លោក អ៊ីង ជា នាយកសាលាបឋមសិក្សាតូនីតាកេ បានឱ្យដឹងថា នៅក្នុងបណ្ណាល័យ មានសៀវភៅអាន និងសិក្សា សម្រាប់​ការសិក្សារបស់សិស្សបឋមសិក្សាជិត ៥០នាក់ ដែលកំពុងសិក្សានៅទីនេះ។ «មានបណ្ណាល័យ ដែលរៀបនៅក្នុងទីចាត់ការ ដោយសារសាលាយើងខ្វះអគារ អ៊ីចឹងយើងរៀបចមធ្នើរដែលឧបត្ថម្ភដោយក្រសួងអប់រំ មានធ្នើរ មានសៀវភៅ។ ចំណែកឯសៀវភៅក្នុងបណ្ណាល័យ ដែលរៀបចំក្នុងទីចាត់ការ មានសៀវភៅច្រើនចម្រុះគ្នា។ មានលក្ខណៈអប់រំ មានលក្ខណៈប្រជាប្រិយភាព មានទាំងច្បាប់ផ្សេងៗ ដែលបម្រើដល់ការសិក្សា និងអានរបស់សិស្សានុសិស្ស»។

 

ដ្បិតតែមានបណ្ណាល័យ ដែលមានសៀវភៅសិក្សាគ្រប់គ្រាន់ សម្រាប់មែន ប៉ុន្តែ លោក អ៊ីង ជា បានបញ្ជាក់ថា ដោយសារតែវាត្រូវបានរៀបចំនៅក្នុងទីចាត់ការដូច្នេះ វាមានភាពចង្អៀតបន្តិចសម្រាប់សិស្សដែលចង់​មកអានសៀវភៅខ្លះដែរ។ ជុំវិញកង្វះ បន្ទប់សិក្សា និងការរៀបចំបណ្ណាល័យនេះ កន្លងមក លោក នាយកសាលាបឋមសិក្សាតូនីតាកេ រូបនេះ ក៏បានស្នើសុំទៅលោកគ្រូបានស្នើសុំជាលក្ខណៈសូចនាកររាល់ឆ្នាំ ប៉ុន្តែពុំមានស្នើសុំជាលិខិតទេ។ ប៉ុន្តែការដាក់ស្នើសុំទៅកាន់ក្រសួងអប់រំ តាមរយៈការសូចនាករប្រចាំឆ្នាំដែរ ក៏ប៉ុន្តែមិនមានការឆ្លើយតប​ឡើយ​។

 

បើតាមលោក អ៊ីង ជា ការណ៍ដែលក្រសួងមិនទាន់ឆ្លើយ ទំនងជាមកពីចំនួនសិស្សនៅទីនេះ មានចំនួនតិចតួចនៅឡើយដែរ។ លោក អ៊ីង ពន្យល់ដូច្នេះថា៖ «ការស្នើសុំ​ គឺពាក់ព័ន្ធទៅនឹងកំណើនសិស្សដែរ។ ប្រសិនបើកំណើនសិស្សមានការកើនឡើងច្រើន តម្រូវការ និងការរៀបចំបណ្ណាល័យ សម្រាប់ឲ្យសិស្សក៏ច្រើន។ ប្រសិនបើមានកំណើនសិស្សកើនពីមួយឆ្នាំ ទៅមួយឆ្នាំ ការដាក់ស្នើទៅមន្ទីរអប់រំ យុវជន និងកីឡា ក្រសួង នឹងមានការរៀបចំបន្ទប់បណ្ណាល័យ»។ 

យ៉ាងណាក៏ដោយលោកនាយកសាលារូបនេះ ចង់​ឱ្យ​ក្រសួង ឬមន្ទីរអប់រំ គិតគូរដល់ការរៀបចំបណ្ណាល័យ នៅក្នុងសាលាខ្លួនឱ្យបានប្រសើរ និងទូលាយល្អ ដើម្បីរួមចំណែកទាក់ទាញសិស្សឱ្យចូលអាន និងស្វែងយល់បានកាន់តែច្រើន​៕