អន្តរជាតិ
លោក វីដូដូ សាទរកិត្តិនាមឥណ្ឌូណេស៊ីលើឆាកអន្តរជាតិ លោក ចូកូ វីដូដូ ប្រធានាធិបតីឥណ្ឌូណេស៊ី ជាមួយសមភាគីរុស្ស៊ី លោក វ្ល៉ាឌីមៀ ពូទីន នៅថ្ងៃទី៣០ ខែមិថុនា។ រូបភាព៖ AFP
× ប្រធានាធិបតីឥណ្ឌូណេស៊ី លោក ចូកូ វីដូដូ នៅថ្ងៃទី១៦ ខែសីហា បានសាទរការកើនឡើងនៃកិត្តិនាមរបស់ឥណ្ឌូណេស៊ីនៅលើឆាកអន្តរជាតិ រួមទាំងស្នើធ្វើជាអ្នកសម្របសម្រួលសន្តិភាពជាថ្មីរវាងរុស្ស៊ី និងអ៊ុយក្រែន។
ក្នុងសុន្ទរកថាទៅកាន់ប្រជាជាតិពីគោលនយោបាយ និងបញ្ហាផ្សេងៗ ប្រធានាធិបតីឥណ្ឌូណេស៊ី លោក ចូកូ វីដូដូ បានថ្លែងពីភាពជោគជ័យជាច្រើន ក្នុងការទប់ស្កាត់វិបត្តិសុខភាព អតិផរណា និងបញ្ហាដែលដរចេញពីសង្រ្គាមនៅអ៊ុយក្រែន។ ទន្ទឹមនេះ មេដឹកនាំរូបនេះ ថែមទាំងសាទរពីការកើនឡើងនៃកិត្តិនាមរបស់ឥណ្ឌូណេស៊ីនៅលើឆាកអន្តរជាតិផង។
«នៅក្នុងឆ្នាំ២០២២ យើងជាប្រធានផ្លាស់វេននៃកិច្ចប្រជុំក្រុមប្រទេសមានសេដ្ឋកិច្ចរីកចម្រើនទាំង២០(G20)។ ឆ្នាំក្រោយ យើងបានធ្វើជាប្រធានផ្លាស់វេនអាស៊ានជាថ្មី»។ លោក វីដូដូ បានបញ្ជាក់បែបនេះទៅកាន់ប្រជាជាតិខ្លួន មួយថ្ងៃមុនខួបឯករាជ្យជាតិរយៈពេល ៧៧ឆ្នាំ ដោយបន្តថា នេះបង្ហាញពីភាពជោគជ័យនៃភាពជាអ្នកដឹកនាំសកលរបស់ឥណ្ឌូណេស៊ី។
ក្នុងនាមជាប្រធានផ្លាស់វេននៃក្រុមប្រទេស G20 ឥណ្ឌូណេស៊ីបានចូលរួមសកម្មនៅក្នុងកិច្ចការអន្តរជាតិ។ នៅចុងខែមិថុនាកន្លងទៅ លោកវីដូដូ បានធ្វើទស្សនកិច្ចនៅអ៊ុយក្រែន និងរុស្ស៊ី ហើយថែមទាំងផ្តល់សំណើធ្វើជាប្រទេសសម្របសម្រួលឱ្យមេដឹកនាំរុស្ស៊ី និងអ៊ុយក្រែនជួបគ្នាថែមទៀត ដើម្បីជជែកពីការចរចាសន្តិភាព។
ទាក់ទិននឹងសង្រ្គាមនៅអ៊ុយក្រែនបែបនេះ លោកវីដូដូ ក្នុងសុន្ទរកថាដដែលនោះ បានលើកឡើងជាថ្មីថា ឥណ្ឌូណេស៊ីអាចជាអ្នកសម្របសម្រួលសម្រាប់សន្តិភាពរបស់អ៊ុយក្រែន និងរុស្ស៊ី។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters៕
© រក្សាសិទ្ធិដោយ thmeythmey.com