កញ្ញា Daria Dugina​ ដែលជាកូនស្រីរបស់អ្នកជាតិ​​និយមជ្រុលរុស្ស៊ី Alexander Dugin បានស្លាប់​នៅ​ថ្ងៃទី២០ ខែសីហាក្នុងហេតុការណ៍ផ្ទុះគ្រាប់បែកក្នុងឡានដែលនាងកំពុងបើកបរ។ លោក Dugin ជា​បញ្ញាវន្ត និងអ្នកវិភាគនយោបាយ​រុស្ស៊ីដ៏សំខាន់មួយរូប និងជាជំនិតរបស់​ប្រធានាធិបតីរុស្ស៊ី វ្ល៉ាឌីមៀ ពូទីន ហើយលោកក៏គាំទ្រលើទ្រឹស្តីពង្រីកទឹកដីរុស្ស៊ី និងការក្ដោបយកទឹកដី អ៊ុយក្រែន​ផង​ដែរ។

 

ក្នុងសេចក្ដីថ្លែងការណ៍មួយ អង្គភាពចារកម្មសម្ងាត់រុស្ស៊ី (FSB) បានទម្លាក់កំហុសនេះលើស្ត្រី ជនជាតិអ៊ុយក្រែនម្នាក់កើតនៅឆ្នាំ១៩៧៩ ដែលត្រូវបានបង្ហាញឈ្មោះ រូបថត និងព័ត៌មា​ន​នៅ​លើ​គេហទំព័រព័ត៌មានរុស្ស៊ី។ រុស្ស៊ីក៏បានអះអាងថា ស្ត្រីរូបនោះពាក់ព័ន្ធ​ជាមួយសេវា​សន្តិសុខ​អ៊ុយក្រែន​ហើយចោទស្ត្រីរូបនោះថា ជាសមាជិកកងវរសេនាតូច Azov ដែលជាអង្គភាពមួយ​នៃ​កងទ័ព​អ៊ុយក្រែន ដែលរុស្ស៊ីបានកំណត់ជាក្រុមភេរវករ។

 

បើតាម FSB ស្ត្រីដែលជាជនសង្ស័យ បានទៅដល់រុស្ស៊ីក្នុងខែកក្កដា ហើយបានចំណាយ​ពេល​មួយ​ខែ​រៀបចំការវាយប្រហារនេះ។​ ក្រោយការវាយប្រហារ ស្ត្រីរូបនោះ​ក៏​បាន​ភៀស​ខ្លួន​ទៅ​អេស្តូនី​។ ទីភ្នាក់ងារ​សារព័ត៌មានរុស្ស៊ី TASS រាយការណ៍ថា ភ្នាក់ងារអនុវត្តច្បាប់របស់​រុស្ស៊ីបានដាក់​ស្ត្រីនោះ​នៅក្នុងបញ្ជីជន​សង្ស័យដែលត្រូវចាប់ខ្លួន ហើយក្រុងមូស្គូក៏កំពុងស្វែងរកការធ្វើបត្យាប័នរបស់ស្ត្រីនោះផងដែរ។

 

ជាការឆ្លើយតប កងកម្លាំង Azov បានអះអាងថា ស្ត្រីរូបនោះមិនដែលធ្វើជាសមាជិករបស់ខ្លួនឡើយ ហើយ Azov ក៏មិនមានជាប់ពាក់ព័ន្ធអ្វីនឹងការវាយប្រហារនោះដែរ។ បន្ថែមពីនេះ ទីប្រឹក្សា​ប្រធានាធិបតី​អ៊ុយក្រែនលោក Mykhailo Podolyak បានហៅការចោទប្រកាន់របស់ រុស្ស៊ីជាការ​ឃោសនារឿ​ង​មិន​ពិត។

 

ចំពោះការស្លាប់របស់កញ្ញា Dugina លោក ពូទីន បានចាត់ទុកថាជាអ្នកស្នេហាជាតិ​ និងបុគ្គល​មួយ​រូប​ដ៏ក្លាហាន ហើយលោកបានហៅការសម្លាប់នេះថា ជាទង្វើដ៏អាក្រក់ និងឃោរឃៅផងដែរ។ 

 

កញ្ញា Dugina ដែលជាអ្នកសារព័ត៌មាន និងជាអ្នកអត្ថាធិប្បាយនៅលើទូរទស្សន៍រដ្ឋរុស្ស៊ី បានគាំទ្រ​យ៉ាងខ្លាំងចំពោះសកម្មភាពរបស់រុស្ស៊ីនៅអ៊ុយក្រែនដែលទីក្រុងមូស្គូហៅថា ប្រតិបត្តិការ​យោធា​ពិសេស​។ កញ្ញា Dugina ក៏មានភាពល្បីល្បាញដោយសារការបញ្ចេញមតិផ្នែកនយោបាយទាក់ទងនឹងរុស្ស៊ី និងគាំទ្រផលប្រយោជន៍របស់លោកពូទីន។

 

ដោយឡែក ក្រសួងមហាផ្ទៃអេស្តូនី​ បានលើកឡើងក្នុងសេចក្ដីថ្លែងការណ៍ផ្សេងមួយថា​ ពួកគេអាច​ចែករំលែកព័ត៌មានពីបុគ្គលណាមួយដែលចេញ ឬចូលប្រទេសរបស់ខ្លួនក្នុងតែករណីដែលកំណត់​ដោយច្បាប់តែប៉ុណ្ណោះ។ អេស្តូនីក៏បានលើកឡើងថាចំពោះការចោទប្រកាន់របស់ FSB មិន​បាន​បំពេញ​តាមលក្ខខណ្ឌច្បាប់នោះឡើយ៕