កម្ពស់ជាង២ម៉ែត្រ និងមានទំហំជិត៣តោន នៃចម្លាក់តោថ្មនីមួយៗ ពិតជាមិនស្រួលប៉ុន្មានទេក្នុងលើកដាក់។ ក្រុមការងារគម្រោងជួសជុលស្ពានហាលអង្គរវត្តសរុបជិត២០នាក់ បានប្រើប្រាស់ចំណេះជំនាញច្រើនឆ្នាំ ចងរិតលើកតោថ្មដ៏ធំទាំងពីរនេះ តាមដងស្ទួច ដោយប្រើពេល១ម៉ោងទើបអាចលើកដាក់លើរថយន្តបាន។ ម៉ោង៩ព្រឹក នាថ្ងៃទី៤ វិច្ឆិកា រថយន្តដឹកតោថ្ម បានរំកិលខ្លួនតិចៗចេញពីអភិរក្សដ្ឋានអង្គរ ឆ្ពោះទៅស្ពានហាល នៃប្រាសាទអង្គរវត្ត។

 

ការលើកឡើងរថយន្តជារឿងពិបាកមួយ ហើយការលើកចុះវិញក៏ពិបាកមួយបែប។ តែមុនទម្លាក់តោចេញពីរថយន្ត គេបានរៀបចំពិធីសែនព្រេនតូចមួយតាមទំនៀមទម្លាប់ពីបុរាណ ដើម្បីសុំសេចក្ដីពេលបំពេញការងារនេះ។ 

 

ពិធីសាសនាបានចប់ គេបានប្រើប្រដាប់អូសចំនួនមួយ ដោយដាក់តោលើនោះ ហើយឱ្យក្រុមការងារអូសទាញបន្ដិចម្ដងៗ ដើម្បីរំកិលទៅកំពង់ទឹក។ ការធ្វើដូច្នេះ ដើម្បីធានាសុវត្ថិភាពតោថ្មផង និងខ្លាចមានការខូចខាតកម្រាលស្ពានហាលដែលទើបជួសជុលផង ដ្បិតតោមានទម្ងន់ធ្ងន់។ មធ្យោបាយនេះ ចាយពេលមិនក្រោមជិតមួយម៉ោងទេ ទើបរំកិលតោបានមួយ។

ប្រធានគម្រោងជួសជុលស្ពានហាលអង្គរវត្ត លោក អន សុភាព បានឱ្យដឹងថា ការយកតោថ្មមកដាក់ទីតាំងដើមវិញនេះ គឺនៅពេលដែលគម្រោងជួសជុលស្ពានហាលហ៊ាបនឹងបញ្ចប់ទាំងស្រុងនាពេលដ៏ឆាប់ខាងមុខ។ លោក សុភាព រំឭកថា តោថ្មទាំងពីរនេះ ធ្លាប់បានជួសជុលម្ដងហើយនៅសម័យបារាំង តែនៅកំឡុងខែ តុលា ឆ្នាំ១៩៩៧ ដោយសារមានការបាក់ច្រាំងមុខតារាជ និងប៉ះពាល់ដល់តោថ្មផង ក៏ថ្នាក់ដឹកនាំសម្រេចយកចម្លាក់តោទៅរក្សាទុកនៅអភិរក្សដ្ឋានអង្គរជាបណ្ដោះអាសន្ន។  

 

តាមការបញ្ជាក់ពីលោក អន សុភាព ក្រុមការងារបស់លោក នឹងរៀបចំលើកតោថ្មទាំងពីរនេះដាក់នៅទីតាំងដើមវិញ ដើម្បីលើកតម្លៃកំពង់ទឹកឡើងវិញ ហើយរំពឹងថា ទីតាំងនេះនឹងមានភាពទាក់ទាញដល់ទេសចរក្រោយបើកដំណើរការឱ្យចរាចរណ៍ឡើងវិញ។

 

គួរបញ្ជាក់ថា តោថ្មទាំងពីរខាងលើ ត្រូវបានជួសជុលឡើងវិញពីខែ មេសា មក។ មុនជួសជុលតោថ្មនេះមានសភាពទ្រុឌទ្រោម មានបែកបាក់រូបរាងជាអន្លើរនៅផ្នែកជើងទម្រ ជើង ទ្រូង និងផ្នែកខាងក្រោយ។ល។ កាលសម័យបារាំង ចម្លាក់តោនេះ ត្រូវបានជួសជុលដោយប្រើស៊ីម៉ង់ត៍ និងដែកបិទភ្ជាប់ដើម្បីឱ្យមានលំនឹងអាចឈរបានប៉ុណ្ណោះ  ប៉ុន្តែក្រោយមក ស៊ីម៉ង់ត៍អស់អាយុកាល ធ្វើឱ្យបែកបាក់ជាបន្តបន្ទាប់។ ហើយការជួសជុលថ្មីនេះ គេប្រើប្រាស់ថ្មភក់ថ្មី ដាក់ឆ្លាក់បំពេញកន្លែងដែលបាត់ថ្ម និងបាក់បែក៕