ក្នុងទឹកទី១ បង្គោលក្រហមរាហ៊ូមាស ឈុត សេរីវ៉ាន់ថង គោះជើងក្រោមតិចៗលក្ខណៈស្ទាបស្ទង់បង្គោលខៀវអ្នកលេងកាំភ្លើងភ្លោះ វ៉ាន់ វឿន ដើម្បីជាកិច្ចបើកការគួរសម។ ចូលដល់ទឹកទី២ រាហ៊ូមាសហាក់ចង់ផ្តាច់ អ្នកលេងជើងភ្លោះឱ្យសន្លប់តែមិនអាចទៅរួច។

 

ចូលដល់ទឹកទី៣ បង្គោលក្រហមបើកការវាយសន្ធប់សារជាថ្មីទៅលើបង្គោលខៀវពេញៗកណ្តាប់ដៃដ៏សែនធ្ងន់ រហូតធ្វើឱ្យបង្គោលខៀវព្យាយាមដកថយដើម្បីវាយបកតបតមកវិញ។ វ៉ាន់ថង បន្ថែមការវាយលុកជាថ្មីទៀតនៅទឹកទី៤ ទៅកាន់ វ៉ាន់ វឿន ប៉ុន្តែមិនមែនជាការងាយនោះទេ ស្របពេល វ៉ាន់ វឿន គេបានតបតមកវិញធ្ងន់ៗដែរ។ ចូលដល់ទឹកទី៥ ដែលជាការកាត់សេចក្តីទឹកចុងក្រោយ គូរទាំងពីរមិនមានការអន់ក្នុងការវាយតតាំងគ្នានោះឡើយ។

 

បញ្ចប់ការប្រកួតរាហ៊ូមាស ឈុត សេរីវ៉ាន់ថង ឈ្នះវ៉ាន់ វឿន ដោយពិន្ទុបន្តឈរនៅលើកំពូលតារាងមាន៦ពិន្ទុ។ ចំណែកកីឡាករ រិន ដេវីត ឡើងមកលេខ២ បន្ទាប់ពីផ្តួលកីឡាករ សៀវ ង៉ុយ ឱ្យបោះបង់ការប្រកួតក្នុងទឹកទី៤ លេខ៣ បានទៅកីឡាករ វ៉ាន់ វឿន មាន៤ពិន្ទុ និងលេខ៤ សៀវ ង៉ុយ មាន២ពិន្ទុ សម្រាប់ពូលA៕