១៩»។ នេះជាការបញ្ជាក់របស់សម្តេច ហ៊ុន សែន៕
© រក្សាសិទ្ធិដោយ thmeythmey.com
