ជុំវិញនៃការនាំចេញផ្លែមៀនស្រស់ទៅចិននេះ លោក សួន ជុំ អនុប្រធានសមាគមមៀនប៉ៃលិន បានបញ្ជាក់ប្រាប់សារព័ត៌មានថ្មីៗថា កាលពីថ្ងៃចុងខែឧសភា ឆ្នាំ២០២២ ក្រុមហ៊ុនចិន ជីង គួរ យួង បានសម្រេចដាក់ផែនការប្រមូលផ្លែមៀនពីកសិករ ចាប់ខែសីហាតទៅ ក្នុងតម្លៃ ៣ ៦០០រៀល ក្នុងមួយគីឡូក្រាម។  តម្លៃនេះ ​នឹងកើនដល់ ៣ ៨០០រៀល ក្នុងមួយគីឡូក្រាម នៅក្នុងខែធ្នូ ហើយកើនដល់ ៤ ០០០រៀល ចាប់ខែមករា ​ឆ្នាំ២០២៣ និងឈានដល់ ៤ ៥០០រៀល ក្នុងមួយគីឡូក្រាម​​ ចាប់ខែមីនា ដល់ឧសភា ឆ្នាំ២០២៣។ លោក បាននិយាយដូច្នេះ៖​«មៀនប៉ៃលិន ដែលចិនបញ្ជាទិញនោះ នឹងត្រូវបានសម្លាប់មេរោគ វេចខ្ចប់ និងរក្សាទុកក្នុងទូត្រជាក់​នៅក្នុងខេត្តប៉ៃលិនយើងហ្នឹង ហើយនាំចូលទីផ្សារចិនតែម្តង ដោយយើងលែងពឹងដង្ហើមប្រទេសថៃ ទៀតហើយ»។​

 

បើតាមលោក សួន ជុំ ផ្លែមៀនដែលកសិករដាំដុះនៅក្នុងខេត្តប៉ៃលិន បាត់បង និងបន្ទាយមានជ័យ គឺមានចំនួនប្រមាណ៣០០តោនក្នុងមួយ ដែលអាចនាំទៅចិន។ លោកបន្តរៀបរាប់បែបនេះថា​៖ «ខ្ញុំដឹងថា នៅប៉ៃលិន​ បាត់ដំបង និងបន្ទាយមានជ័យយើងនេះ ទំហំនៃមៀនដែលអាចនាំចេញបានហ្នឹង! ខ្ញុំមើលទៅប្រហែលមួយថ្ងៃបានជិត៣០០តោន ព្រោះពេលមុនកូវីដ-១៩ ពួកខ្ញុំនាំចេញឱ្យក្រុមហ៊ុនចិន នៅប្រទេសថៃ បានជាង១០០តោនក្នុងមួយថ្ងៃ​ ហើយក៏មានអ្នកផ្សេងនាំចេញទៀតផងដែរ។ អ៊ីចឹង ខ្ញុំមើលទៅ​ ខេត្តទាំងនេះ មានសមត្ថភាពផលិតមៀនសម្រាប់នាំចេញ គឺក្រោម២០០តោនទេក្នុងមួយថ្ងៃ»។​

 

បច្ចុប្បន្ន កម្ពុជាមានផ្ទៃដីដាំដុះមៀនប៉ៃលិន(តាង៉ែន) ទូទាំងប្រទេស សរុប ១៣ ៦០៨ហិកតា នៅក្នុងខេត្តចំនួន១៤ ។ ដោយឡែក ខេត្តដែលមានកសិករដាំដុះប្រភេទនេះ ច្រើនជាងគេ គឺខេត្តប៉ៃលិន បាត់ដំបង រតនគិរី និងបន្ទាយមានជ័យ។ ក្នុងចំណោមផ្ទៃដីដាំដុះមៀនប៉ៃលិន ឬតាង៉ែនទាំងនេះ គឺមាន ៦ ៩២៧ហិកតា​ ដែលកសិករទទួលបានទិន្នផលចំនួន ១១ម៉ឺនតោន នៅក្នុងឆ្នាំ២០២១​៕ 

​