កីឡាជាតិ
ជាតិ
MCL2014៖ បៀលប្រាយ អាស៊ីអឺរ៉ុប និង Albirex ស្វែងរកជ័យជម្នះលើកដំបូង អ្នកចាំទីរបស់ Albirex នាការប្រកួតជាមួយស្វាយរៀង។ រូបថត CAM Photo Agency
× ក្រុមបាល់ទាត់ភ្នំពេញក្រោន, TriAsia, ណាហ្គាខប និង អគ្គស្នងការដ្ឋាននគរបាលជាតិ កំពុងតែមានពិន្ទុ ៤ ពិន្ទុស្មើគ្នានាំមុខក្នុងតារាងនៃពានរង្វាន់បាល់ទាត់ Metfone Cambodian League 2014 គិតត្រឹម ២ សប្ដាហ៍កន្លងទៅនេះ ខណៈក្រុមខេត្តស្វាយរៀង, ចម្ការកៅស៊ូបឹងកេត និង វេស្ទើន មាន ៣ ពិន្ទុម្នាក់តាមពីក្រោយ។
នៅថ្ងៃសៅរិ៍ទី ៨ កុម្ភៈ នេះមានការប្រកួត ៤ ប្រកួត ដោយនៅស្ដាតចាស់មាន ២ គូ និង ពហុកីឡដ្ឋានជាតិ មាន២ គូ។ តើក្រុមណាអាចរកពិន្ទុឈរកំពូលតារាងនៅសប្ដាហ៍ទី៣ ដែលនឹងចាប់ផ្ដើមប្រកួតនៅចុងសប្ដាហ៍នេះ?
ចម្ការកៅស៊ូបឹងកេត Vs អគ្គស្នងការដ្ឋាននគរបាលជាតិ (ម៉ោង ១ :៣០ នៅស្ដាតចាស់)
ក្រុមចម្ការកៅស៊ូបឹងកេត ក្រោមការដឹកនាំរបស់លោកគ្រូបង្វឹក ប្រាក់ វុទ្ធី ក្រោយបរាជ័យ ក្រោមថ្វីជើងក្រុមចំណូលថ្មី TriAsia កាលពីចុងសប្ដាហ៍កន្លងទៅ ត្រូវរួមកម្លាំងគ្នាសាជាថ្មី ស្វែងរកពិន្ទុនៅប្រកួតនេះ និង ប្រកួតបន្ទាប់ ជៀសវាងដាច់ឆ្ងាយពីក្រុមខ្លាំងដទៃទៀត។ ខ្សែប្រយុទ្ធជនជាតិហុល្លង់ Van Der Hooft Elroy, ចាន់ វឌ្ឍនាកា, ឃួន ឡាបូរ៉ាវី, សុខ ផេង សុទ្ធតែជាតារាជើងស៊ុតរបស់ក្រុម។
ចំណែកអគ្គស្នងការរដ្ឋាននគរបាលជាតិ (ប៉ូលិស) មិនទាន់ស្គាល់ពាក្យថាចាញ់នៅឡើយទេ ដោយ ២ ប្រកូតឈ្នះ ១ និង ស្មើ ១ ប្រកួត។ ក្រុមលោកគ្រូបង្វឹក អ៊ុង កងយ៉ានិត ក៏ត្រូវការពិន្ទុដើម្បីភាពខ្លាំងរបស់ខ្លួនបន្តទៀត ខណៈដែលកីឡាករ នួន បូរី រកគ្រាប់បាល់បាន ២ គ្រាប់ម្នាក់ឯងឱ្យក្រុម នាប្រកួតកន្លងមក។
បៀលប្រាយយូណាយធីត Vs ណាហ្គាខប (ម៉ោង ៣:៤៥ រសៀល នៅស្ដាតចាស់)
