រយៈពេល៧ខែនៃឆ្នាំ២០២២ ខេត្តសៀមរាបទទួលបានទេសចរជាង ១លាននាក់ ក្នុងនោះទេសចរអន្តរជាតិ ៨៣ ៨៥៤នាក់។ ភ្ញៀវទេសចរទាំងនេះ បានធ្វើឱ្យប្រតិបត្តិករទេសចរណ៍ ក្នុងខេត្តសៀមរាបមានលទ្ធភាពបើកអាជីវកម្មរបស់ខ្លួនឡើងវិញ។ មូលដ្ឋានទេសចរណ៍ចំនួន ៥៤៨កន្លែងបានកំពុងដំណើរការក្នុងខេត្តសៀមរាប។ ទិន្នន័យនេះស្មើនឹង  ៤៦ភាគរយនៃអាជីវកម្មទេសចរណ៍សរុបក្នុងខេត្តសៀមរាប ដែលមានចំនួន ១ ១៨៧កន្លែង។ 

 

លោកស្រី ឆាយ ស៊ីវលីន ប្រធានសមាគមទេសចរណ៍កម្ពុជា លើកឡើងថា ថ្វីបើចំនួនអាជីវកម្មទេសចរណ៍ក្នុងខេត្តសៀមរាប ទើបដំណើរការឡើងវិញប្រហែលពាក់កណ្ដាល តែវាហាក់ច្រើនជាងតម្រូវការទេសចរ។ ការណ៍នេះធ្វើឱ្យអាជីវកម្មទេសចរណ៍មួយចំនួនមិនមានភ្ញៀវឡើយ។ ប៉ុន្តែលោកស្រីរំពឹងថា នាខែតុលាខាងមុខ ខេត្តសៀមរាបនឹងមានកំណើនទេសចរឡើងវិញ។

«យើងមើលឃើញថាភ្ញៀវកើន គ្រាន់តែនៅមានកម្រិត។ ទោះបីប្រតិបត្តិករទេសចរណ៍ត្រឡប់មកវិញជាង ៤០ភាគរយ ក៏នៅតែច្រើនជាងតម្រូវការភ្ញៀវបច្ចុប្បន្ន។ ពិបាកនឹងនិយាយដែរ ព្រោះពេលយើងបើកឡើងវិញចំរដូវភ្លៀង ដែលរដូវភ្ញៀវអត់ដើរ។ ប៉ុន្តែយើងឃើញការកក់មានច្រើននៅខែតុលា»។ នេះជាការបញ្ជាក់របស់លោកស្រី ឆាយ ស៊ីវលីន។

 

អ្នកជំនាញទេសចរណ៍រូបនេះមើលឃើញថា ទេសចរណ៍ក្នុងខេត្តសៀមរាបងើបឡើងយឺតបន្តិត ព្រោះភ្ញៀវកើនឡើងនៅមានកម្រិតពេក។ ប៉ុន្តែការងើបឡើងយឺតនេះជាអត្ថប្រយោជន៍មួយសម្រាប់ បុគ្គលិកក្នុងវិស័យទេសចរណ៍បានពង្រឹងជំនាញរបស់ពួកគេឡើងវិញ។

 

ជាមួយគ្នានោះ លោក រស់ សាយ នាយកគ្រប់គ្រងសណ្ឋាគារ វិរតន៍ (Viroth’s Hotel) ប្រាប់សារព័ត៌មានThmeyThmey25ថា សណ្ឋាគាររបស់លោកមានភ្ញៀវជាប្រចាំ ប៉ុន្តែមិនទាន់អាចស្មើនឹងមុនជំងឺកូវីដ-១៩ឡើយ។ ជាប្រចាំ សណ្ឋាគារ វិរតន៍ មានភ្ញៀវស្នាក់នៅប្រមាណ ៧បន្ទប់ ដែលភាគច្រើនជាភ្ញៀវទេសចរពីអឺរ៉ុប ហើយជាភ្ញៀវទេសចរដែលទើបមកកម្ពុជាលើកដំបូង។ 

 

លោក រស់ សាយ បញ្ជាក់ដូច្នេះ៖ «សម្រាប់សន្ទុះភ្ញៀវមាន២-៣សប្តាហ៍ចុងក្រោយ។ ប៉ុន្តែបើធៀបមុនកូវីដ-១៩ប្រហែល ៥០ភាគរយប៉ុណ្ណោះ។ ការកក់កើនឡើងច្រើនពីភ្ញៀវក្រៅប្រទេស ជាពិសេសភ្ញៀវមកពីអឺរ៉ុប។ ហើយអ្វីដែលខ្ញុំសម្គាល់គឺជាទេសចរដែលដើរកម្សាន្តនៅកម្ពុជាលើកដំបូង។ ទេសចរ៨០ ទៅ៩០ភាគរយ ថានេះជាលើកដំបូង ដែលគាត់មកកម្ពុជា និងសៀមរាប»។

