ព្រះវិហារយ៉ាស៊ូគូនី ជាកន្លែងដ៏ចម្រូងចម្រាសមួយរវាងជប៉ុនជាមួយកូរ៉េខាងត្បូង និងចិន ដោយ សារតែវិហារមួយនេះ ជាកន្លែងតម្កល់ឈ្មោះឧក្រិដ្ឋជនសង្រ្គាមលើកទីពីរចំនួន ១៤រូប រួមទាំងឈ្មោះទាហានជប៉ុនដែលពលីក្នុងសង្រ្គាម។ 

 

ទោះបីកន្លងមកមានការខឹងសម្បារពីភាគីចិន និងកូរ៉េខាងត្បូងក្ដី នាយករដ្ឋ​មន្ត្រីជប៉ុន លោក គីស៊ីដា ហ្វូមីអូ នៅថ្ងៃទី១៥ ខែសីហា នៅតែបានផ្ញើសារ​គោរព​ដល់​វិញ្ញាណក្ខន្ធ​ អ្នក​ស្លាប់​ដោយសារសង្គ្រាមទាំងនោះដដែល។ នេះបើយោងតាមទីភ្នាក់ងារព័ត៌មាន Kyodo។ 

 

ទន្ទឹមនេះ វីដេអូនៅលើទូរទស្សន៍រដ្ឋជប៉ុន NHK បានបង្ហាញទីសក្ការបូជា នៅព្រឹកថ្ងៃទី១៥​ ខែសីហា ដោយមានវត្តមានរបស់សមាជិកគណៈរដ្ឋមន្ត្រីជប៉ុនជាច្រើនរូប ដែលរួមមានទាំងរដ្ឋមន្ត្រីសន្តិសុខសេដ្ឋកិច្ច លោកស្រី Sanae Takaichi។ មុននេះបន្តិច ប្រធានក្រុមប្រឹក្សាស្រាវជ្រាវ គោលនយោបាយរបស់គណបក្សប្រជាធិបតេយ្យសេរី (LDP) លោក Koichi Hagiuda ក៏បាន ទៅគោរពដល់វិហារផ្ទាល់ដែរ។

 

«ខ្ញុំ​មិន​ដឹង​ថា​តើ​នាយក​រដ្ឋមន្ត្រី​នឹង​ទៅ​ទីសក្ការ​យ៉ាស៊ូគូនីឬ​អត់​ទេ ហើយ​ខ្ញុំ​ជឿ​ថាលោក​នឹង​សម្រេច​ចិត្ត​ដោយសមរម្យ»។ ប្រធានលេខាធិការគណៈរដ្ឋមន្ត្រីជប៉ុន លោក Hirokazu Matsuno បានលើកឡើងបែបនេះអំឡុងសន្និសីទកាសែតមួយនៅថ្ងៃដដែលនោះ រួចបន្តថា​ការគោរពវិញ្ញាណក្ខន្ធដូនតា ជារឿងធម្មតាដែលត្រូវធ្វើតាំងពីដើមមក។

 

យ៉ាងណាមិញ លោកក៏បានសង្កត់ធ្ងន់ថា​ ជប៉ុននឹងបន្តពង្រឹងទំនាក់ទំនងរបស់ខ្លួនជាមួយ ប្រទេសជិតខាងដែលរួមមានចិន និងកូរ៉េខាងត្បូង។

 

គួរបញ្ជាក់ថា លោកគីស៊ីបានផ្ញើសារគោរពនេះម្ដងដែរកាលពីថ្ងៃទី២១ ខែមេសា ដែលបានធ្វើ ឱ្យកូរ៉េខាងត្បូងខកចិត្តយ៉ាងខ្លាំង ហើយក៏បានស្នើឱ្យរដ្ឋាភិបាលជប៉ុនត្រួតពិនិត្យឡើងវិញពីប្រវត្តិសាស្ត្រដែល​បាន​ឆ្លុះ​បញ្ចាំងពីការឈឺចាប់របស់ជនរងគ្រោះ ដោយសារតែអតីតមេដឹកនាំជប៉ុនទាំងនោះ។ លោក អាបេ ស៊ិនហ្សូ ជានាយករដ្ឋមន្ត្រីចុងក្រោយគេដែលបានទៅគោរព ដល់វិហារផ្ទាល់ អំឡុងពេលកាន់តំណែងក្នុងឆ្នាំ២០១៣ ដែលបានធ្វើឱ្យមានការខឹងសម្បារទាំងចិន និងកូរ៉េខាងត្បូង ហើយថែមទាំងបានទទួលការស្ដីបន្ទោសពីអាម៉េរិកដែលជាសម្ព័ន្ធមិត្តរបស់ខ្លួនផងដែរ៕