ក្នុងពេលឆាប់ៗខាងមុខនេះ វិទ្យាស្ថានភាសាបរទេសនៃសាកលវិទ្យាល័យភូមិន្ទភ្នំពេញ នឹងបើកបង្រៀនភាសាតួកគី។ លោក ជេត ជាលី សាកលវិទ្យាធិការនៃសាកលវិទ្យាល័យភូមិន្ទភ្នំពេញ បានផ្តល់ព័ត៌មាននេះលើហ្វេសប៊ុករបស់លោក បន្ទាប់ពីបានជួបពិភាក្សាជាមួយអ្នកស្រី អ៊ុលគូ កូគែហ្វី (Ulku Kocaefe) ឯកអគ្គរដ្ឋទូតតួកគីប្រចាំកម្ពុជា នៅថ្ងៃទី៨ ខែកញ្ញា ឆ្នាំ២០២២។

 

លោក ជេត ជាលី សរសេរដូច្នេះថា៖«សូមចូលរួមអបអរសាទរដល់វិទ្យាស្ថានភាសាបរទេសនៃសាកលវិទ្យាល័យយើង ដែលខិតខំបង្កើនការបង្រៀនភាសាបរទេសផ្សេងៗនៅវិទ្យាស្ថាន។ សង្ឃឹមថា បងប្អូន ដែលមានចំណាប់អារម្មណ៍ និងមានតម្រូវការ [ផ្នែកភាសាតួកគី] អាចនឹងទទួលបានការសិក្សាក្នុងពេលឆាប់ៗនេះ»។ 

សាកលវិទ្យាធិការរូបនេះ អះអាងថា អ្នកស្រីឯកអគ្គរដ្ឋទូតតួកគី រីករាយនឹងសហការជាមួយសាកលវិទ្យាល័យភូមិន្ទភ្នំពេញលើសកម្មភាពអប់រំ ដោយផ្តើមចេញពីការបង្រៀនភាសា៕