ក្រុមបាល់ទាត់យុវជនអាយុក្រោម ១៧ឆ្នាំកម្ពុជា យកបាន៣ពិន្ទុក្រោយឈ្នះ កោះម៉ារីយ៉ាណាខាងជើង ៤-០ ក្នុងការប្រកួតពូលG នៃពានរង្វាន់ AFC U17 Asian Cup 2023 កាលពីថ្ងៃទី៩ ខែតុលា នាកីឡដ្ឋាន Shepparton រដ្ឋវិចតូរីយ៉ា ប្រទេសអូស្ត្រាលី។
គ្រាប់ទី១ធ្វើបានសម្រេចដោយខ្សែប្រយុទ្ធ ស៊ូ ម៉េងហុង ដែលតែតបញ្ចូលទីនៅនាទី២១ ក្រោយពីការបញ្ជូនចេញពីខ្សែការពារ វ៉ា ដាវីត។ នៅនាទី៣៩ ខ្សែប្រយុទ្ធ ស៊ូ ម៉េងហុង ដដែល បានអូសបាល់ផុតដៃអ្នកចាំទីកោះម៉ារីយ៉ាណាខាងជើង រួចស៊ុតបញ្ចូលទីស្រួលៗ ចំណែកគ្រាប់ទី៣ សម្រេចទីដោយខ្សែបម្រើ ទាំ មករា ដែលស៊ុតជើងឆ្វេងពីលើប្រអប់តំបន់គ្រោះថ្នាក់ នៅនាទី៤៥។
ជំនួបរវាងក្រុមបាល់ទាត់កម្ពុជាអាយុក្រោម១៧ឆ្នាំ(ខៀវ) ទល់នឹងកោះម៉ារីយ៉ាណាខាងជើង(ស)។ រូបពី FFC
ចូលដល់វគ្គទី២ កម្ពុជា បន្តវាយសម្រុកទៅតំបន់គ្រោះថ្នាក់ កោះម៉ារីយ៉ាណាខាងជើង ជាច្រើនលើក ប៉ុន្តែមិនមានសំណាងក្នុងសម្រេចទីបានឡើយ។ កោះម៉ារីយ៉ាណាខាងជើង វាយបកមកវិញដែរ តែក៏មិនអាចទម្លាយសំណាញ់ទីកម្ពុជាបាន។ លុះដល់នាទី៩០ កម្ពុជាបន្ថែមគ្រាប់ទី៤ មុនអាជ្ញាកណ្តាលផ្លុំកញ្ច្រែបញ្ចប់ការប្រកួត ដែលសម្រេចបានដោយខ្សែប្រយុទ្ធ សួន មករា ពីការស៊ុតខាងជើងស្តាំ។
កម្ពុជាទទួលបាន៣ពិន្ទុបង្គ្រប់កិច្ចមុនដំណើរវិលត្រឡប់មកប្រទេសវិញ។ នាការប្រកួតបើកឆាក កម្ពុជាចាញ់ចិន ៩-០ ហើយបន្តចាញ់ម្ចាស់ផ្ទះអូស្ត្រាលី ១០-០ ។ ម្ចាស់ផ្ទះអូស្ត្រាលី និងចិន ត្រូវឡើងទៅវគ្គបន្ត ខណៈកម្ពុជាបានត្រឹមលេខ៣ ហើយកោះម៉ារីយ៉ាណា នៅបាតតារាង ក្រោយលទ្ធផលចាញ់អូស្ត្រាលី ២៣-០, ចាញ់ចិន ១១-០ និងចាញ់កម្ពុជា ៤-០។
ស្របជាមួយគ្នានេះ ឡាវ បានស្ថិតក្នុងចំណោមក្រុមលេខ២ល្អដែលទទួលបានឱកាសឡើងទៅកាន់ជុំចុងក្រោយនៃព្រឹត្តិការណ៍ AFC U17 Asian Cup រួមជាមួយម៉ាឡេស៊ី វៀតណាម និងថៃ។
ក្រុមទាំង១៦ដែលបានទៅកាន់ជុំចុងក្រោយរួមមាន ជប៉ុន, ម៉ាឡេស៊ី, កាតា, អារ៉ាប៊ីសាអូឌីត, យ៉េមែន, វៀតណាម, អូស្ត្រាលី, តាហ្ស៊ីគីស្ថាន, អ៊ីរ៉ង់, អ៊ូសបេគីស្ថាន, កូរ៉េខាងត្បូង, ចិន, អាហ្វហ្គានីស្ថាន, ឥណ្ឌា, ថៃ និងឡាវ៕