សង្រ្គាមនៅអ៊ុយក្រែន បានធ្វើឱ្យបណ្តាប្រទេសអឺរ៉ុបដាក់ទណ្ឌកម្ម និងស្វះស្វែងរកទីផ្សារប្រភពថាមពលផ្សេង ក្រៅពីរុស្ស៊ីដែលជាអ្នកផ្គត់ផ្គង់ដ៏សំខាន់។ អាល្លឺម៉ង់ជាប្រទេសមួយ ដែលពឹងផ្អែកលើប្រភពថាមពលពីរុស្ស៊ីខ្លាំង ក៏ស្វះស្វែងបញ្ចប់ការពឹងផ្អែកនេះដែរ។ 

 

ក្នុងកិច្ចសម្ភាសជាមួយសារព័ត៌មាន The Indian Express មុនជំនួបជាមួយនាយករដ្ឋមន្រ្តីឥណ្ឌា នារិន្ទ្រា ម៉ូឌី នៅក្រុងបែរឡាំង លោកអធិការបតីអាល្លឺម៉ង់ អូឡាហ្វ ស្ហូល លើកឡើងថា អាល្លឺម៉ង់ នឹងអនុវត្តគោលនយោបាយដ៏មានឥទ្ធិពលរបស់ខ្លួន ដើម្បីកាត់បន្ថយការពឹងផ្អែកលើការនាំចូលប្រេងផូស៊ីលពីរុស្ស៊ីមានធ្យូងថ្ម ប្រេង និងហ្គាស។ 

 

«យើងនឹងបញ្ឈប់ការនាំចូលធ្យូងថ្មពីរុស្ស៊ីនៅរដូវក្តៅនេះ និងផ្អាកនាំចូលប្រេងពីរុស្ស៊ីនៅដំណាច់ឆ្នាំ២០២២»។ លោក អូឡាហ្វ ស្ហូល បានសង្កត់ធ្ងន់បែបនេះ ដោយបន្ថែមថា អាល្លឺម៉ង់ នឹងកាត់បន្ថយការនាំចូលហ្គាសពីរុស្ស៊ីឱ្យបានច្រើនបំផុត។ រដូវក្តៅរបស់អាល្លឺម៉ង់ មានចាប់ពីចុងខែមីនា រហូតដល់ចុងខែតុលា។ 

 

ការកាត់បន្ថយការពឹងផ្អែកប្រភពថាមពលពីរុស្ស៊ីបែបនេះ ធ្វើឡើងក្នុងគោលបំណងដាក់សម្ពាធលើក្រុងមូស្គូ និងកាត់បន្ថយចំណូលទៅរដ្ឋាភិបាលប្រទេសមួយនេះ ដើម្បីកុំឱ្យបង្វែរទឹកប្រាក់ទាំងនោះ យកមកធ្វើសង្រ្គាមនៅអ៊ុយក្រែន។

 

នៅក្នុងឆ្នាំ២០២១ អាល្លឺម៉ង់ បាននាំចូលធ្យូងថ្មប្រមាណ ១៨លានតោនពីរុស្ស៊ី សម្រាប់រោងចក្រដែក និងរោងចក្រផលិតថាមពល។ ទន្ទឹមនេះ អាល្លឺម៉ង់ នាំចូលប្រេងឆៅពីរុស្ស៊ីទំហំ៣៩,៥ភាគរយនៃទំហំនាំចូលប្រេងឆៅសរុបរបស់ខ្លួនផង ខណៈហ្គាសមានទំហំ២៩,២ពាន់លានម៉ែត្រគូប នៅក្នុងឆ្នាំ ២០២០។ 

 

ស្របគ្នានេះ មេដឹកនាំអាល្លឺម៉ង់រូបនេះ ក៏បានអំនាវនាវឱ្យលោក វ្ល៉ាឌីមៀ ពូទីន ប្រធានាធិបតីរុស្ស៊ីបញ្ឈប់ប្រតិបត្តិការយោធាពិសេសនៅអ៊ុយក្រែនផង។ បើតាមលោក អូឡាហ្វ ស្ហូល ប្រទេសជាច្រើនបានរួមគ្នាដាក់ទណ្ឌកម្មលើរុស្ស៊ីមិនថាទណ្ឌកម្មទាំងនោះ បានប៉ះពាល់មកលើខ្លួនវិញក៏ដោយ។ អធិការបតីអាល្លឺម៉ង់ បានព្រមានថា សង្រ្គាមនៅអ៊ុយក្រែន បានបង្កឱ្យមានផលវិបាកមកលើសេដ្ឋកិច្ចសកលយ៉ាងខ្លាំង ហើយថែមប៉ះពាល់ដល់សន្តិសុខស្បៀងអាហារ និងស្រូវសាលីថែមទៀត។ 

 

ក្នុងថ្ងៃទី២ ខែឧសភា រដ្ឋមន្រ្តីថាមពលអឺរ៉ុប នឹងជួបពិភាក្សាគ្នាជាបន្ទាន់មួយ ដើម្បីជជែកពីស្វែងរកទីផ្សារប្រភពថាមពលបន្ថែម និងការកាត់បន្ថយការនាំចូលប្រភពថាមពលពីរុស្ស៊ី  ដែលកន្លងមក បានផ្អាកការផ្គត់ផ្គង់ហ្គាសឱ្យប៉ូឡូញ និងប៊ុលហ្ការី៕