បៀលប្រាយដែលមានកម្លាំងកីឡាករក្នុងស្រុក ផ្សំនឹងធនធានល្អៗ មកពីបរទេស មួយចំនួន បានធ្វើឱ្យក្រុមដទៃគិតថាជាឧបសគ្គមួយនៅរដូវកាលនេះ។ តែអ្វីៗដូចជាមិនទាន់លេចចេញជាលទ្ធផលធំដុំនៅឡើយនោះទេ ព្រោះ២ ប្រកួតកន្លងមកស្មើទាំង ២ ដែលជាហេតុធ្វើឱ្យលោកគ្រូបង្វឹក លាស់ សាឡាស់ខាន់ ត្រូវពិចារណារកវិធីធ្វើឱ្យផុតទុក្ខ។
ចំពោះណាហ្គាខប ដែលប្រមូលផ្ដុំដោយកីឡាករចាស់ៗ និង បទពិសោធន៍ច្រើនឆ្នាំ បន្ថែមនឹងកីឡាករបរទេស ៥ នាក់ទៀតត្រូវបានមហាជនរំពឹងថាទំនងជាបេក្ខភាពប្រជែងយ៉ាងពានរឹងមាំជាងគេ។ បើទោះជាឈ្នះ ក្រសួងការពារជាតិ ៣ ទល់ ០ និង ស្មើ គីរីវង់សុខសែនជ័យ ០ ទល់ ០ តែទម្រង់លេងរបស់ក្រុមមួយនេះនៅមិនទាន់រលូន ខណៈ ៨ ថ្ងៃចុងក្រោយនេះឆ្លងកាត់ការប្រកួតរហូតដល់ ៤ ប្រកួតឯណោះ។
ស្វាយរៀង Vs អាស៊ីអឺរ៉ុប ផ្សាយផ្ទាល់នៅប៉ុស្ដិ៍ BTV (ម៉ោង ៣:៣០ រសៀល នៅពហុកីឡដ្ឋានជាតិ)
ក្រុមជើងឯកឆ្នាំចាស់ខេត្តស្វាយរៀង ទើបប្រកួតបានមួយប្រកួតតែ រកគ្រាប់បាល់បាន ៦ គ្រាប់។ លោក សំ វ៉ាន់ដេត ត្រូវធ្វើយ៉ាងណាបង្វឹកកូនក្រុមឱ្យបានកាន់ល្អព្រោះឆ្នាំនេះត្រូវប្រកួតរហូតដល់ពានរង្វាន់ ៣ ខុសគ្នារួមមាន លីក, Hun Sen Cup និង តំណាងឱ្យកម្ពុជាក្នុងពានលំដាប់ទី៣ របស់ទ្វីបអាស៊ី AFC President's Cup។
ដោយឡែកអាស៊ីអឺរ៉ុប មានដង្ហើមដកនៅលីកកម្ពុជាមួយរដូវកាលទៀត តែអ្វីៗដូចជាចាប់ផ្ដើមមិនសូវល្អសោះ ព្រោះឈរនៅចំណាត់ថ្នាក់លេខ ១១ ក្នុងចំណោម ១២ ក្រុម បន្ទាប់ពី២ ប្រកួតចាញ់ទាំង២។ អ្វីដែលគួរឱ្យកត់សម្គាល់ដើមរដូវកាល ២០១៤ ក្រុមសាកលវិទ្យាមួយនេះមិនទាន់បង្ហាញមុខកម្លាំងបរទេសនៅឡើយនោះទេ។
Albirex Niigata Phnom Penh Vs TriAsia Phnom Penh (ម៉ោង ៦ នៅពហុកីឡដ្ឋានជាតិ)
ក្រុមដែលមានថ្នាក់ដឹកនាំជាជនជាតិជប៉ុនទាំង២ត្រូវដឹកនាំការប្រកួតបង្ហាញទស្សនិកជនកម្ពុជាជាលើកដំបូងប្រចាំរដូវកាល។ បើមើលឱ្យចំ TriAsia របស់លោកគ្រូបង្វឹក Daisuke Yoshioka មានប្រៀបជាងទាំងកីឡាករ និង អ្នកគាំទ្រ។ ប៉ុន្ដែអ្វីៗ មិនទាន់អាចកំណត់បានមុន ដរាបណាប្រកួតចប់ទើបដឹងលទ្ធផល៕
© រក្សាសិទ្ធិដោយ thmeythmey.com