មុនការប្រកួតនេះ លោក Oleg Starynskyi គ្រូបង្វឹកក្រុមភ្នំពេញក្រោន តាំងចិត្តយ៉ាងមុតមាំថា ក្រុមរបស់លោកនឹងទទួលបាន៣ពិន្ទុ ដើម្បីឈរលេខ៣ បណ្ដោះអាសន្នក្នុងលីគ។ លោក Oleg Starynskyi ថ្លែងដូច្នេះ៖ «សម្រាប់ការប្រកួតនេះយើងចង់ឡើងមកឈរលេខ៣ ក្នុងតារាងវាជារឿងដ៏សំខាន់ក្នុងការកាត់បន្ថយពិន្ទុរបស់ពួកគេ(បឹងកេត) មុននឹងឈានទៅវគ្គ៤ក្រុមចុងក្រោយ»។ 

 

សម្រាប់ភ្នំពេញក្រោន ប្រកួតចុងក្រោយឈ្នះណាហ្គាវើលដ៍ ២-០។ ចំណែកបឹងកេត ឈ្នះគីរីវង់សុខសែនជ័យ ៥-០។ ក្រុមទាំងពីរធ្លាប់ជួបគ្នា៨លើក ភ្នំពេញក្រោន ឈ្នះ៣ ស្មើ៣ និងចាញ់២។ ក្នុងពេលជាមួយគ្នាព្រះខ័នរាជស្វាយរៀង ក៏នឹងត្រូវទៅជួបម្ចាស់ផ្ទះវិសាខា នៅកីឡដ្ឋានព្រីនស៍ផងដែរ។ ជួបគ្នា៧លើក ព្រះខ័នរាជ ឈ្នះ៣ ស្មើ២ និងចាញ់២។ ព្រះខ័នរាជស្វាយរៀង ប្រកួតចុងក្រោយឈ្នះអង្គរថាយហ្គឺរ ៦-០ ។ រីឯវិសាខា ឈ្នះកងយោធពលខេមរភូមិន្ទ ២-១។

 

ចំណែកម្ចាស់ផ្ទះអង្គរថាយហ្គឺរ ត្រូវទទួលភ្ញៀវណាហ្គាវើលដ៍ នៅកីឡដ្ឋានហនុមាន។ ក្នុងជំជួប៥លើក អង្គរថាយហ្គឺរឈ្នះ៣ និងចាញ់២។ អង្គរថាយហ្គឺរ ប្រកួតចុងក្រោយចាញ់ព្រះខ័នរាជស្វាយរៀង ៦-០។ រីឯណាហ្គាវើលដ៍ ចាញ់ភ្នំពេញក្រោន ២-០។ ស្របពេលជាមួយគ្នាក្រុមបាល់ទាត់កងយោធពលខេមរភូមិន្ទ(ទ័ព) ក៏ត្រូវជួបគីរីវង់សុខសែនជ័យ នៅកីឡដ្ឋានគីរីវង់ ផងដែរ។

 

គីរីវង់សុខសែនជ័យ ប្រកួតចុងក្រោយចាញ់បឹងកេត ៥-០។ ចំណែកទ័ព ចាញ់វិសាខា ២-១។ ក្រុមទាំងពីរធ្លាប់ជួបគ្នា៦លើកកន្លងមក ទ័ពឈ្នះ៥ និងចាញ់១។ ចំពោះគីរីវង់សុខសែនជ័យ ត្រូវប្រកួត ជាមួយក្រុមមកពីលីគទី២ បន្ទាប់ពីបញ្ចប់សប្តាហ៍ទី២១នេះ។

 

ក្រុមបាល់ទាត់ព្រះខ័នរាជស្វាយរៀង, វិសាខា, បឹងកេត និងភ្នំពេញក្រោន នឹងត្រូវលេងវគ្គខ្វែង៤ក្រុមចុងក្រោយ ប្រជែងពានរង្វាន់ខេមបូឌានព្រីមៀរលីគរដូវកាល២០២២។ ការប្រកួតក្រុមលេខ១ ជួបលេខ៤ ហើយលេខ២ ត្រូវប៉ះលេខ៣៕