ការលើកឡើងខាងលើរបស់ប្រធានបគណបក្សកាន់អំណាច ធ្វើឡើងស្របពេលដែលកម្ពុជា កំពុងបើកយុទ្ធនាការឃោសនារកសំឡេងឆ្នោត ជ្រើសរើសក្រុមប្រឹក្សា ឃុំ សង្កាត់ អណត្តិទី៥ ឆ្នាំ២០២២។ ក្នុងសារលិខិត ដែលចេញនៅថ្ងៃទី២១ ខែឧសភា ឆ្នាំ២០២២ ប្រមុខគណបក្សដឹកនាំរដ្ឋាភិបាល បន្ថែមទៀតថា ការអនុវត្តគោលនយោបាយឃុំ សង្កាត់ ក្នុងអាណត្តិទី៤ ប្រជាជនគ្រប់រូបទទួលបានផលប្រយោជន៍ទាំងក្នុងការបង្កើតមុខរបរ និងការងារ។ 
 

ក្រៅពីមុខរបរ សម្តេច បានរំលេចពីការមិនយកពន្ធលើដីកសិកម្ម ដែលបង្កបង្កើនផលជាលក្ខណៈគ្រួសារ, ការកសាងហេដ្ឋារចនាសម្ព័ន្ធគមនាគមន៍ ក្នុងឃុំ សង្កាត់, ការពង្រីកសន្តិសុខស្បៀង និងអាហាររូបត្ថម្ភ, ការប្រើប្រាសទឹកស្អាត និងថាមពលអគ្គិសនី។ល។ ជាមួយគ្នានេះ សម្តេច បានបន្ថែមថា អំឡុងជំងឺរាតត្បាតជំងឺកូវីដ-១៩ ប្រជាជនគ្រប់មូលដ្ឋានទទួលបានការចាក់វ៉ាក់សាំងការពារដោយមិនគិតថ្លៃ ព្រមទាំងទទួលបានការគាំពារ និងឧបត្ថម្ភពីរដ្ឋាភិបាលទាន់ពេលវេលាផងដែរ។ 
 

គួររឭកផងដែរថា ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ នឹងធ្វើឡើងនៅថ្ងៃទី៥មិថុនា ឆ្នាំ២០២២ ខាងមុខនេះ ដោយចាប់ផ្ដើមពីម៉ោង៧ព្រឹក ដល់ម៉ោង៣រសៀល។ គណបក្សនយោបាយទាំង១៧ កំពុងធ្វើយុទ្ធនាការឃោសនាបោះឆ្នោត យ៉ាងគគ្រឹកគគ្រេង តាមបណ្ដារាជធានី និងខេត្ត។ ការឃោសនាបោះឆ្នោតនេះទៀតសោត មានរយៈពេល១៤ថ្ងៃ គឺចាប់ពីថ្ងៃទី២១ ឧសភា ដល់ថ្ងៃទី៣ មិថុនា ឆ្នាំ២០២២៕