អន្តរជាតិ
មេទ័ពជើងទឹកអាម៉េរិក៖ អាម៉េរិកត្រូវត្រៀមខ្លួនសម្រាប់ការឈ្លានពានរបស់ចិនលើតៃវ៉ាន់ ឧត្តមនាវី Michael Gilding នាយសេនាធិការកងទ័ពជើងទឹកអាម៉េរិក។ រូបថត AFP
× មេទ័ពជើងទឹកអាម៉េរិក Michael Gilday នៅថ្ងៃទី១៩ ខែតុលា បានលើកឡើងថា យោធាអាម៉េរិក ត្រូវតែត្រៀមខ្លួនជាស្រេចដើម្បីឆ្លើយតបទៅនឹងការឈ្លានពានដែលអាចកើតមានលើកោះតៃវ៉ាន់នៅក្នុងឆ្នាំនេះ ខណៈបានព្រមានពីចេតនាកាន់តែខ្លាំងពីទីក្រុងប៉េកាំងចំពោះការរួបរួមជាតិ។
ឧត្តមនាវី Michael Gilday ជាមន្ត្រីជាន់ខ្ពស់ចុងក្រោយគេនៅទីក្រុងវ៉ាស៊ីនតោន ដែលលើកឡើងពីការព្រួយបារម្ភទាក់ទងលទ្ធភាពកាន់តែខ្ពស់ដែលចិនវាយប្រហារតៃវ៉ាន់។
នៅក្នុងការពិភាក្សាជាមួយអ្នកជំនាញនៅថ្ងៃទី១៩ ខែសីហា លោក Michael Gilday ត្រូវបានសាកសួរពីគំនិតរបស់លោកលើការថ្លែងសុន្ទរកថាសមាជរបស់លោក ស៊ី ជិនភីង ។
«វាមិនមែនគ្រាន់តែជាអ្វីដែលប្រធានាធិបតី ស៊ី និយាយនោះទេ វាគឺជារបៀបដែលប្រជាជនចិនមានអាកប្បកិរិយា និងអ្វីដែលពួកគេធ្វើ»។ លោក Gilday បានប្រាប់ក្រុមប្រឹក្សាអាត្លង់ទិកបែបនេះមុនបន្តថា រយៈពេល២០ឆ្នាំចុងក្រោយនេះ ចិនតែងធ្វើសកម្មភាពមុនពេលដែលខ្លួនបានសន្យា។ លោកក៏បានបន្ថែមថា នៅពេលដែលមានគេនិយាយថា ចិនអាចវាយប្រហារតៃវ៉ាន់នៅឆ្នាំ២០២៧ លោកគិតថា ចិនមានលទ្ធភាពវាយប្រហារតៃវ៉ាន់ក្នុងឆ្នាំ២០២២ ឬ២០២៣ ខាងមុខនេះ។
នៅដើមសប្តាហ៍នេះ រដ្ឋមន្ត្រីការបរទេសអាម៉េរិក លោក អាន់តូនី ប្លិងខិន ក៏បានព្រមានផងដែរថា ទីក្រុងប៉េកាំងចង់ដណ្តើមយកកោះតៃវ៉ាន់លឿនជាពេលវេលាដែលបានគិតទុក។ លោកក៏បានបន្ថែមថាចិនបច្ចុប្បន្នខុសគ្នាខ្លាំងពិមុនក្រោមការដឹកនាំរបស់លោក ស៊ី ។ លោកប្លិងខិន ក៏បានព្រមានថា សង្គ្រាមណាមួយដែលផ្ទុះលើកោះតៃវ៉ាន់នឹងធ្វើឱ្យមានផលប៉ះពាល់យ៉ាងខ្លាំងដល់ពាណិជ្ជកម្មពិភពលោក៕
© រក្សាសិទ្ធិដោយ thmeythmey.com