ទីម័រខាងកើត ចង់ជំរុញទំនាក់ទំនងពាណិជ្ជកម្មជាមួយឥណ្ឌូណេស៊ី ហើយចង់ចូលជាសមាជិកអាស៊ាននៅឆ្នាំក្រោយ ពេលឥណ្ឌូណេស៊ីក្លាយជាប្រធានអាស៊ាន។ ប្រធានាធិបតីទីម័រខាងកើត Jose Ramos-Horta លើកឡើងបែបនេះ នៅថ្ងៃទី១៩ ខែកក្កដា ក្នុងដំណើរទស្សនកិច្ចនៅឥណ្ឌូណេស៊ី។
ប្រធានាធិបតីទីម័រខាងកើត Jose Ramos-Horta នៅថ្ងៃទី១៩ ខែកក្កដា បានធ្វើដំណើរទៅឥណ្ឌូណេស៊ី ដែលជាទស្សនកិច្ចលើកដំបូង ក្រោយលោកជាប់ឆ្នោតជាប្រធានាធិបតីកាលពីខែមេសា។ លោក Ramos-Horta បានជាប់ឆ្នោតជាប្រធានាធិបតីទីម័រខាងកើតជាលើកទី២ក្នុងឆ្នាំ២០២២ ខណៈអាណត្តិមុនចាប់ពីឆ្នាំ២០០៧ ដល់ឆ្នាំ២០១២។
ទាក់ទិននឹងដំណើរទស្សនកិច្ចនេះ លោក Ramos-Horta បង្ហាញបំណងជំរុញទំនាក់ទំនងពាណិជ្ជកម្មរវាងប្រទេសទាំងពីរ និងបង្ហាញបំណងចង់ចូលជាសមាជិកអាស៊ាននាឆ្នាំក្រោយពេលឥណ្ឌូណេស៊ីធ្វើជាប្រធានអាស៊ានតែម្ដង។
«ទីម័រខាងកើត ដែលជាផ្នែកមួយនៃតំបន់អាស៊ីអាគ្នេយ៍ បានបំពេញតម្រូវការជាច្រើនដែលចាំបាច់សម្រាប់ដំណើរការសេដ្ឋកិច្ច និងលទ្ធិប្រជាធិបតេយ្យ។ ដូច្នេះទីម័រខាងកើតនឹងក្លាយជាសមាជិកអាស៊ានដែលបំពេញការងារបានល្អ»។ ប្រធានាធិបតីទីម័រខាងកើតថ្លែងបែបនេះ ក្នុងជំនួបទ្វេភាគីជាមួយប្រធានាធិបតីឥណ្ឌូណេស៊ី ចូកូ វីដូដូ ។
លោក Ramos-Horta សង្ឃឹមថា ប្រទេសវ័យក្មេងរបស់លោកអាចចូលជាសមាជិកអាស៊ាន ពេលឥណ្ឌូណេស៊ីធ្វើជាម្ចាស់ផ្ទះកិច្ចប្រជុំអាស៊ាននៅឆ្នាំក្រោយ។ នេះបើតាមទីភ្នាក់ងារព័ត៌មាន Reuters។ ប្រធានាធិបតីទីម័រខាងកើតបានលើកឡើងពីបំណងបង្កើនទំនាក់ទំនងពាណិជ្ជកម្មទ្វេភាគីរវាងទីម័រខាងកើត និងឥណ្ឌូណេស៊ីផងដែរ។
«យើងបានយល់ព្រមបង្កើនទំនាក់ទំនងពាណិជ្ជកម្មរវាងប្រទេសទាំងពីរ»។ លោក វីដូដូ តបបែបនេះក្នុងជំនួបវិមាន Istana Bogor ។ ឥណ្ឌូណេស៊ីបានវិនិយោគលុយ ៨១៨លានដុល្លារ លើវិស័យថាមពល ធនាគារ និងទំនាក់ទំនងអាជីវកម្មនៅទីម័រខាងកើត។ កាលពីឆ្នាំ ២០២១ ពាណិជ្ជកម្មរវាងប្រទេសទាំងពីរនេះមានតម្លៃប្រហែល ២៥០លានដុល្លារ។
លោក Ramos-Horta ក៏ស្វាគមន៍ចំពោះការឆ្លើយតបរបស់ទីក្រុងហ្សាការតាស្ដីពីការពង្រឹងទំនាក់ទំនងពាណិជ្ជកម្ម និងការប្ដេជ្ញាចិត្តដើម្បីឱ្យទីម័រខាងកើតបានចូលជាសមាជិកអាស៊ាននាពេលខាងមុខ។
ទីម័រខាងកើតបានដាក់ពាក្យស្នើសុំចូលជាសមាជិកអាស៊ានតាំងពីឆ្នាំ ២០១១ មក។ តែមកទល់ពេលនេះប្រទេសនេះនៅមិនទាន់ទទួលបានការព្រមព្រៀងចំពោះសំណើនេះនៅឡើយ។ បច្ចុប្បន្ន ទីម័រខាងកើតមានឋានៈជាអ្នកអង្កេតការណ៍។
គួរបញ្ជាក់ថា ទីម័រខាងកើតធ្លាប់ស្ថិតក្រោមការគ្រប់គ្រងរបស់ឥណ្ឌូណេស៊ីចាប់ពីឆ្នាំ១៩៧៦ រហូតដល់ឆ្នាំ១៩៩៩ ហើយទទួលបានឯករាជ្យនៅឆ្នាំ២០០២៕