ការប្រយុទ្ធគ្នាទៅវិញទៅមករវាងកងកម្លាំងអ៊ុយក្រែន និងរុស្ស៊ីជុំវិញរោងចក្រផលិតថាមពលដើរដោយនុយក្លេអ៊ែរ Zaporizhzhia បង្កជាក្តីបារម្ភជាខ្លាំងជុំវិញការវាយប្រហារប៉ះរ៉េអាក់ទ័រនុយក្លេអ៊ែរដែលបង្កឱ្យសារធាតុវិទ្យុកម្មលេចធ្លាយ ហើយប្រឈមនឹងមហន្តរាយនុយក្លេអ៊ែរដូច Chernobyl។ 

 

ទាក់ទងបញ្ហានេះ ថ្លែងទៅកាន់ក្រុមប្រឹក្សាសន្តិសុខនៅថ្ងៃទី៦ ខែកញ្ញា អគ្គលេខាធិការអង្គការសហប្រជាជាតិ (UN) លោក អាន់តូនីញូ ហ្គូតេរ៉េស ជាថ្មីម្តងទៀតទទូចឱ្យភាគីជម្លោះទាំងពីរបញ្ឈប់សកម្មភាពយោធានៅតំបន់រោងចក្ររបស់អ៊ុយក្រែន Zaporizhzhia ដែលរុស្ស៊ីក្តោបក្តាប់បានតាំងពីដើមខែមីនា។ 

 

«ជាជំហានដំបូង កងកម្លាំងរុស្ស៊ី និងអ៊ុយក្រែនត្រូវតែប្តេជ្ញាថា នឹងធ្វើសកម្មភាពយោធាណាមួយឆ្ពោះទៅរកទីតាំងរោងចក្រ ឬពីទីតាំងរោងចក្រទៅវិញនោះទេ»។ លោក ហ្គូតេរ៉េស ថ្លែងទៅកាន់សមាជិកក្រុមប្រឹក្សា UN បែបនេះ។ 

 

បើតាមប្រមុខ UN ដើម្បីទប់ស្កាត់មហន្តរាយនុយក្លេអ៊ែរ ជំហានទី២ រុស្ស៊ី និងអ៊ុយក្រែនគួរតែមានកិច្ចព្រមព្រៀងបង្កើតតំបន់គ្មានយោធានៅបរិវេណរោងចក្រផលិតថាមពលដើរដោយនុយក្លេអ៊ែរដ៏ធំបំផុតនៅអឺរ៉ុបមួយនេះ។ លោកក៏ចង់ឱ្យបញ្ចូលចំណុចដែលកំណត់យោធារុស្ស៊ីត្រូវតែប្តេជ្ញាដកខ្លួនចេញពីបរិវេណរោងចក្រ រីឯយោធាអ៊ុយក្រែនត្រូវប្តេជ្ញាមិនរុលទៅចូលបរិវេណនោះទេ។ 

 

ទន្ទឹមនឹងការចោទប្រកាន់គ្នាទៅវិញទៅមករវាងអ៊ុយក្រែន និងរុស្ស៊ីជុំវិញការវាយប្រហារនៅក្បែររោងចក្រ Zaporizhzhia ទីភ្នាក់ងារថាមពលអាតូមិក (IAEA) បានចេញរបាយការណ៍មួយនៅថ្ងៃទី ៦ ខែកញ្ញា ដែលរកឃើញថា ក្រុមការងារ IAEA រកឃើញការខូចខាតជាច្រើននៅបរិក្ខារខាងក្រៅរោងចក្រ។ ស្រដៀងទៅនឹងអនុសាសន៍របស់ប្រមុខ UN IAEA ស្នើឱ្យភាគីជម្លោះបង្កើតតំបន់ដើម្បីការពារសុវត្ថិភាព​ និងសន្តិសុខរោងចក្រ Zaporizhzhia។ 

 

កាលពីសប្តាហ៍មុន ប្រធាន IAEA និងក្រុមការងារ ១៣ នាក់ទៀតបានទៅបំពេញការត្រួតពិនិត្យស្ថានភាពនៅរោងចក្រ ខណៈសមាជិក ២ នាក់នឹងនៅតែបន្តឈរជើងនៅទីនោះតាមដានស្ថានការណ៍៕