លោក ប៉ែន សុវិជាតិ បានបញ្ជាក់ថា ក្រសួងពាណិជ្ជកម្ម មានគោលនយោបាយបង្កើតឃ្លាំងស្តុក និងឡសម្ងួតស្រូវ ដើម្បីឆ្លើយតបនឹងការរអ៊ូទាំរបស់ពលរដ្ឋទាក់ទងនឹងស្រូវធ្លាក់ថ្លៃ។ កិច្ចការនេះ នឹងត្រូវសិក្សាជាមួយ រដ្ឋបាលស្បៀងអាហារខេត្តហ៊ើណាន (Henan) របស់ចិន។
 

លោក ថ្លែងដូច្នេះថា៖«កិច្ចការនេះ យើងបានសិក្សា ជាមួយរដ្ឋបាលស្បៀងអាហារខេត្តហ៊ើណាន របស់ប្រទេសចិន ក្នុងការជំរុញការរៀបចំឃ្លាំង និងឡសម្ងួត ដើម្បីទទួលស្ដុកស្រូវ និងទុកឱ្យប្រជាពលរដ្ឋយើង ប្រើប្រាស់។ កុំឱ្យនៅពេលស្រូវធ្លាក់ថ្លៃទៅ យើងចេះតែជំរុញលក់»។
 

ក្រសួងពាណិជ្ជកម្ម ក៏មានគម្រោងលក់រាយ និងលក់ដុំអង្ករក្នុងស្រុក ដែលតម្លៃសមរម្យ ក្នុងករណីទីផ្សារស្រូវ-អង្ករឡើងថ្លៃខ្ពស់។ លើសពីនេះ ក្រសួង បានព្យាយាមទំនាក់ទំនងជាមួយប្រទសផ្សេងទៀតដែលមានតម្រូវការអង្ករខ្ពស់ដូចជា ឥណ្ឌូនេស៊ី ហ្វីលីពីន  បង់ក្លាដេស និងចិន ដើម្បីពង្រីកការនាំចេញអង្ករកម្ពុជាបន្ថែម។
 

យោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ នៅឆមាសទី១ឆ្នាំ២០២២នេះ កម្ពុជា បាននាំចេញអង្ករជាង ៣២ម៉ឺនតោនទៅកាន់សហភាពអឺរ៉ុប ចិន អាស៊ាន និងប្រទេសគោលដៅ២៣ទៀត កើនឡើង១៦ភាគរយ ធៀបនឹងរយៈពេលដូចគ្នាឆ្នាំ២០២១។ ចំណែក ការនាំចេញស្រូវមានជាង ១៧៣ម៉ឺនតោន ទៅកាន់វៀតណាម កើនឡើង២ភាគរយ នឹងរយៈពេលដូចគ្នាឆ្នាំ២០២១៕