សម្ដេច ស ខេង សង្កត់ធ្ងន់ថា ការងាររៀនសូត្រវគ្គបណ្តុះបណ្តាលវិជ្ជាជីវៈនគរបាលនេះ មានសារៈសំខាន់ចំពោះការតែងតាំង និងការដំឡើងតួនាទី ឬការផ្ទេរក្របខណ្ឌផ្សេងៗមកចូលក្របខណ្ឌនគរបាលជាតិនេះ ។ បើតាមសម្ដេច ស ខេង ក្នុងករណីដែលមិនបានចូលរៀនវគ្គបណ្តុះបណ្តាលនេះ វាជាកំហុសរបស់នគរបាល ។
 

ក្រសួងមហាផ្ទៃ បានស្រងសម្តីរដ្ឋមន្រ្តី មកសរសេរលើហ្វេសប៊ុកនៅថ្ងៃទី ២៦ កក្កដា ដូច្នេះថា៖«គ្រប់មន្ត្រីប៉ូលីសដែលមានតួនាទីចាប់ពីអគ្គនាយកដ្ឋានចុះ គឺមិនទុកឱ្យនរណាម្នាក់មិនបានរៀនសូត្រវិជ្ជាជីវៈនគរបាលនោះទេ ហើយបើនរណាមិនព្រមមករៀននោះ សូមដើរចេញពីនគរបាល»។
 

រដ្ឋមន្រ្តីមហាផ្ទៃ ប្រាប់អង្គភាពក្រោមចំណុះក្រសួងអនុវត្តវិធានការបែបនេះ ឱ្យបានម៉ត់ចត់ ដោយពុំមានការយោគយល់ និងផ្អែកលើមនោសញ្ចេតនា ចំពោះមន្រ្តីដែលខ្ជិលរៀនវគ្គបណ្ដុះបណ្ដាលវិជ្ជាជីវៈនគរបាលឡើយ ពោលគឺត្រូវអនុវត្តផ្អែកទៅលើគោលការណ៍ដែលបានរៀបចំ។ 
 

«ក្នុងករណីដែលមន្ត្រីមានការមមាញឹកក្នុងការងារនៅក្នុងអង្គភាព អាចរៀនព្រឹក ធ្វើការល្ងាចបានតាមភាពជាក់ស្តែងក្នុងអង្គភាពរបស់ខ្លួន ការធ្វើបែបនេះគឺ ដើម្បីឱ្យមន្ត្រីគ្រប់រូបអាចទទួលបានចំណេះដឹង និងបំពេញការងារនៅតាមអង្គភាពបាន»។ នេះបើតាមសម្ដេច ស ខេង៕