ជាតិ
សេដ្ឋកិច្ច
៨ខែ កម្ពុជានាំចូលទំនិញជិត ២២ពាន់លានដុល្លារ ខណៈការនាំចេញជាង ១៥ពាន់លានដុល្លារ កុងតឺន័រនៅកំពង់ផែស្ងួត ហុង ឡេងហួរ ។ រូបថតដោយ ភារម្យ/ Xinhua ។
× កម្ពុជាមានទំហំពាណិជ្ជកម្មប្រមាណ ៣៧,៤លានដុល្លារក្នុងរយៈពេល៨ខែនេះ។ ក្នុងនោះការនាំចូលទំនិញមកកម្ពុជា គិតជាតម្លៃ ២១,៧៦ពាន់លានដុល្លារ ខណៈការនាំចេញទំនិញទៅក្រៅប្រទេសវិញ មានតម្លៃ ១៥,៦៤ពាន់លានដុល្លារ។ទំហំពាណិជ្ជកម្មដែលមានតម្លៃ ៣៧,៤ពាន់លានដុល្លារនេះ បានកើនឡើងប្រមាណ ២១,៥ភាគរយ បើធៀបនឹងរយៈពេលដូចគ្នាកាលពីឆ្នាំ ២០២១។
បើតាមអគ្គនាយកដ្ឋានគយ និងរដ្ឋាករ ការនាំចេញទំនិញរបស់កម្ពុជាដែលមានតម្លៃ ១៥,៦៤ពាន់លានដុល្លារ កើនក្នុងអត្រា ២៦,៣ភាគរយបើធៀបនឹងគ្រាដូចគ្នាកាលពីឆ្នាំ ២០២១ មានប្រមាណ ១២,៣៨ពាន់លានដុល្លារ។ ចំណែកការនាំចូលទំនិញមកកម្ពុជាវិញ មានតម្លៃរហូតដល់ជាង ២១,៧៦ពាន់លានដុល្លារកើនឡើងប្រមាណ ១៨,៣ភាគរយ ធៀបនឹងរយៈពេលដូចគ្នាក្នុងឆ្នាំ ២០២១ដែលមានតម្លៃប្រមាណ ១៨,៤០ពាន់លានដុល្លារ។
មុខទំនិញសំខាន់ៗដែលកម្ពុជានាំចេញមានដូចជា សម្លៀកបំពាក់ ស្បែកជើងកាបូប គ្រឿងសង្ហារិម កៅស៊ូ បំណែកគ្រឿងអគ្គីសនីនិងម៉ាស៊ីន ឈើ ធញ្ញជាតិ ផ្លៃឈើ
ស្ពាន់ ប្រដាប់ប្រដារក្មេងលេង និងសម្ភារៈវាយនភ័ណ្ឌកែច្នៃរួចផ្សេងទៀត...។ រីឯមុខទំនិញនាំចូលសំខាន់ៗវិញមានដូចជា គុជខ្យងធម្មជាតិ ត្បូងមានតម្លៃរ៉ែ យានយន្តគ្រប់ប្រភេទ គ្រឿងចក្រ អាលុយមីញ៉ូម ដែក កប្បាស ក្រដាស ឱសថ ស្បែកសត្វ និងជី ...។
គួរបញ្ជាក់ថា ចិនឈរនៅលំដាប់លេខរៀងទី១ ដែលមានទំហំពាណិជ្ជកម្មច្រើនជាងគេជាមួយកម្ពុជាខណៈអាម៉េរិកឈរនៅលំដាប់លេខទី២ តាមពីក្រោយដោយវៀតណាមឈរនៅលំដាប់លេខរៀងទី៣ ។ ទន្ទឹមនឹងនេះថៃឈរនៅលំដាប់លេខរៀងទី៤ ហើយសិង្ហបុរីឈរនៅលំដាប់លេខរៀងទី៥ ។ ទាំងនេះជាលំដាប់ថ្នាក់ប្រទេសមានទំហំពាណិជ្ជកម្មច្រើនជាមួយកម្ពុជា៕
Tag:
ទំហំពាណិជ្ជកម្ម នាំចេញ
© រក្សាសិទ្ធិដោយ thmeythmey.com