សត្វផ្សោតអ៊ីរ៉ាវ៉ាឌី ជារតនសម្បត្តិជាតិមានជីវិតនៅកម្ពុជា

ជាតិ

សត្វផ្សោតអ៊ីរ៉ាវ៉ាឌី ជារតនសម្បត្តិជាតិមានជីវិតនៅកម្ពុជា

26, Oct 2022 , 7:59 pm

រូបភាព

សត្វផ្សោតអ៊ឺរ៉ារ៉ាឌី ត្រូវបានគេចាត់ទុកជារតនសម្បត្តិជាតិមានជីវិតនៅកម្ពុជា

ភ្នំពេញ៖ សត្វផ្សោតអ៊ីរ៉ាវ៉ាឌីកំពុងរស់នៅក្នុងទន្លេមេគង្គកម្ពុជា ក្នុងខេត្តក្រចេះ និងស្ទឹងត្រែង ជាប្រភេទផ្សោតមួយប្រភេទ ស្ថិតក្នុងចំណោម៦ប្រភេទនៃសត្វផ្សោតទឹកសាបកម្របំផុតដែលនៅសេសសល់ក្នុងពិភពលោក ត្រូវបានគេចាត់ទុកជារតនសម្បត្តិជាតិមានជីវិត។ ផ្សោតទន្លេមេគង្គ ត្រូវបានប៉ាន់ប្រមាណមាន ៨៩ក្បាល កំពុងរស់នៅក្នុងទន្លេមេគង្គកម្ពុជា ក្នុងឆ្នាំ២០២០។

សត្វផ្សោតអ៊ីរ៉ាវ៉ាឌី ជាកត្តាចង្អុលបង្ហាញមួយអំពីគុណភាពធនធានជលផល និងគុណភាពទន្លេ ដែលរាប់បញ្ចូលទាំងជីវៈចម្រុះ ផ្តល់នូវសេវាកម្មអេកូឡូស៊ីក្នុងការទ្រទ្រង់ជីវិតរបស់មនុស្ស។ ដោយឡែក សត្វផ្សោតអ៊ីរ៉ាវ៉ាឌី ឬផ្សោតក្បាលត្រឡោក វាស៊ីត្រីជាចំណី ចូលចិត្តរស់នៅអន្លង់ទឹកជ្រៅ ដែលរស់នៅតាមដងទន្លេចំនួន៣ រួមមានទន្លេមេគង្គ ទន្លេAyeyawady និងទន្លេMahakam។

សត្វផ្សោតអ៊ីរ៉ាវ៉ាឌី វាមានរូបរាងដូចជាមានក្បាលមូល មាត់ទាប មានឆ្មេញប្រមាណ១២ ទៅ១៩ ដែលមានប្រវែងរហូតដល់ ២,៧៥ម៉ែត្រ និងទម្ងន់រហូតដល់ ២០០គីឡូក្រោម។ ជាពិសេសផ្សោតនេះ វាចេះបាញ់ទឹកពីមាត់ ហើយការបាញ់ទឹកនេះ ជាតិចនិចក្នុងការទាក់ទាញហ្វូងត្រី និងទាក់ទាញទេសចរ ដែលអាចផ្តល់ចំណូលដល់សហគមន៍ទេសចរណ៍ធម្មជាតិផងដែរ។

ជាមួយគ្នានេះដែរ សត្វផ្សោត កំពុងរងការគំរាមកំហែង នៅតាមដងទន្លេមេគង្គ ខេត្តក្រចេះ រហូតដល់ព្រំដែនប្រទេសឡាវ។ ដោយឡែក សត្វផ្សោតទាំងនោះ ត្រូវបានទទួលការការពារ និងការអភិរក្ស ដោយអង្គការ WWF និងរដ្ឋបាលជនផល នៃក្រសួងកសិកម្ម រុក្ខាប្រមាញ់ និងនេសាទ និងសហការជាមួយដៃគូពាក់ព័ន្ធផ្សេងទៀត។

បើតាមរបាយការណ៍របស់អង្គការ WWF មូលហេតុដែលធ្វើឲ្យសត្វផ្សោត ប្រឈមនឹងការគំរាមកំហែង ដោយសារតែមានសកម្មភាពខុសច្បាប់ និងការប្រើមងនេសាទដើម្បីទាក់យកសត្វផ្សោត។ លើសពីនេះ ការប្រើឧបករណ៍ឆក់ហួសកម្រិត ធ្វើឱ្យបាត់បង់ត្រីជាចំណីរបស់ផ្សោត និងបណ្តាមកពីគម្រោងអភិវឌ្ឍន៍ហេដ្ឋារចនាសម្ព័ន្ធកំពុងសាងសង់ដែលប៉ះពាល់ដល់ការផ្លាស់ទីរបស់ផ្សោត។

អង្គការ WWF អំពាវនាវដល់ប្រជាពលរដ្ឋឲ្យបញ្ឈប់ការនេសាទក្នុងតំបន់អភិរក្សសត្វផ្សោត ការពារសត្វផ្សោតទន្លេមេគង្គ និងលើកកម្ពស់ទំនាក់ទំនងដ៏ជិតស្និទ្ធរវាងប្រព័ន្ធបរិស្ថានធម្មជាតិ និងសុខមាលភាពមនុស្ស ព្រមទាំងការរស់នៅប្រកបដោយសុខដុមរមនាជាមួយធម្មជាតិ៕