សម្ដេច ស ខេង រដ្ឋមន្រ្តីក្រសួងមហាផ្ទៃ និងជាប្រធានគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស បាននិយាយថា វេទិកាអន្តរសាសនាកម្ពុជា ដែលបានលើកយកប្រធានបទរួម «សូមកុំយកកម្ពុជាជាគោលដៅប្រព្រឹត្តអំពើជួញដូរមនុស្ស» គឺជាការអំពាវនាវផង និងប្រឆាំងផង ចំពោះរាល់សកម្មភាពទុច្ចរិតដែលប្រព្រឹត្តក្នុងដែនដីនៃកម្ពុជា ជាពិសេសទៅលើប្រជាជនកម្ពុជា និងជនបរទេស ដែលអំពើដ៏សាហាវនេះ បានបំផ្លាញទាំងធនធានមនុស្ស ទាំងកិត្តិយស និងភាពសុខដុមរមនារបស់សង្គមជាតិ។
 

«កន្លងមកមានប្រជាជនកម្ពុជា ជាច្រើន ដែលធ្វើទេសន្តប្រវេសន្ត៍ ស្វែងរកការងារធ្វើនៅក្រៅប្រទេស ដោយប្រថុយប្រថាន ក្នុងនោះមួយចំនួន ត្រូវបានរងទុក្ខវេទនា ក្នុងទម្រង់ជាការងារបង្ខំ និងលំបាកយ៉ាប់យឺន មិនបានទទួលប្រាក់កម្រៃឈ្នួលតាមកិច្ចសន្យា ហើយត្រូវបានគេជួញដូរ កេងប្រវ័ញ្ច និងប្រើប្រាស់កម្លាំងពលកម្មដោយបង្ខំ​ ។ គួរឱ្យសង្វេគជាងនេះទៅទៀតនោះ គឺមានអ្នកខ្លះបាត់ដំណឹងមិនបានវិលត្រឡប់មកជួបជុំគ្រួសារ ខ្លះធ្លាក់ខ្លួនពិការ បាត់បង់កាយសម្បទារ ឬបញ្ញាស្មារតី និងកំពុងស្ថិតជាជនទេសន្តប្រវេសន្ត៍ ដែលគ្មានឯកសារច្បាប់ត្រឹមត្រូវ ធ្វើឱ្យជនល្មើសងាយស្រួលធ្វើសកម្មភាពប្រើប្រាស់ និងកេងប្រវ័ញ្ច និងរំលោភបំពាន និងខ្លះទទួលរងគ្រោះរហូតដល់ស្លាប់ »។ នេះបើតាមសម្ដេច ស ខេង។
 

បើតាមសម្ដេច ស ខេង នៅឆ្នាំ២០២២នេះ ស្របពេលសភាពការណ៍កូវីដ-១៩ បានធូរស្រាល ហើយសេដ្ឋកិច្ច និងសង្គមកម្ពុជាចាប់ផ្ដើមងើបឡើងវិញនោះ កម្ពុជាក៏កើតមានបទល្មើសឆបោកតាមប្រព័ន្ធគមនាគមន៍យ៉ាងគគ្រឹកគគ្រេង ព្រមជាមួយការប្រើប្រាស់មនុស្សដោយបង្ខំ កេងប្រវ័ញ្ចប្រាក់ឈ្នួល បិទសិទ្ធិសេរីភាព និងការប្រើប្រាស់ជនរងគ្រោះជាឧបកណ៍សម្រាប់បោកប្រាស់អ្នកដទៃបន្តទៀត។
 

