«ខ្ញុំនៅតែបន្តការអំពាវនាវឱ្យមីក្រូហិរញ្ញវត្ថុ ខិតខំពិនិត្យមើលក្នុងការផ្ដល់ឥណទានខ្នាតតូច ដោយមានការប្រាក់ទាប សម្រាប់ប្រជាពលរដ្ឋដែលស្ម័គ្រចិត្តមករស់នៅកន្លែងនេះ ដើម្បីឱ្យគាត់បានបង្កើននូវមុខរបរ។ ខ្ញុំនៅតែបន្តការស្នើសុំបែបនេះ»។ សម្ដេច ហ៊ុន សែន ថ្លែងបែបនេះ នៅក្នុងពិធីជួបសំណេះសំណាលជាមួយពលរដ្ឋ ដែលស្ម័គ្រចិត្តរើចេញពីតំបន់អង្គរទៅតំបន់រុនតាឯក នៅព្រឹកថ្ងៃទី១ តុលានេះ។
 

គិតត្រឹមថ្ងៃទី១ តុលានេះ មានពលរដ្ឋជាង៤ពាន់គ្រួសារហើយ ដែលយល់ព្រមចាកចេញពីតំបន់១ និងតំបន់២ នៅជុំវិញអង្គរ ទៅរស់នៅតំបន់ធម្មជាតិរុនតាឯក ក្នុងស្រុកបន្ទាយស្រី ។ សម្ដេច ក៏បានប្រកាសផ្ដល់បណ្ណក្រីក្រសម្រាប់ពលរដ្ឋទាំងនោះ រយៈពេល១០ឆ្នាំផងដែរ។
 

ក្រៅពីសម្របសម្រួលការរស់នៅរបស់ពលរដ្ឋទាំងនោះហើយ ប្រមុខរដ្ឋាភិបាល ក៏បានប្រកាសពីគម្រោងអភិវឌ្ឍន៍តំបន់រុនតាឯកនេះ ឱ្យទៅជាទីក្រុងមួយផងដែរ។