«ភ្លាមនោះ បើសិនជាខ្ញុំបណ្ដោយ អ្នកគប់ខ្ញុំអាចមានគ្រោះថ្នាក់ហើយ»។ នេះជាការលើកឡើងរបស់សម្ដេច ហ៊ុន សែន ដែលបានបន្ថែមថា សម្ដេចមានកម្លាំងផ្ទាល់ខ្លួន រួមទាំងកម្លាំងនៅអាម៉េរិក និងទីក្រុងភ្នំពេញ ដែលចង់តវ៉ាឱ្យអាម៉េរិក ចេញមុខដោះស្រាយលើករណីនេះ ប៉ុន្តែសម្ដេច បានហាមពួកគេមិនឱ្យធ្វើសកម្មភាពឡើយ។ សម្ដេច ហ៊ុន សែន បានសង្កត់ធ្ងន់ថា កម្លាំងគាំទ្រសម្ដេច នៅទីក្រុងភ្នំពេញ បានរៀបចំសកម្មភាពទៅតវ៉ានៅមុខស្ថានទូតអាម៉េរិកប្រចាំកម្ពុជា ប៉ុន្តែសម្ដេច បានបញ្ជាឱ្យពួកគេ ផ្អាកសកម្មភាពទាំងនេះវិញ។
 

«(កម្លាំង)នៅ‍(អាម៉េរិក)ឯណោះ ក៏អត់ឱ្យធ្វើអី នៅ(ភ្នំពេញ)ឯណេះក៏អត់ឱ្យធ្វើអី»។ នេះជាការបញ្ជាក់របស់សម្ដេច ហ៊ុន សែន ដែលបានចោទជាសំនួរទៀតថា ៖ «តើសហរដ្ឋអាម៉េរិក ចាត់ទុកថា នេះជាសិទ្ធិបញ្ចេញមតិ ឬហិង្សា?» ។
 

ក្នុងន័យនេះ ប្រមុខរដ្ឋាភិបាលកម្ពុជា បានសង្កត់ធ្ងន់ថា បើអាម៉េរិក នៅតែចាត់ទុកការគប់ស្បែកជើងមកលើសម្ដេច ជាសិទ្ធិបញ្ចេញមតិនោះ នៅលើពិភពលោកលែងមានច្បាប់ទម្លាប់ត្រឹមត្រូវទៀតហើយ ។ មិនតែប៉ុណ្ណោះសកម្មភាពគប់ស្បែកជើង នឹងកើតមានឡើងគ្រប់ទីកន្លែង រាប់ទាំងនៅកម្ពុជា ។ ប្រមុខរដ្ឋាភិបាលកម្ពុជា ដែលមិនពេញចិត្តទង្វើរបែបនេះមកលើខ្លួន បាននិយាយបែបផ្លែផ្កាវិញថា ៖«បើសិនជាអាម៉េរិក ចាត់ទុករឿងនេះ (ការគប់ស្បែកជើង) វាជាសិទ្ធិបញ្ចេញមតិ ប្រហែលជារឿងនេះ នឹងកើតសឹងគ្រប់ប្រទេសទាំងអស់ រាប់ទាំងកម្ពុជា។ អ៊ីចឹងក្រុមអ្នកប្រឆាំង ហ៊ុន សែន ទាំងប៉ុន្មានត្រៀមត្រូវក្បាលនឹងស្បែកជើង។ រឿងនេះ មិនមែនរឿងតូចតាចទេ។ សូមសហរដ្ឋអាម៉េរិក គិតគូរឱ្យបានច្បាស់ »។

 

 

កាលពីខែធ្នូ ឆ្នាំ២០០៨ អតីតប្រធានាធិបតីអាម៉េរិក George W. Bush ក៏ត្រូវបានអ្នកសារព័ត៌មាន គប់២ស្បែកជើង នៅអំឡុងពេលធ្វើសន្និសីទកាសែត ក្នុងទីក្រុងបាដាដ ប្រទេសអ៊ីរ៉ាក់ផងដែរ។ ដោយឡែក ប្រធានាធិបតីបារាំង Emmanuel Macron ក៏ធ្លាប់ត្រូវពលរដ្ឋទះកំផ្លៀងដែរ កាលពីខែមិថុនា ឆ្នាំ២០២១។