 

ជុំវិញស្ថានភាពទេសចរណ៍ក្នុងខេត្តសៀមរាបនេះ លោក ពីយ៉ូត ដាវីដហ្សាយា (David-Jaya PIOT) ប្រធានសមាគមសណ្ឋាគារខេត្តសៀមរាបថា រយៈពេល៧ខែនេះ អាជីវកម្មទេសចរណ៍ដែលបើកឡើងវិញភាគច្រើនជាសណ្ឋាគារតូចៗ និងទទួលទីផ្សារទេសចរអឺរ៉ុប។ ចំណែកសណ្ឋាគារធំៗ បើកឡើងវិញតិចតួចប៉ុណ្ណោះ ព្រោះទេសចរជនជាតិចិនមិនទាន់មានកំណើនក្នុងប្រទេសកម្ពុជា ឬខេត្តសៀមរាបឡើយ។

 

យ៉ាងណាមិញលោក ពីយ៉ូត ដាវីដហ្សាយា (David-Jaya PIOT) អះអាងថា សណ្ឋាគារដែលបើកដំណើរការឡើងវិញទាំងនោះមិនទាន់អាចទទួលបានប្រាក់ចំណេញច្រើនឡើយ ដោយពួកគេគ្រាន់តែបើកដើម្បីដំណើរការអាជីវកម្មតែប៉ុណ្ណោះ។ 

 

«មកដល់ឥឡូវឱ្យតែគាត់(ម្ចាស់សណ្ឋាគារ)ទប់ទល់ការចំណាយបានគឺល្អណាស់ហើយ មិនបាច់និយាយថាទទួលបានប្រាក់ចំណេញទេ។ ខ្ញុំសង្ឃឹមថានៅចុងឆ្នាំនេះឬដើមឆ្នាំក្រោយអាចនឹងមានល្អប្រសើរ។ តែរកស៊ីក្នុងវិស័យទេសចរណ៍ឥឡូវពិបាកស្មានណាស់ សូម្បីក្រុមហ៊ុនអាកាសចរណ៍ក៏ពិបាកស្មានដែរ»។ នេះជាការបន្ថែមរបស់លោក ពីយ៉ូត ដាវីដហ្សាយា (David-Jaya PIOT)។

 

ប្រធានសមាគមសណ្ឋាគារប្រចាំខេត្តសៀមរាបរូបនេះ បន្តថា សណ្ឋាគារធំៗមួយចំនួន ដែលទទួលទេសចរបែបប្រណីត(High Class) នឹងអាចបើកដំណើរការបន្ថែមនៅកញ្ញា ឬខែតុលាខាងមុខ។ ដោយឡែកសណ្ឋាគារដែលទទួលទេសចរជនជាតិចិន មិនទាន់មានគម្រោងបើកឡើងវិញនោះទេ។

 

ជុំវិញស្ថានភាពទេសចរណ៍ក្នុងខេត្តសៀមរាប លោក ថោង ខុន រដ្ឋមន្រ្តីក្រសួងទេសចរណ៍ ស្នើឱ្យប្រតិបត្តិករទេសចរណ៍ទាំងអស់ពង្រឹងសមត្ថភាពបដិសណ្ឋារកិច្ច និងផលិតផលទេសចរណ៍របស់ខ្លួនឡើងវិញ ព្រោះពួកគេបានឃ្លាតឆ្ងាយពីការងារនេះប្រមាណ២ឆ្នាំហើយ ដោយសារការរីករាលដាលនៃជំងឺកូវីដ-១៩។

 

«ទីផ្សារទេសចរណ៍ឥឡូវត្រូវការប្រកួតប្រជែងខ្លាំង។ សេវាទេសចរណ៍មិនអាចប្រហែសបានទេ ត្រូវតែផ្ដល់សេវាប្រកបដោយគុណភាព ព្រោះពេលងើបឡើងវិញទីផ្សារទេសចរណ៍ចង្អៀត។ ចង្អៀតយ៉ាងមិច អ្នកមានលុយធ្លាប់ដើរកម្សាន្តមិនមានច្រើនទៀតទេ អាចមកជាអ្នកប្រជុំ និងអ្នកធ្វើអាជីវកម្ម។ បើមានទេសចរ គឺជាអ្នកមានហើយទៅកាន់គោលដៅ ដែលល្បីល្បាញ ដូចជាអង្គរវត្តរបស់យើង»។ នេះជាការបញ្ជាក់បន្ថែមរបស់លោក ថោង ខុន។

 

បន្ថែមពីនេះ លោក ថោង ខុន សន្និដ្ឋានថា ខេត្តសៀមរាបនឹងអាចមានទេសចររហូតដល់ ២,២លាននាក់ នៅឆ្នាំ២០២២នេះ។ ក្នុងនោះ ទេសចរអន្តរជាតិ អាចមានរហូតដល់ជិត ២៤ម៉ឺននាក់៕