បន្ទាប់ពីចេញពីវៀតណាម លោក គីស៊ីដា ហ្វូមីអូ នាយករដ្ឋមន្រ្តីជប៉ុន បានធ្វើទស្សនកិច្ចនៅថៃ ដែលជាគោលដៅចុងក្រោយនៅតំបន់អាស៊ីអាគ្នេយ៍។ ក្នុងដំណើរទស្សនកិច្ចនៅថៃលើកដំបូង ចាប់តាំងពីកាន់អំណាច លោក គីស៊ីដា និងលោកប្រយុទ្ធ ចន្ទអូចា ប្រមុខរដ្ឋាភិបាលថៃ បានចុះកិច្ចព្រមព្រៀងផ្ទេរគ្រឿងបរិក្ខារការពារជាតិ ​និងគាំទ្រឱ្យអ្នកវិនិយោគជប៉ុន មករកស៊ីនៅថៃ។ 

 

«វានឹងជួយកែលម្អប្រព័ន្ធការពារជាតិ និងគាំទ្រការវិនិយោគពីជប៉ុន...ដែលនេះជាគោលដៅដ៏សំខាន់សម្រាប់ថៃ»។ លោក ប្រាយុទ្ធ បានសង្កត់ធ្ងន់បែបនេះនៅក្នុងសេចក្តីថ្លែងការណ៍រួមជាមួយសមភាគីជប៉ុន ដោយបន្ថែមថា លោកបានពិភាក្សាជាមួយមេដឹកនាំជប៉ុនជុំវិញការកែលម្អច្រវាក់ផលិតកម្ម រួមទាំងសេចក្តីព្រាងលើភាពជាដៃគូសេដ្ឋកិច្ចរយៈពេល ៥ឆ្នាំ ជាមួយជប៉ុន។

 

ចំណែកសមភាគីជប៉ុន លោក គីស៊ីដា បានចាត់ទុក ការចុះកិច្ចព្រមព្រៀងផ្ទេរបច្ចេកវិទ្យា និងគ្រឿងបរិក្ខារការពារជាតិរវាងប្រទេសទាំងពីរ ជាជំហានដ៏សំខាន់ក្នុងការពង្រីកកិច្ចសហប្រតិបត្តិការទ្វេភាគី ហើយភាគីទាំងពីរនឹងពិចារណាប្រភេទបរិក្ខារសម្រាប់ផ្ទេរនោះ។ កិច្ចព្រមព្រៀង គឺជាផ្នែកមួយនៃការពង្រឹងទំនាក់ទំនងរបស់រដ្ឋាភិបាលក្រុងតូក្យូ ជាមួយបណ្តាប្រទេសអាស៊ីអាគ្នេយ៍ ស្របពេលចិន កំពុងពង្រីកឥទ្ធិពលខ្លួនយ៉ាងខ្លាំង។ 

 

តាមរយៈទស្សនកិច្ចនេះ ជប៉ុន បានស្វះស្វែងរកការគាំទ្រលើយុទ្ធសាស្រ្តឥណ្ឌូ-ប៉ាស៊ីហ្វិក សេរី និងបើកចំហផង។ ក្នុងសន្និសីទសារព័ត៌មានរួមគ្នា​ មេដឹកនាំជប៉ុន-ថៃ បានយល់ព្រមបន្តការសម្របសម្រួល ដើម្បីធ្វើឱ្យយុទ្ធសាស្រ្តឥណ្ឌូ-ប៉ាស៊ីហ្វិកឈានដល់គោលដៅ។ 

 

ទន្ទឹមនេះ ដើម្បីជួយសេដ្ឋកិច្ចថៃឱ្យងើបចេញពីជំងឺកូវីដ-១៩ នាយករដ្ឋមន្រ្តីជប៉ុន បានប្រកាសផ្តល់កម្ចីក្នុងទំហំទឹកប្រាក់៣៨៥លានដុល្លារ ដល់រដ្ឋាភិបាលថៃ និងប្រាប់ឧបត្ថម្ភជិត ៤លានដុល្លារសម្រាប់ការធ្វើចត្តាឡីស័ក។ 

 

ក្រៅពីកិច្ចសហប្រតិបត្តិការខាងលើ មេដឹកនាំថៃ និងជប៉ុន ក៏បានពិភាក្សាជុំវិញការឈ្លានពានរបស់រុស្ស៊ីនៅអ៊ុយក្រែនផងដែរ។ តាមរយៈសន្និសីទរួមគ្នា លោក គីស៊ីដា និងលោក ប្រាយុទ្ធ បានជំទាស់ការបំពានដែនអធិបតេយ្យ បូរណភាពដែនដីនៅក្នុងតំបន់ រួមទាំងការប្រើប្រាស់កម្លាំង ដើម្បីផ្លាស់ប្តូរស្ថានភាពបច្ចុប្បន្ន (Status Quo) និងការប្រើប្រាស់អាវុធប្រល័យលោក (WMD)។ លោក ប្រាយុទ្ធ និងលោក គីស៊ីដា បានយល់ព្រមផ្តល់ជំនួយទៅអ៊ុយក្រែន ដើម្បីជួយប្រជាជនដែលកំពុងរងគ្រោះ ដោយសារតែសង្រ្គាម។ 

 

សូមបញ្ជាក់ថា ​បន្ទាប់ពីបញ្ចប់ដំណើរទស្សនកិច្ចនៅថៃ លោក គីស៊ីដា នឹងបន្តធ្វើដំណើរនៅតំបន់អឺរ៉ុបម្តង។ ក្នុងទស្សនកិច្ចនៅអង់គ្លេស និងអ៊ីតាលី ពាណិជ្ជកម្ម និងសង្រ្គាមអ៊ុយក្រែន នឹងក្លាយជារបៀបវារៈដ៏សំខាន់ ដែលលោក គីស៊ីដា នឹងលើកយកមកជជែកជាមួយមេដឹកនាំប្រទេសទាំងនោះ៕