អ៊ុយក្រែន ជាប្រទេសមួយ ដែលនាំចេញស្រូវសាលី ពោត និងស្រូវបាលីជាច្រើន ប៉ុន្តែដោយសារសង្រ្គាមផ្ទុះឡើង វាធ្វើឱ្យការផលិតស្បៀងអាហារអ៊ុយក្រែន ត្រូវកាត់បន្ថយ ខណៈស្បៀងអាហារពិភពលោក កំពុងរងគ្រោះដោយសារជំងឺកូវីដ-១៩ ស្រាប់។ ទាក់ទិននឹងបញ្ហានេះ មេដឹកនាំបារាំង និងឥណ្ឌា បានបង្ហាញក្តីបារម្ភ និងប្តេជ្ញារួមគ្នាដោះស្រាយ។ 

 

«បារាំង និងឥណ្ឌា បានបង្ហាញក្តីបារម្ភអំពីសន្តិសុខស្បៀងអាហារសកលធ្លាក់ចុះដុនដាប ស្របពេលជំងឺកូវីដ-១៩ កំពុងអុកឡុកស្រាប់ ជាពិសេសនៅក្នុងប្រទេសកំពុងអភិវឌ្ឍ»។ វិមាន Elysee បានចេញសេចក្តីថ្លែងការណ៍បែបនេះជុំវិញជំនួបប្រធានាធិបតីបារាំង អេម៉ានុយអែល ម៉ាក្រុង និងនាយករដ្ឋមន្រ្តីឥណ្ឌា នា​រិ​ន្ទ្រា ម៉ូ​ឌី នៅក្នុងថ្ងៃទី៤ ខែឧសភា។ 

 

មេដឹកនាំប្រទេសទាំងពីរ បានប្តេជ្ញាសម្របសម្រួល និងឆ្លើយតបបែបពហុភាគី ដើម្បីលើកឡើងពីហានិភ័យនៃវិបត្តិស្បៀងអាហារ ដែលបង្កដោយជម្លោះនៅអ៊ុយក្រែន រួមទាំងពិភាក្សាពីគំនិតផ្តួចផ្តើមលើបេសកកម្មស្តារកសិកម្ម និងអាហារឡើងវិញផង។ 

 

ក្នុងសេចក្តីថ្លែងការណ៍ដដែលនោះ ប្រធានាធិបតីបារាំង និងនាយករដ្ឋមន្រ្តីឥណ្ឌា ក៏បានបង្ហាញការសោកស្តាយចំពោះជម្លោះនៅតែបន្ត និងវិបត្តិមនុស្សធម៌ ដែលកើតមានផង។ ក្នុងន័យនេះ មេដឹកនាំបារាំង និងឥណ្ឌា បានរិះគន់សកម្មភាពដែលបង្កឱ្យស្លាប់ប្រជាជនស៊ីវិល និងជំរុញឱ្យមានបទឈប់បាញ់ភ្លាមៗ រួមទាំងចូលតុចរចា ដើម្បីស្វែងរកដំណោះស្រាយ។ យ៉ាងណាមិញ លោក ម៉ូឌីនៅតែរក្សាជំហរដូចលើកមុនដដែល ដោយមិនរិះគន់ការឈ្លានពានរបស់រុស្ស៊ីឡើយ។ 

 

មកទល់ពេលនេះ ប្រជាជនអ៊ុយក្រែន ប្រមាណ ៥,៧លាននាក់ បានភៀសខ្លួនទៅប្រទេសជិតខាងដូចជា ប៉ូឡូញ រូម៉ានី រុស្ស៊ី និងហុងគ្រីជាដើម។ តាមទិន្នន័យរបស់ស្នងការជាន់ខ្ពស់ទទួលបន្ទុកសិទ្ធិមនុស្សអង្គការសហប្រជាជាតិ ប្រជាជនស៊ីវិលអ៊ុយក្រែនយ៉ាងហោចណាស់ ៣ពាន់បានបាត់បង់ជីវិត ខណៈរបួសមានប្រមាណ ៣៣១៦នាក់៕