មីយ៉ាន់ម៉ា និងរុស្ស៊ីដែលស្ថិតក្រោមទណ្ឌកម្មលោកខាងលិចដូចគ្នាបានបន្តទំនាក់ទំនងយ៉ាងស្អិតល្មួត។ ជាសញ្ញាពង្រឹងទំនាក់ទំនងកាន់តែស៊ីជម្រៅក្រោយរដ្ឋប្រហារ មេដឹកនាំរបបយោធាមីយ៉ាន់ម៉ា ឧត្តមសេ​នីយ៍ មីន អ៊ុងឡាំងនៅថ្ងៃទី៧ ខែកញ្ញាបានជួបជាមួយប្រធានាធិបតីរុស្ស៊ី វ្ល៉ាឌីមៀ ពូទីនជាលើកដំបូងនៅក្រៅកិច្ចប្រជុំវេទិកាសេដ្ឋកិច្ចបូព៌ានៅទីក្រុង Vladivostok ទឹកដីរុស្ស៊ី។ 

 

អំឡុងជំនួប មេដឹកនាំទាំងពីរបានសរសើរពីមិត្តភាពគ្នាទៅវិញទៅមក ក៏ដូចជាជជែកគ្នាពីកិច្ចសហប្រតិបត្តិការទ្វេភាគីប្រកបដោយមិត្តភាព​ និងបើកចំហរ ហើយក៏បានដោះដូរគំនិតគ្នាជុំវិញស្ថានភាពពិភពលោកបច្ចុប្បន្នផងដែរ។ 

 

«ខ្ញុំពិតជាមានមោទកភាពចំពោះអ្នកណាស់ ពីព្រោះនៅពេលអ្នកឡើងកាន់អំណាចនៅរុស្ស៊ី អ្នកក្លាយជាមេដឹកនាំលេខ១នៅក្នុងពិភពលោក»។ លោក មីន អ៊ុងឡាំង ប្រាប់លោក ពូទីន បែបនេះក្នុងសេចក្តីថ្លែងការណ៍របស់វិមានក្រេមឡាំង ជាមួយនឹងការបន្ថែមថា លោក ពូទីន មិនមែនត្រឹមតែមេដឹកនាំរុស្ស៊ីប៉ុណ្ណោះទេ តែជាមេដឹកនាំពិភពលោកដែលគ្រប់គ្រង និងរៀបចំស្ថិរភាពពិភពលោកទាំងមូលទៀតផង។ 

 

ចំណែក ប្រធានាធិបតីរុស្ស៊ីវិញសរសើរថា មីយ៉ាន់ម៉ាគឺជាដៃគូដ៏យូរអង្វែង និងគួរឱ្យទុកចិត្តរបស់រុស្ស៊ីនៅអាស៊ីអាគ្នេយ៍ ហើយទំនាក់ទំនងទ្វេភាគីវិញកំពុងអភិវឌ្ឍទៅមុខប្រកបដោយវិជ្ជមាន។

 

សូមបញ្ជាក់ថា ស្របពេលកាន់តែឃ្លាតឆ្ងាយពីលោកខាងលិចជុំវិញការឈ្លានពានអ៊ុយក្រែន រុស្ស៊ីបានបង្វែរពង្រឹងទំនាក់ទំនងជាមួយអាស៊ី មជ្ឈិមបូព៌ា និងអាហ្វ្រិក។ រីឯ មីយ៉ាន់ម៉ាវិញក្រោយត្រូវបានដាក់ទណ្ឌកម្ម និងទម្លាក់ទំនាក់ទំនងការទូតជុំវិញរដ្ឋប្រហារទម្លាក់រដ្ឋាភិបាលស៊ីវិល មានចិន និងរុស្ស៊ីជាបង្អែកទាំងផ្នែកយោធា និងពាណិជ្ជកម្ម៕