រដ្ឋាភិបាលបានអនុវត្តគោលនយោបាយឧបត្ថម្ភសាច់ប្រាក់ ដល់កម្មការិនីទាំងក្នុង និងក្រៅប្រព័ន្ធ និងមន្ត្រីសាធារណៈនៅពេលសម្រាលកូន ចាប់តាំងពីឆ្នាំ២០១៨មក។ សម្ដេច ហ៊ុន សែន បានបញ្ជាក់ថា នៅឆ្នាំ២០២១កន្លងមក ប.ស.ស. បានផ្ដល់ប្រាក់ឧបត្ថម្ភដល់ស្រ្តីសម្រាលកូន ចំនួន៦៥,៨៧១នាក់ ស្មើនឹងចំនួនកូន៦៦,៣៣៥នាក់ ដែលគិតជាទឹកប្រាក់សរុបចំនួន២៦.៥ប៊ីលានរៀល។

 

«បើគិតចាប់ពីឆ្នាំ២០១៨ រហូតដល់ឆ្នាំ២០២១ ស្រ្តីសម្រាលកូនមានចំនួន២៨២,០៧៣នាក់ ដោយចំណាយថវិកាសរុបចំនួន១១៣.៦ប៊ីលានរៀល (ប្រមាណ២៧.៧លានដុល្លារអាមេរិក)»។ នេះបើតាមសារលិខិតសម្ដេច ហ៊ុន សែន។
 

សម្រាប់ការអនុវត្តគោលនយោបាយឧបត្ថម្ភសាច់ប្រាក់នេះ រដ្ឋាភិបាល បានសម្រេចឱ្យកម្មការិនីក្រោយសម្រាលកូនបាន១នាក់ ៤០ម៉ឺនរៀល។ បើសម្រាលបានកូនភ្លោះ រដ្ឋផ្ដល់ប្រាក់៨០ម៉ឺនរៀល ។ ហើយបើបានភ្លោះ៣នាក់វិញ ពួកគេទទួលបាន១,២លានរៀល ព្រមទាំងទទួលបានថវិកាបន្ថែម ៥លានរៀល ពីសម្ដេច ហ៊ុន សែន និងភរិយា ទៀតផង។ 
 

មិនតែប៉ុណ្ណោះ រដ្ឋាភិបាល តាមរយៈក្រសួងការងារ និងបណ្ដុះបណ្ដាលវិជ្ជាជីវៈ បានសម្រេចឱ្យកម្មការិនីទទួលបានប្រាក់ឈ្នួល១២០ភាគរយ និងឈប់សម្រាករយៈពេល៣ខែ ក្នុងពេលសម្រាលកូន៕