កីឡាជាតិ
ជាតិ
លីក២០១៤៖ ភ្នំពេញក្រោនជួបការពារជាតិ បៀលប្រាយប៉ះនគរបាលជាតិ ខ្សែប្រយុទ្ធ Bisan George របស់ក្លិបភ្នំពេញក្រោន។ រូបថត CAM Photo Agency
× នារសៀលថ្ងៃអាទិត្យនេះ ជំនួបក្របខណ្ឌមិត្តហ្វូនខេមបូឌានលីកមាន២ប្រកួតនៅពហុកីឡដ្ឋានជាតិ។ ភ្នំពេញក្រោនប៉ះជាមួយក្រសួងការពារជាតិនាវេលាម៉ោង៣:៣០ មុនជំនួបក្រោមពន្លឺអំពូលភ្លើងរវាងបៀលប្រាយយូណាយធីត និងអគ្គស្នងការដ្ឋាននគរបាលជាតិចាប់ពីវេលាម៉ោង៦ល្ងាច។
ភ្នំពេញក្រោន v ក្រសួងការពារជាតិ (ម៉ោង៣:៣០)
សម្រាប់ភ្នំពេញក្រោន ជ័យជម្នះនឹងនាំឲ្យពួកគេឡើងទៅឈរលេខមួយប្រចាំសប្តាហ៍ទី២ ខណៈកាលពីសប្តាហ៍មុន ពួកគេបានបំបាក់ក្រុមសាកលវិទ្យាល័យអាស៊ីអឺរ៉ុប ៤-០។ Bisan George របស់ភ្នំពេញក្រោន គឺជាខ្សែប្រយុទ្ធដែលមានការគម្រាមកំហែងយ៉ាងខ្លាំង។ ក្រសួងការពារជាតិនឹងមានការងារដ៏មមាញឹករបស់ខ្លួនបន្ថែមទៀត ក្រោយចាញ់ណាហ្គាខប ៣-០។ ខ្សែបម្រើស្លាប ឈិន ឈឿន បានសរសេរនៅលើហ្វេសប៊ុករបស់ខ្លួនថា សម្រាប់ការប្រកួតនៅថ្ងៃនេះ ក្រុមការពារជាតិជួបបញ្ហាកង្វះកីឡាករដោយសារអ្នកខ្លះឈឺ រីឯអ្នកខ្លះទៀតមានភារកិច្ចនៅខាងក្រៅ។
បៀលប្រាយយូណាយធីត v អគ្គស្នងការដ្ឋាននគរបាលជាតិ (ម៉ោង៦:០០)
បៀលប្រាយបានរងនូវការខកចិត្តក្រោយការវាយបកតាមស្មើ ១-១ របស់ត្រាយអេស៊ីកាលពីសប្តាហ៍មុន។ ខ្សែប្រយុទ្ធនីហ្សេរីយ៉ា Adeyanju Omokafe បង្ហាញសមត្ថភាពលេងដ៏គួរឲ្យសម្គាល់នាការបង្ហាញខ្លួនលើកដំបូងរបស់គេសម្រាប់ក្លិបបៀលប្រាយ។ ទោះបីជាយ៉ាងណាក៏ដោយ ជំនួបជាមួយអគ្គស្នងការដ្ឋាននគរបាលជាតិ មិនមែនជារឿងងាយស្រួលឡើយ ខណៈខ្សែប្រយុទ្ធ នួន បូរី ហាក់ដូចជាកំពុងលេចធ្លោរខ្លាំងទាំងក្នុងលីក និងក្នុងពានរង្វាន់សម្តេច ហ៊ុន សែន។ បូរី គឺជាអ្នកស៊ុតបាល់បញ្ចូលទីទាំង២គ្រាប់ក្នុងជ័យជម្នះ ២-០ លើគិរីវង់កាលពីសប្តាហ៍មុន៕
© រក្សាសិទ្ធិដោយ thmeythmey.com