ជាតិ
សង្គមជាតិ
លោក ហេង សួរ អំពាវនាវដល់ពលរដ្ឋកុំជឿអបិយជំនឿមិនសមហេតុផល អាចនាំឱ្យខាតប្រយោជន៍ លោក ហេង សួរ អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ។ រូបភាព៖ ហ្វេសប៊ុក លោក ហេង សួរ
× លោក ហេង សួរ អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានអំពាវនាវដល់ពលរដ្ឋកុំជឿអបិយជំនឿ ដែលមិនសមហេតុផល ព្រោះអាចនាំឱ្យពួកគេខាតបង់ប្រយោជន៍ និងបាត់បង់ការងារជាដើម។ ការអំពាវនាវនេះបន្ទាប់ពីក្រសួងទទួលបានព័ត៌មានថា មានពលករខ្មែរធ្វើការនៅកូរ៉េមួយចំនួនធំ បានត្រឡប់មកកម្ពុជាវិញភ្លាមៗ ក្រោយការទស្សន៍ទាយពីបាតុភូត Black Hole របស់លោក ខឹម វាសនា មេដឹកនាំគណបក្សសម្ព័ន្ធដើម្បីប្រជាធិតេយ្យ (LDP)។
សារសំឡេងជាង១នាទី ដែលចែកចាយតាមបណ្ដាញតេឡេក្រាម លោក ហេង សួរ អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានអំពាវនាវកុំឱ្យពលរដ្ឋខ្មែរ ពិសេសពលករចំណាកស្រុកទៅធ្វើការនៅប្រទេសកូរ៉េជឿអបិយជំនឿមិនសមហេតុ ព្រោះអាចនាំឱ្យពួកគេខាតប្រយោជន៍ និងការងារជាដើម។
«ទាំងជនជាតិយើង ក៏ដូចជាជនជាតិដទៃផ្សេងទៀត គេចង់បានឱកាសទៅធ្វើការនៅប្រទេសកូរ៉េ ឬជប៉ុន ប៉ុន្តែយើងបែរជាទៅដល់ទីនោះហើយ បែរជាត្រឡប់មកវិញដោយឈរលើអបិយជំនឿដែលមិនសមហេតុផលនេះគឺវាជាការសោកស្ដាយ។ ដូច្នេះសូមអំពាវនាវដល់ពលរដ្ឋខ្មែរ យកលក្ខណៈវិទ្យាសាស្ត្រធ្វើជាគោល ហើយសូមគិតពីផលប្រយោជរបស់ខ្លួនជាគោល។ បើចេញមកទាំងបង្ខំបែបនេះ គឺមិនមានច្បាប់ដើម្បីវិលត្រឡប់ទៅប្រទេសកូរ៉េវិញទេ ដូច្នេះវាធ្វើឱ្យបាត់បង់ឱកាសការងារដ៏ល្អ និងចំណូលសម្រាប់ទ្រទ្រង់គ្រួសារផងដែរ»។ នេះជាការលើកឡើងរបស់លោក ហេង សួរ។
សូមបញ្ជាក់ថា លោក ខឹម វាសនា បានអំពាវនាវឱ្យពលរដ្ឋប្រយ័ត្នចំពោះបាតុភូតគ្រោះធម្មជាតិដ៏ធំ ដែលអាចនឹងលិចលង់ពិភពលោកទាំងមូល។ យ៉ាងណា មេបក្សជួងរូបនេះ អំពាវនាវឱ្យអ្នកជឿរូបលោក ប្រញាប់ទៅចម្ការខ្លួនដែលស្ថិតនៅខេត្តសៀមរាប។ តាមអាជ្ញាធរខេត្តសៀមរាបបានឱ្យដឹងថា មានមនុស្សជាច្រើនបានចាប់ផ្តើមទៅចម្ការរបស់លោក ខឹម វាសនា ដែលស្ថិតនៅស្រុកបន្ទាយស្រី ហើយក្នុងរយៈពេល២ថ្ងៃចុងក្រោយនេះ ចំនួនមានរហូតដល់ខ្ទង់៣ពាន់នាក់ជាប្រចាំថ្ងៃ៕
© រក្សាសិទ្ធិដោយ thmeythmey.com