ជាតិ
ក្មេងប្រុស៣នាក់ លង់ទឹកស្លាប់ ក្រោយលិចទូកនៅបឹងតាអី ក្នុងស្រុកពោធិ៍រៀង រូបភាពពីរដ្ឋបាលស្រុកពោធិ៍រៀង ខេត្តព្រៃវែង
× ភ្នំពេញ៖ ក្មេងប្រុស ៣ បានបាត់បង់ជីវិត និង៦នាក់ផ្សេងទៀត ត្រូវបានពលរដ្ឋជួយសង្រ្គោះទាន់ពេល ក្នុងករណីលិចទូកក្នុងបឹងតាអី នៅស្រុកពោធិ៍រៀង ខេត្តព្រៃវែង។ លោក ជា វាសនា អធិការស្រុកពោធិ៍រៀង ប្រាប់សារព័ត៌មានថ្មីៗ តាមទូរសព្ទថា ក្មេងប្រុសទាំង៩នាក់ បានជិះទូកលេង ក្រោយពួកគេចេញពីរៀននៅម៉ោងប្រហែល៩ព្រឹក។
យុវជន៩ នាក់ ជាសិស្សសាលាបាននាំគ្នាជិះទូកលេង នៅក្នុងបឹងតាអី ដែលមានជម្រៅចន្លោះពី២ទៅ៣ម៉ែត្រ ស្ថិតនៅភូមិត្នោត ឃុំកំពង់ឫស្សី ស្រុកពោធិ៍រៀង ខេត្តព្រៃវែង។ បើតាមលោក ជា វាសនា អធិការស្រុកពោធិ៍រៀង ពេលកំពុងជិះទូក ស្រាប់តែទូកលិច បណ្ដាលឱ្យយុវជន ៣នាក់ លង់ទឹកស្លាប់ ខណៈ៦នាក់ទៀត ហែលរួចខ្លួន និងខ្លះត្រូវបានពលរដ្ឋក្បែរនោះជួយសង្រ្គោះ។
លោក ជា វាសនា អធិការស្រុកពោធិ៍រៀង បន្តថា ក្រោយកើតហេតុសមត្ថកិច្ច និងអាជ្ញាធរមូលដ្ឋាន បានចុះមុជទឹកស្វែងរកសាកសពយុវជនទាំង ៣ ដោយរកឃើញភ្លាមៗចំនួន ២នាក់ និងម្នាក់រកឃើញនៅម៉ោងជិត ១២ថ្ងៃត្រង់។
អធិការស្រុកពោធិ៍រៀងរូបនេះ ក៏បានអំពាវនាវដល់ឪពុកម្ដាយ ឬអាណាព្យាបាល ប្រុងប្រយ័ត្ន និងណែនាំកូនចៅកុំឱ្យលេងទឹក ជៀសវាងគ្រោះថ្នាក់ជាយថាហេតុណាមួយ៕
Tag:
លង់ទឹក
លិចទូក
ព្រៃវែង
© រក្សាសិទ្ធិដោយ thmeythmey.com