រដ្ឋមន្រ្តីមហាផ្ទៃ បានបន្តថា បទល្មើសឆ្លងដែននេះ មានខ្សែបណ្ដាញទាំងក្នុង និងក្រៅប្រទេស និងត្រូវបានក្រុមឧក្រិដ្ឋជនលួចលាក់ធ្វើសកម្មភាពយ៉ាងសម្ងាត់តាមបច្ចេកវិទ្យាព័ត៌មាន រួមទាំងបង្ខំមនុស្សធ្វើការដោយគ្មានសេរីភាព និងឃុំឃាំងមនុស្សជំរិតទារប្រាក់ជាដើម។ «ជនល្មើសខ្លះ មានអាវុធខុសច្បាប់ថែមទៀតផង ដែលសកម្មភាពនេះ បើមិនបង្ការទប់ស្កាត់ទេនឹងអាចប៉ះពាល់ដល់សន្តិសុខជាតិនាពេលអនាគត»។ នេះបើតាមសម្ដេច ស ខេង។
 

ជាមួយគ្នានេះ គណៈកម្មាធិការជាតិប្រយុទ្ធប្រឆាំងការជួញដូរមនុស្ស បានដាក់ចេញផែនការប្រតិបត្តិការដើម្បីសម្រេចបានគោលការណ៍សំខាន់៤ គឺសង្គ្រោះជនរងគ្រោះ, ស៊ើបអង្កេតរកជនប្រព្រឹត្តបទល្មើស បក្ខពួក និងស្រាវជ្រាវរកមេក្លោង, ត្រួតពិនិត្យប្រមូលភស្តុតាងឈានទៅបិទទីតាំងអាជីវកម្មខុសច្បាប់ ជាពិសេសទីតាំងលេងល្បែងស៊ីសងខុសច្បាប់ ហើយបើរកឃើញថាជាករណីជួញដូរមនុស្ស ត្រូវពន្លាតការស៊ើបអង្កេតរកបទល្មើសសម្អាតប្រាក់។
 

តាមរយៈកិច្ចប្រតិបត្តិការ ចាប់ពីថ្ងៃទី១៨ ខែសីហា ឆ្នាំ២០២២មក សម្ដេច ស ខេង បានទទួលបណ្ដឹងដតាមប្រព័ន្ធហ្វេសប៊ុក និងប្រព័ន្ធទូរសព្ទទាន់ហេតុការណ៍ ប្រមាណ៣៦៨ករណី ក្នុងនោះជនល្មើសធ្វើសកម្មភាពនៅខេត្តព្រះសីហនុច្រើនជាងគេ គឺរហូតដល់២៤៩ករណី ។ បន្ថែមពីនេះ ក្រុមប្រតិបត្តិការបានរុករកជនល្មើសតាមបណ្ដាទីតាំងសង្ស័យ និងតាមសេចក្ដីរាយការណ៍ ដោយសង្គ្រោះជនរងគ្រោះបាន៣៦១នាក់ ក្នុងនោះរងគ្រោះអំពើជួញដូរមាន៩ករណី មនុស្ស៥៤នាក់ និង៦សញ្ជាតិ។
 

បើតាមរដ្ឋមន្រ្តីមហាផ្ទៃ ប្រតិបត្តិការនេះ សមត្ថកិច្ចបានឃាត់ខ្លួនជនសង្ស័យ៤១នាក់ មាន៣សញ្ជាតិ បញ្ជូនទៅតុលាការ រឹបអូសភស្តុតាង និងបិទទីតាំង ដើម្បីស៊ើបអង្កេតប្រមូលភស្តុងតាងបន្ថែម។ «ក្រៅពីនេះ ក៏មានជនរងគ្រោះរាប់រយនាក់ទៀត ត្រូវបានសមត្ថកិច្ចរកឃើញ បើទោះបីជាអ្នកទាំងនោះមិនមែនជាជនរងគ្រោះដោយអំពើជួញដូរមនុស្សក៏ដោយ ក៏ត្រូវសមត្ថកិច្ចរំដោះពីទីតាំងគ្រោះថ្នាក់ ទៅកាន់ទីតាំងសុវត្ថិភាពក្រោមកិច្ចសហការ និងសម្របសម្រួលពីស្ថានទូតពាក់ព័ន្ធដើម្បីពួកគេបានវិលត្រឡប់ទៅប្រទេសកំណើតវិញ»។ នេះបើតាមប្រមុខមហាផ្ទៃ៕