ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ នឹងធ្វើឡើងនៅថ្ងៃទី៥មិថុនា ឆ្នាំ២០២២នេះ ដោយចាប់ផ្ដើមពីម៉ោង៧ព្រឹក ដល់ម៉ោង៣រសៀល។ ការបោះឆ្នោតនេះ កាន់តែខិតជិតមកដល់ហើយ គ.ជ.ប បានឲ្យពលរដ្ឋត្រៀមឯកសារពាក់ព័ន្ធដើម្បីទៅចូលរួមបោះឆ្នោត តាមពេលកំណត់។ 

 

សេចក្ដីអំពាវនាវរបស់ គ.ជ.ប ដែលចេញថ្ងៃទី១៦ឧសភា ប្រាប់ឲ្យពលរដ្ឋដែលមានឈ្មោះក្នុងបញ្ជីបោះឆ្នោតឆ្នាំ២០២១ទាំងអស់ ត្រៀមអត្តសញ្ញាណប័ណ្ណសញ្ជាតិខ្មែរ ដែលមានសុពលភាព ឬឯកសារបញ្ជាក់អត្តសញ្ញាណ ដើម្បីចូលរួមបោះឆ្នោត។ ចំពោះពលរដ្ឋ ដែលមានឈ្មោះក្នុងបញ្ជីបោះឆ្នោតហើយ ប៉ុន្តែ អត្តសញ្ញាណប័ណ្ណអស់សុពលភាព បាត់ ខូច ឬមិនទាន់ទទួលបាន ត្រូវប្រញាប់ស្នើសុំឯកសារបញ្ជាក់អត្តសញ្ញាណបម្រើឲ្យការបោះឆ្នោត ពីគណៈកម្មការឃុំ សង្កាត់រៀបចំការបោះឆ្នោត ឬអាជ្ញាធរឃុំសង្កាត់ ឲ្យបានទាន់ពេល។ 

 

ជាមួយគ្នាដែរ គ.ជ.ប បានបញ្ជាក់ឲ្យដឹងថា ការចេញឯកសារបញ្ជាក់អត្តសញ្ញាណបម្រើឲ្យការបោះឆ្នោត បានចាប់ផ្ដើមពីថ្ងៃទី ៥ ឧសភា ដល់ ៣ មិថុនា ឆ្នាំ២០២២។ គ.ជ.ប បានអំពាវនាវបន្ថែមដល់អាជ្ញាធរមូលយ៉ាងដូច្នេះ៖ «ប្រធានគណៈកម្មការឃុំ សង្កាត់រៀបចំការបោះឆ្នោត មេឃុំ ចៅសង្កាត់ និងមេភូមិ ត្រូវធ្វើការផ្សព្វផ្សាយសេចក្ដីអំពាវនាវនេះ ឲ្យបានទូលំទូលាយ ដើម្បីជំរុញឲ្យប្រជាពលរដ្ឋ មកស្នើសុំឯកសារបញ្ជាក់អត្តសញ្ញាណបម្រើឲ្យការបោះឆ្នោត បានទាន់ពេលវេលា ដោយឥតបង់ថ្លៃ»។ 

 

ទន្ទឹមនឹងនេះ គ.ជ.ប សង្ឈឹមថា អាជ្ញាធរមូលដ្ឋាន នឹងយកចិត្តទុកដាក់ជំរុញពលរដ្ឋ និងរៀបចំឯកសារដល់ប្រជាជនស្របតាមនីតិវិធី៕