ជាតិ
សេដ្ឋកិច្ច
លោក ជា ចាន់តូ រំពឹងថា អតិផរណាឆមាសទី២ អាចស្ថិតក្រោម ៥ ភាគរយ លោក ជា ចាន់តូ ទេសាភិបាលធនាគារជាតិនៃកម្ពុជា ។ រូបពី NBC ។
× អតិផរណាកម្ពុជានៅឆមាសទី២ ត្រូវបានរំពឹងថា អាចស្ថិតក្រោម៥ ភាគរយ ស្របនឹងកំណើនសេដ្ឋកិច្ច ក្នុងរង្វង់ ៥ភាគរយ នៅឆ្នាំ ២០២២នេះ។ នេះបើតាលោក ជា ចាន់តូ ទេសាភិបាលធនាគារជាតិនៃកម្ពុជា។
អតិផរណានៅឆមាសទី២ នេះត្រូវបានរំពឹងថា ថយចុះពី៦,៥ភាគរយនៅឆមាសទី១ មកក្រោមអត្រា ៥ភាគរយ ដោយសារការកើនឡើងថ្លៃប្រេងឥន្ធនៈ ,ការរអាក់រអួលច្រវាក់ផ្គត់ផ្គង់សកល និងការងើបឡើងវិញនៃតម្រូវការក្នុងស្រុក។
ចំណែកសេដ្ឋកិច្ចកម្ពុជា ត្រូវបានព្យាករថា មានកំណើនក្នុងរង្វង់ ៥ភាគរយ ជាមួយនឹងអត្រាអតិផរណាអាចគ្រប់គ្រងបាន ទោះបីជាឆមាសទី១ បានកើនឡើងបន្តិចក៏ដោយ។ នេះបើតាមលោក ជា ចាន់តូ ។
បើតាមទេសាភិបាលធនាគារជាតិរូបនេះ ទុនបម្រុងអន្តរជាតិកម្ពុជាបន្តរក្សាបានក្នុងកម្រិតគ្រប់គ្រាន់ ស្មើនឹងប្រមាណ ៧ខែ នៃការនាំចូលទំនិញ និងសេវា ដែលខ្ពស់ជាងកម្រិតអប្បបរមា ដែលប្រទេសកំពុងអភិវឌ្ឍន៍ គួរមាន ៣ខែ។ ចំពោះ អត្រាប្ដូរប្រាក់រៀល ធៀបនឹងដុល្លារអាមេរិក មានស្ថិរភាពល្អប្រសើរ ដោយមានកម្រិតមធ្យមប្រហាក់ប្រហែលនឹងគ្រាដូចគ្នា ក្នុងរយៈពេល ៨ខែ ឆ្នាំ២០២១ ដែលសកម្មភាពសេដ្ឋកិច្ចបន្តងើបឡើងជាលំដាប់។
លោក ជា ចាន់តូ បានឱ្យដឹងថា ៖« ស្ថិរភាពអត្រាប្ដូរប្រាក់ បានរួមចំណែកយ៉ាងសំខាន់ក្នុងការការពារអំណាចទិញរបស់ចំណូលប្រជាជន ក៏ដូចជាកាត់បន្ថយផលប៉ះពាល់ពីការកើនឡើងនៃអតិផរណា ខណៈប្រព័ន្ធធនាគារ គ្រឹះស្ថានធនាគារនិងហិរញ្ញវត្ថុបន្តមានសុខភាពល្អ និងមានភាពធន់នឹងវិបត្តិ ព្រមទាំងបានចូលរួមកាត់បន្ថយផលប៉ះពាល់នៃវិបត្តិកូវីដ-១៩ និងគាំទ្រសកម្មភាពសេដ្ឋកិច្ចក្នុងដំណាក់កាលងើបឡើងវិញ»។
មូលដ្ឋានគ្រឹះនៃអតិផរណា កើតចេញពីការឡើងថ្លៃទំនិញទូទៅ និងវិបត្តិនៃអត្រាប្តូរប្រាក់។ នេះជាការលើកឡើងរបស់លោក គី សេរីវឌ្ឍន៍ អ្នកជំនាញសេដ្ឋកិច្ចនៃរាជ្យបណ្ឌិត្យសភាកម្ពុជាប្រាប់សារព័ត៌មានថ្មីៗនាថ្ងៃទី១៤កញ្ញា ថា អតិផរណាអាចធ្លាក់ចុះបន្តិច ដោយសារ ការកើនឡើងផលិតកម្មនៅក្នុងស្រុក ដែលអាចទប់ការនាំចូលមួយចំនួន ហើយធ្វើឱ្យទំនិញឡើងថ្លៃទាបជាងមុន។ ទន្ទឹមនេះ រដ្ឋាភិបាលបានធ្វើសម្បទានជាច្រើនទៅក្នុងតម្លៃប្រេងឥន្ធនៈ ដូចដែលបានសន្យា ស្របពេលដែលរដ្ឋាភិបាលបានបញ្ចេញអង្ករពីឃ្លាំងច្រើន ទប់ស្កាត់ការឡើងថ្លៃ។
សូមជម្រាបថា អត្រាប្តូរប្រាក់គោលផ្លូវការរបស់ធនាគារជាតិនៃកម្ពុជា ប្រចាំថ្ងៃទី១៤ កញ្ញានេះ គឺ ១ដុល្លារ ស្មើនឹង ៤ ១០៩រៀល ខណៈអត្រាប្តូរទីផ្សាររបស់ធនាគារអេស៊ីលីដា និងធនាគារABA ១ដុល្លារ ស្មើនឹង ៤ ១០៨រៀល។ ដោយឡែក អត្រាប្តូរប្រាក់ផ្លូវការប្រចាំថ្ងៃទីកក្កដា ឆ្នាំ២០២២ របស់អគ្គនាយកដ្ឋានពន្ធដារ បានបង្ហាញថា ១ដុល្លារ ស្មើនឹង ៤ ១១៧រៀល៕
© រក្សាសិទ្ធិដោយ thmeythmey.com