ដោយ៖ សៅ រ័ត្ថា (យុវជនឃុំជុំគ្រៀល)

ស្រុកទឹកឈូ, ខេត្តកំពត៖ លោក ចាន់ កក មេប៉ុស្តិ៍នគរបាលរដ្ឋបាលឃុំជុំគ្រៀល ដែលស្ថិតក្នុងស្រុកទឹកឈូ ខេត្តកំពតនេះ អះអាងថាបញ្ហាគ្រឿងញៀន មានការថយចុះ ពោលគឺមិនមានករណីកើតឡើងនៅក្នុងឆ្នាំ២០២២នេះ។ ការដែលស្ថានភាពគ្រឿងញៀនក្នុងឃុំមានភាពប្រសើរដូច្នេះ ត្រូវបានលោកមេប៉ុស្តិ៍ពន្យល់ថាថា ដោយសារអាជ្ញាធរ បានរៀបចំវេទិកាសាធារណៈ អប់រំ ផ្សព្វផ្សាយជាប់ជាប្រចាំ។ ក្រៅពីរៀបចំជាវេទិកាសាធារណៈ​ អាជ្ញាធរក៏ចុះអប់រំពីបញ្ហាគ្រឿងញៀននេះ ទៅតាមខ្នងផ្ទះរបស់ប្រជាពលរដ្ឋក្នុងមូលដ្ឋាន​ដែរ។ លោក​ចាន់ កក បញ្ជាក់ដូច្នេះ រួចបន្ថែមថា ការចុះបង្ក្រាប និងយកចិត្តទុកដាក់លើបញ្ហាគ្រឿងញៀន ក៏ជាទឡ្ហីករ នៃការថយចុះនៃករណីប្រើប្រាស់គ្រឿងញៀន​ដែរ។ 
 

លោកលើកឡើងជុំវិញបញ្ហាគ្រឿងញៀនដូច្នេះ៖ «បញ្ហាគ្រឿងញៀននេះគឺថយចុះ បង្ក្រាបឆ្នាំមុនមួយករណីទេ ។ តែឆ្នាំនេះវាអត់ឃើញមាន បានន័យថា វាថយចុះហើយ។ រាល់ថ្ងៃយើងមើលទៅ ដូចអត់ឃើញគាត់ប្រើប្រាស់  ឬចែកចាយ ហើយតាមរយៈទូរស័ព្ទប្ដឹងយើង ក៏អត់មាន»។ 
  

ទោះបីការ​ចែកចាយ និងការប្រើ​ប្រាស់គ្រឿងញៀន ត្រូវបានសមត្ថកិច្ចឃុំ មើលឃើញថាថយចុះ ប៉ុន្តែពលរដ្ឋក្នុងភូមិជុំគ្រៀល ឃុំជុំគ្រៀល នៅតែបារម្ភពីកូនចៅរបស់ពួកគេ ខ្លាចលង់ខ្លួនប្រើប្រាស់គ្រឿងញៀន។ អ្នកស្រី ឃួន សាម៉េ ជាពលរដ្ឋរស់នៅក្នុងភូមិជុំគ្រៀល និយាយពីកង្វល់របស់ខ្លួនដូច្នេះ៖ «នៅក្នុងភូមិយើងមិនឃើញមានសកម្មភាព (គ្រឿងញៀន)អីទេ។ ប៉ុន្តែយើងនៅតែបារម្ភ លើក្មេងៗនោះ ដែលទៅរៀន ដែលជះឥទ្ធិពលលើការសិក្សារបស់ក្មេងៗ»។

មិនខុសពីអ្នកស្រី សាម៉េ ឡើយ អ្នកស្រី សូរ សាមុន ក៏បង្ហាញពីក្ដីកង្វល់របស់ខ្លួន ទៅលើក្មេង និងសន្តិសុខក្នុងភូមិផងដែរ ដែលបណ្ដាលមកពីបញ្ហាគ្រឿងញៀននេះ។ ស្ត្រីវ័យ៦០ឆ្នាំរូបនេះ និយាយដូច្នេះ​៖ «ព្រួយបារម្ភ ខ្លាចក្មេងៗទៅសេព(គ្រឿងញៀន) ហើយខ្លាចបង្កើតជាអំពើហឹង្សា និង អសន្តិខុសក្នុងភូមិ»។

 

ដោយមានកង្វល់ពីកូនចៅ និងសន្តិសុខក្នុងភូមិ ស្ត្រី​ខាងលើនេះ ស្នើដល់អាជ្ញាធរ បង្កើតការ​ត្រួតពិនិត្យតាមដាន និងចុះបង្ក្រាប ក៏ដូចជាពង្រឹងសកម្មភាពពាក់ព័ន្ធនានា ដើម្បីបញ្ឈប់ការប្រើប្រាស់ និងជួញដូរ គ្រឿងញៀនក្នុងមូលដ្ឋានខ្លួន។

 

ឆ្លើយតបនឹងសំណូមពរខាងលើនេះ លោក ចាន់ កក មេប៉ុស្ដិ៍ អះអាងថា ខ្លួនប្ដេជ្ញាចិត្ត ដើម្បីកំចាត់រាល់បញ្ហានានា ជាពិសេសបញ្ហាគ្រឿងញៀន នៅក្នុងមូលដ្ឋានខ្លួន។ ជាមួយគ្នានេះ លោកក៏សំណូមពរ ឱ្យអាណាព្យាបាល ក៏ដូចជាពលរដ្ឋទាំងអស់ ឱ្យចូលរួមសហការជាមួយអាជ្ញាធរ តាមរយៈការតាមដានសកម្មភាពកូនៗ ក៏ដូចជាអប់រំពួកគេ៕