ក្នុងបទសម្ភាសតាមទូរស័ព្ទជាមួយទីភ្នាក់ងារព័ត៌មាន Reuters នៅថ្ងៃទី១៨​ ខែកក្កដា លោកវេជ្ជបណ្ឌិត Anthony Fauci វ័យ៨១ឆ្នាំ បានបញ្ជាក់ថា លោកនឹងចូលនិវត្តន៍នៅពេលអាណត្តិរបស់ លោក ចូ បៃឌិន បញ្ចប់ដែរ។

 

«ខ្ញុំមិនទាន់បានប្រកាសជាផ្លូវការពីការចូលនិវត្តន៍របស់ខ្ញុំនោះឡើយ ក៏ប៉ុន្តែខ្ញុំនឹងអាចនឹងចូលនិវត្តន៍​ចាប់ពីពេលនេះរហូតដល់ពេលដាច់អាណត្តិរបស់លោក ចូ បៃឌិន ក្នុងនាមជាប្រធានាធិបតី»។ លោក Fauci បានបញ្ជាក់បែបនេះ។

 

យ៉ាងណាក្ដី លោក Fauci ក៏មិនទាន់ច្បាស់នឹងឈប់បម្រើការងារ​នៅ​ពេល​ជាក់​លាក់​ណា​មួយ​នោះ​ឡើយ ព្រោះលោកនៅចង់បន្តការងារដោយសារតែនៅមានកម្លាំង និង​មានចំណង់​ចំណូលចិត្តបម្រើ​ការងារ​ចំពោះសុខភាពសាធារណៈអាម៉េរិក និងសុខភាពសាធារណៈសកល។

 

លោក Fauci បានក្លាយជានាយកវិទ្យាស្ថានជាតិនៃអាលែកហ្សី និងជំងឺឆ្លង (NIAID) ចាប់តាំងពីឆ្នាំ ១៩៨៤ មកដល់បច្ចុប្បន្ន ដោយលោកបម្រើការងារឱ្យប្រធានាធិបតីអាម៉េរិក៧នាក់មកក្និងតំណែង។ នៅឆ្នាំ២០២០ វេជ្ជបណ្ឌិតរូបនេះ បានដើរតួយ៉ាងសំខាន់បំផុតនៃកិច្ចខិតខំរបស់រដ្ឋាភិបាលអាម៉េរិកក្នុង​ការទប់ស្កាត់ជំងឺកូវីដ-១៩ ក្រោមរដ្ឋបាលលោក ដូណាល់ ត្រាំ ទោះប្រទាំងប្រទើសគ្នាលើវិធានការជាច្រើនក្ដី៕