ជាតិ
ព្រះចៅស៊ុលតង់ ព្រះមហាក្សត្រនៃព្រុយណេ
×![]()
ភ្នំពេញ៖ ព្រះចៅស៊ុលតង់ ព្រះមហាក្សត្រនៃព្រុយណេដារូស្សាឡាម នឹងយាងមកបំពេញព្រះរាជទស្សនកិច្ចផ្លូវរដ្ឋ នៅកម្ពុជា នាថ្ងៃទី១៤ វិច្ឆិកាខាងមុខនេះ។ ការយាងមករបស់ព្រះចៅស៊ុលតង់នេះ តបតាមការអញ្ជើញរបស់ព្រះករុណា ព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា។ 
ក្នុងព្រះរាជដំណើរយាងមកបំពេញទស្សនកិច្ចផ្លូវរដ្ឋនេះ ព្រះចៅស៊ុលតង់ ហាជី ហាសសាណាល់ បុលគីយ៉ាស់ មុយអ៊ីហ្សាឌី វ៉ាឌូឡាហ៍ ព្រះមហាក្សត្រនៃព្រុយណេដារូស្សាឡាម នឹងមានព្រះសវនាការជាមួយព្រះករុណា ព្រះបាទសម្ដេចព្រះបរមនាថ នរោត្តម សីហមុនី នាព្រះបរមរាជវាំង។ បើតាមសេចក្ដីប្រកាសព័ត៌មានរបស់ក្រសួងការបរទេស ចេញផ្សាយនៅថ្ងៃទី៧ វិច្ឆិកានេះ ព្រះចៅស៊ុលតង់ ក៏នឹងមានកិច្ចប្រជុំកំពូលទ្វេភាគី ជាមួយសម្ដេច ហ៊ុន សែន នាវិមានសន្តិភាពផងដែរ។
ជាមួយគ្នានេះ ព្រះចៅស៊ុលតង់ និងសម្ដេចនាយករដ្ឋមន្រ្តីកម្ពុជា នឹងយាង/អញ្ជើញជាអធិបតីក្នុងពិធីចុះហត្ថលេខាលើអនុស្សរណៈនៃការយោគយល់គ្នារវាងរដ្ឋាភិបាលនៃប្រទេសទាំងពីរ ស្ដីពីកិច្ចពិគ្រោះយោបល់ទ្វេភាគី។ ក្រៅពីជួបព្រះមហាក្សត្រកម្ពុជា និងសម្ដេច ហ៊ុន សែន ព្រះចៅស៊ុលតង់ នឹងយាងដាក់កម្រងផ្កាគោរពវិញ្ញាណក្ខន្ធនៅវិមានឯករាជ្យ និងនៅព្រះបរមរូប ព្រះបរមនកោដ្ឋ។
សេចក្ដីប្រកាសព័ត៌មានខាងលើ បញ្ជាក់ថា ព្រះរាជដំណើរទស្សនកិច្ចរបស់ព្រះចៅស៊ុលតង់ ប្រព្រឹត្តទៅស្របពេលដែលប្រទេសព្រុយណេ និងកម្ពុជា ប្រារព្ធខួបអនុស្សាវរីយលើកទី៣០ នៃការបង្កើតទំនាក់ទំនងការទូតក្នុងឆ្នាំនេះ៕
Tag:
ព្រះចៅស៊ុលតង់
ព្រះមហាក្សត្រព្រុយណេ
កម្ពុជា
© រក្សាសិទ្ធិដោយ thmeythmey.com
«នាំអាត» និង«នាំអាទិ៍»មួយណាត្រឹមត្រូវ?
1 សប្តាហ៍
