បន្ទាប់ពីដំណើរការមួយសប្ដាហ៍ដែលភាគច្រើនរៀបចំក្នុងលំនាំបិទទ្វារ សមាជលើកទី២០ របស់បក្សកុម្មុយនីស្តចិន បានបិទវាំងននហើយនៅថ្ងៃទី២២ ខែតុលា។ អ្វីគួរកត់សម្គាល់នោះ ខណៈដែលអង្គប្រជុំកំពុងដំណើរការ អតីតមេដឹកនាំ ហ៊ូ ជិនថាវ ក៏ត្រូវដឹកដៃចេញពីសាលប្រជុំ។ មិនទាន់មូលហេតុនៃការចាកចេញនេះឡើយ។

 

នៅថ្ងៃបញ្ចប់នេះ អង្គសមាជ បានបោះឆ្នោតអនុម័តរបាយការណ៍ការងាររបស់គណៈមជ្ឈិមអាណត្តិទី១៩ និងអនុម័តដំណោះស្រាយលើវិសោធនកម្មធម្មនុញ្ញបក្សដោយបញ្ចូលគោលការណ៍ថ្មីចំនួន២ ដែលសំដៅលើដម្កើងអំណាចរបស់លោក ស៊ី ជិនភីង ពិសេសតួនាទីស្នូលរបស់លោកក្នុងការដឹកនាំបក្ស។ សមាជិកទាំងអស់ ក៏បោះឆ្នោតជ្រើសរើសគណៈមជ្ឈិមបក្សសម្រាប់អាណត្តិទី២០ដែរ ប៉ុន្តែបញ្ជីសមាជិកថ្មីដែលជាទូទៅមានជាង២០០នាក់ មិនត្រូវបានបង្ហាញឡើយ។ 

 

ចំពោះមុខអ្នកចូលរួម លោក ស៊ី ជិនភីង ស្នើឱ្យសមាជិកបក្សទាំងអស់តស៊ូ និងសម្លឹងទៅមុខដើម្បីសម្រេចគោលដៅរបស់បក្ស។ លោកនិយាយថា៖ «ហ៊ានមោះមុត ហ៊ានឈ្នះ និងព្យាយាមបំពេញការងារ ហើយតាំងចិត្តឆ្ពោះទៅមុខ។»

 

បន្ថែមពីលើនោះ អង្គសមាជបក្សកុម្មុយនីស្តចិន ក៏អនុម័តបញ្ចូលជំហរប្រឆាំងឯករាជ្យតៃវ៉ាន់ក្នុងធម្មនុញ្ញរបស់ខ្លួនទៀត។ 

 

នៅថ្ងៃទី២៣ ខែតុលា គណៈមជ្ឈិមបក្សកុម្មុយនីស្តចិន នឹងបើកកិច្ចប្រជុំលើកដំបូងរបស់ខ្លួន ដោយនឹងបោះឆ្នោតបន្តអាណតិ្តឱ្យលោក ស៊ី ថែមទៀត។ លោក ស៊ី នឹងក្លាយជាមេដឹកនាំចិនដ៏មានឥទ្ធិពលបំផុតចាប់តាំងពីសម័យលោក ម៉ៅ សេទុង មក។

 

ជាមួយគ្នានេះ គណៈមជ្ឈិម ក៏បោះឆ្នោតជ្រើសរើសសមាជិការិយាល័យនយោបាយ និងគណៈអចិន្រ្តៃយ៍ការិយាល័យនយោបាយដ៏មានឥទ្ធិពលផងដែរ។ បេក្ខជននាយករដ្ឋមន្រ្តីបន្តពីលោក លី ខឹឈាំង នឹងបង្ហាញវត្តមានពេលនោះដែរ៕