ក្នុងបទសម្ភាសផ្ទាល់ជាមួយសារព័ត៌មានថ្មីៗនាទីលានបាល់ទះក្នុងសាលព្រីនស៍ កាលពីថ្ងៃទី១៩ ខែតុលា ឆ្នាំ២០២២ លោក អាំង សិរីពិសិដ្ឋរៀបរាប់ថា៖ «គុណផលរបស់កីឡាករស្តែងចេញលើការអនុវត្តជាក់ស្តែងនៅលើទីលាន ទោះបីជាការប្រកួតកម្តៅសាច់ដុំក៏ពិតមែន ខ្ញុំពេញចិត្តពេញថ្លើមនៃគុណផលដែលកីឡាបាល់ទះកម្ពុជារបស់យើងធ្វើដល់កម្រិតនេះអាចលេងតទល់ជាមួយជម្រើសជាតិគុយបា ទោះបីជាអាយុក្រោម២១ឆ្នាំក៏ពិតមែន ប៉ុន្តែខ្ញុំគិតថាវាហួសពីអ្វីដែលខ្ញុំរំពឹងទុក»។
 

លោកអគ្គលេខាធិការ បានបន្ថែមថាទោះបីជាមានការហ្វឹកហាត់បិទខ្ទប់រយៈពេលយូរក៏ដោយ តែសមត្ថភាពកីឡាករក្រុមជម្រើសជាតិមានកើនឡើងជាងមុន។ ក្រោយចប់ព្រឹត្តិការណ៍ស៊ីហ្គេមលើកទី៣១ នៅប្រទេសវៀតណាម គឺកីឡាករពុំមានពេលសម្រាកឡើយ ពោលគឺព្យាយាមហ្វឹកហាត់ទ្វេរដងដើម្បីបំពេញបេសកកម្មនៅឆ្នាំ២០២៣ នាកីឡាស៊ីហ្គេមលើកទី៣២ ដែលកម្ពុជាធ្វើជាម្ចាស់ផ្ទះ។

 

លោក សិរីពិសិដ្ឋ ក៏បានអំពាវនាវដល់មហាជនអ្នកគាំទ្រវិស័យកីឡាបាល់ទះ សូមកុំបង្អាប់បង្អាក់ទឹកចិត្តកីឡាករ និងថ្នាក់ដឹកនាំ នៅពេលដែលប្រកួតបរាជ័យ។ ជាធម្មតាកីឡាករគឺពិតជាចង់ឈ្នះដើម្បីមុខមាត់ប្រទេសជាតិខ្លួន។

 

លោក អាំង សិរីពិសិដ្ឋ សង្កត់ធ្ងន់ថា៖«ខ្ញុំក៏សូមអំពាវនាវដល់បងប្អូនជនរួមជាតិការគាំទ្រវិស័យកីឡាមិនមែនគាំទ្រតែនៅពេលឈ្នះទេ ពេលចាញ់ក៏គាំទ្រ នោះវិស័យកីឡារបស់យើងនឹងទៅមុខ នៅលើពិភពលោកនេះគ្មានអ្វីអមតៈទេគ្មានភាពខ្លាំងណាដែលនៅឋិតថេរទេ»។ 

អគ្គលេខាធិការសហព័ន្ធកីឡាបាល់ទះកម្ពុជារូបនេះ សូមណូមពរ អ្នកគាំទ្របន្តលើកទឹកចិត្តកីឡាករក្រោយពេលបរាជ័យណាមួយ ស្របពេលថ្នាក់ដឹកនាំ ព្រមទាំងកីឡាករបន្តខិតខំប្រឹងប្រែងដើម្បីកែប្រែចំណុចខ្វះខាត ដើម្បីឱ្យវិស័យបាល់ទះ ក៏ដូចជាកីឡាករដទៃរបស់កម្ពុជាឈានដល់កម្រិតកំពូល៕

 

 

 

 

 

 

 

 

 

​