ពលរដ្ឋចំនន ៣០០គ្រួសារ នៅក្នុងឃុំអន្លងត្នោត កំពុងកាន់កាប់បណ្ណក្រីក្រទាំង២ប្រភេទ ដែលផ្តល់ដោយរដ្ឋាភិបាល។  អ្នកស្រី ប៊ិន ស៊ីវឡា មេឃុំអន្លង់ត្នោត នៃស្រុកក្រគរ ខេត្តពោធិ៍សាត់ បានអះអាងថា ការផ្តល់បណ្ណក្រីក្រនៅក្នុងឃុំខ្លួន គឺធ្វើឡើងដោយតម្លាភាព ព្រោះមានការចូលរួមវិនិច្ឆ័យពីអ្នកពាក់ព័ន្ធជាច្រើន។ 

អ្នកស្រី ប៊ិន ស៊ីវឡា ពន្យល់បន្ថែម៖«មុននឹងយើងអនុម័ត គឺយើងត្រូវចូវចុះទៅមើល៣ទៅ៤ដង។ យើងមិនមែនធ្វើតែមេឃុំយើងតែម្នាក់ទេ គឺមានក្រុមប្រឹក្សារឃុំ មេភូមិ និងក្រុមយុវជនស្ម័គ្រចិត្តតាមភូមិ ឱ្យគាត់ជួយមើល ថាតើវាត្រឹមត្រូវ ឬក៏អត់។ ប្រសិនបើ លើក្តារព័ត៌មានយើងបិទ ប្រសិនបើមានការតវ៉ាណាមួយ យើងមិនអាចឱ្យបានទេ។ គឺខ្ញុំធ្វើម៉ត់ចត់ណាស់។ ព្រោះបណ្ណក្រីក្រនេះ នៅពេលដែលខ្ញុំនៅជាក្រុមប្រឹក្សាឃុំ ​ជាទំទប់ទី១ ជាជំទប់ទី២ ខ្ញុំជាអ្នកកាន់។ អ៊ីចឹង មុននឹងធ្វើអី គឺខ្ញុំប្រយ័ត្នណាស់។ មុននឹងសម្រេចថា យក​មិនមែនចេះតែយកតាមអ្នកសម្ភាសទេ។ គឺត្រូវមើលថាវាជាក់លាក់ដែរឬអត់ ជាពិសេស គឺអត់មានការតវ៉ាពីមូលដ្ឋាន»។

 

លោក ទូច កាដុំ ពលរដ្ឋដែលទទួលបានបណ្ណក្រីក្រប្រភេទទី២ រស់នៅក្នុងភូមិប៉ប៉ិត ឃុំអន្លង់ត្នោត ស្រុកក្រគរ ខេត្តពោធិ៍សាត់ អះអាងថាណ្ណក្រីក្រនេះ បានជួយសម្រាលជីវភាពគ្រួសាររបស់ខ្លួនមួយកម្រិត។ បុរសដែលមានពិការភាពជើងទាំងសងខាងរូបនេះ បានអរគុណដល់អាជ្ញាធរឃុំ ដែលបានផ្តល់បណ្ណក្រីក្រដល់គ្រួសារខ្លួន។ ​

 

អ្នកស្រី រឿង ធារិន ជាពលរដ្ឋម្នាក់ទៀតដែលទើបទទួលបានបណ្ណក្រីក្រប្រភេទទី១។ មានរបរធ្វើស្រែ និងទិញ-លក់អេតចាយ អ្នកស្រី រឿង ធារិន ទទួលបន្ទុកទំនុកបម្រុងកូន និងក្មួយសរុប ៥នាក់ ខណៈប្តីអ្នកស្រី បានបាត់បង់ការ គ្មានប្រាក់ចំណូលមួយរយៈហើយ។ ស្ត្រីរូបនេះ សប្បាយចិត្តដែលទទួលបានបណ្ណក្រីក្រនេះ ដោយអ្នកស្រីអះអាងថាវាបានសម្រាលបន្ទុកគ្រួសារបានមួយកម្រិត៕

 ​