ក្នុងសិតទី១ ម្ចាស់ផ្ទះកម្ពុជា បាននាំមុខភ្ញៀវគុយបា ដោយពិន្ទុប្រកៀកគ្នា ២៥-២៣ និងសិតទី២ ពិន្ទុរវាងក្រុមទាំងពីរស្មើគ្នា ២៨-២៨ តែយ៉ាងណាការវាយសេវា ចេញពីគុយបា ធ្លាក់ទៅចំកីឡាករ គួន ម៉ុម ជាអ្នកទទួលហើយបញ្ជូនបន្តទៅ សួន ចាន់ណារ៉ូ និងលើកបន្តឱ្យ វឿន វាសនា វាយផ្តាច់នាំមុខពិន្ទុ ២៩-២៨ និងបន្ថែមពិន្ទុជ័យជម្នះសិតទី២ ដោយកីឡាករគុយបា លោតវាយតែត្រូវបាន វឿន វាសនា លោតធ្វើរនាំងបាំងជាប់។ បញ្ចប់សិតទី២ កម្ពុជា ឈ្នះគុយបា ដោយពិន្ទុ ៣០-២៨។

 

ចូលដល់សិតទី៣ គុយបា វាយបកមកវិញដោយពិន្ទុ ២៥-១៨ ហើយដល់សិតទី៤ ការវាយសេវាពីក្រុមគុយបា ធ្លាក់ទៅដល់ថ្នក់កីឡាករ សឿន ហេង ដក់បញ្ជូនឱ្យ ចាន់ដារ៉ូ លើកហើយ វឿន វាសនា ជាអ្នកបញ្ចប់ដោយចុចបាល់ចូលច្រករនាំងបាំងរបស់គុយបា នាំកម្ពុជា ឈ្នះពិន្ទុ ២៥-២៣។

 

ឆ្លងកាត់ជំនួបមិត្តភាពអន្តរជាតិ ២ប្រកួតកន្លងទៅកីឡាករ វឿន វាសនា ជាសមាជិកក្រុមបាល់ទះជម្រើសជាតិកម្ពុជា បង្ហាញការលេងបានយ៉ាងល្អ ទាំងការវាយផ្តាច់ និងឡើងធ្វើជារនាំងបាំងគូប្រកួត។ ជំនួបទល់នឹងសិង្ហបុរី កម្ពុជាបានយកឈ្នះដោយលទ្ធផល ២-១ សិត ហើយទល់នឹងគុយបា(អាយុក្រោម២១ឆ្នាំ) កម្ពុជា បន្តឈ្នះដោយលទ្ធផល ៣-១សិត៕